Ottjen Alldag

Ottjen Alldag is en plattdüütsche Romaanreeg von’n Bremer Schriever Georg Droste un de Naam von de wichtigste Figur in disse Romaans. De Reeg is in dree Delen von 1913 bet 1917 rutkamen. De Böker vertellt de Geschicht von en Bremer Kindheit mit stark autobiografische Delen.

Ottjen Alldag is en plietschen Bremer Jung, de an’t rechte Bremer Weseröver opwasst, glieks achter’n Oosterdiek. Droste vertellt in sien Romaans Ottjen Alldag sien Leven von de Kinnertied bet to’n utwussen Keerl.

Gedenken

De Ottjen-Alldag-Born is al 1733 boot worrn. De Bomeester von dissen Born ut Steen (Becken) un Bronz (Röhr) is nich kennt. Toeerst hett he op en Buurhoff in’e Lanknau stahn, wo nu de Neestädter Haven is. Dat Becken is 1963 to Droste sien Gedenken na’n Snoor, Eck Spiekerbortstraat, ümsett worrn.
De Ottjen-Alldag-Plastik is an desülve Steed un is 1964 to den Born opboot worrn. De ut Kupper maakt Plastik is von’n Bildhauer Claus Homfeld.
De Ottjen-Alldag-Straat in Huckelriede, wat to'n Stadtdeel Övervieland tohören deit, geiht von de Habenhusener Landstraat an de-ehr westen Enn af.

Medien

Von de Romaans hett Heinrich Schmidt-Barrien in de Johren 1950 för Radio Bremen ok en Höörspeel-Reeg mit 16 Delen maakt. Ünner Leid von Ilka Bartels sünd de Höörspelen denn 1954 bi Radio Bremen un’n NDR opnahmen worrn.

Mitmaakt hebbt dor: Erika Rumsfeld, Ruth Bunkenburg, Heinz Krug, Ferdinand Zeisner, Marie Kiehn, Lina Maetze, Hanna Larsen, Anneliese Tesch, Deli Maria Teichen, Bruno Plaat, Hinnerk Gronau, Ernst Waldau, Anke Bollhagen, Herbert Sebald, Marie Luise Martin, Gerd Ehlers, Kay Landmark, Fritz Börner, Hanna Thielbar-Pleuß, Hans Rolf Radula, Alfred Pundsack un Heinz Wiechmann. De Musik is von Volker Gwinner.

Böker

Georg Droste: Ottjen Alldag un sien Kaperstreiche. Een plattdütsch Kinnerleben an’r Waterkante. 1913
Georg Droste: Ottjen Alldag un sien Lehrtied. Een Vertellsel ut ’n Bremer Kopmannsleben. 1914
Georg Droste: Ottjen Alldag un sien Moorhex. Een Vertellsel ut ’n Kinner- un Leefsleben. 1917
Georg Droste: Ottjen Alldag. Roman. Gesamtausgabe. Drei Bände in einem Band. Schünemann, Bremen 1977 (8. A.), 178 + 148 + 170 S., ISBN 379611511X

Weblenken

Indrääg bi de PBuB över Ottjen Alldag (hoochdüütsch)