Sarie

Sarie
Redakteur	Michelle van Breda
Kategorieë	Gesin- en vrouesake
Frekwensie	Maandeliks
Uitgewer	Media24
Eerste uitgawe	1949
Land	Suid-Afrika  Namibië
Taal	Afrikaans
Webwerf	sarie.com

Sarie is 'n Afrikaanse vrouetydskrif wat maandeliks deur Media24, 'n filiaalmaatskappy van Naspers uitgegee word. Die tydskrif se slagspreuk is My Inspirasie. Die redakteur is Michelle van Breda.

Ontstaan

Sarie se naam is aan die liedjie My Sarie Marais se titel ontleen. Die tydskrif het oorspronklik Sarie Marais geheet, 'n naam wat tydens die eerste uitgawe (6 Julie 1949) sinoniem was met die idee van maghebbende Afrikaanse vroulikheid. Dit was nie die eerste Afrikaanse tydskrif wat op die vrouemark gerig was nie, want Rooi Rose het reeds in 1942 die lig gesien onder leiding van Hendrikus Potgieter, beter bekend as die skrywer Mark Preston en Die Moderne Vrou, 'n publikasie van die Afrikaanse Pers Beperk, in 1936, maar dit het net sowat 'n jaar bestaan. Waarskynlik die vroegste voorbeeld van 'n Afrikaanse vrouetydskrif was Die Boerevrou, wat van Maart 1919 tot Desember 1931 verskyn het. Ook die Gereformeerde Vroueblad, opgerig in Junie 1946 onder leiding van Aletta du Plessis, is ouer as Sarie. Sarie se inhoud het uit die staanspoor gestrek van mode, skoonheid, huisdekor en kookkuns tot verhoudingsadvies en gesinsvoorligting.

Sarie en sy direkte mededinger, Rooi Rose, se sirkulasie was jare lank min of meer dieselfde, maar in die eerste kwartaal van 2016 het Sarie se sirkulasie teruggesak tot 75 844 en die tydskrif so sy plek onder die grootste 10 tydskrifte in Suid-Afrika gekos. In dieselfde tydperk was Rooi Rose se sirkulasie 90 689, die sesde meeste in die land. In die tweede kwartaal van 2016 het Rooi Rose teruggesak tot 63 704, vergeleke met Sarie se 71 124.

Sien ook

• Alba Bouwer, dertien jaar lank adjunkredakteur van Sarie.
• Marita van der Vyfer, skrywer wat artikels vir Sarie geskryf het.
• Deon Meyer, verhaalskrywer wat vir Sarie geskryf het.

Eksterne skakels

• Die Sarie se tuisblad