Noért pinot
Ech noért pinot (pinot noir in franchoés) ch'est un tipe ed vin pis un chépage (type ed vingne) qui vient d'Bourgonne moais qu'os put truvoér dins granmint d'régions in Franche pi in Europe. Ech noért pinot i donne un vin avuc unne couleur rubis fort pis il o un gout porfond pis fruitè. Ech noért pinot il est ch'père à unne famile ed plants d'vingne qui s'lonme ches noiriens conme ech Chardonnay, ech Gamay pis chl'Aligoté.
Dou-jou qu'i vient ?
[éditer | modifier ech wikicode]
Ech noért pinot ch'est un type ed vingne fort viu. Il est tchultivè in Bourgonne dès ch'tans quanque ches Romains is ont vnus in Gaule. Ech noért pinot il est ch'plant dmeurè ch'pus prés d'el vingne seuvage qu'o puvoét truvoér in Gaule avant l'arivè à ches Romains.
Pindant ch'Moéyin Age, ch'noért pinot il o 'tè ch'plant d'vingne ech pus aperchiè in Bourgonne. Sin nom est donnè por el prunmière foés in 1375 (os l'lonme pinot noir ou plant fin dins ch'tans-lo) quanqu'ech Duc ed Bourgonne, Filipe ech Hardi, i donne l'orde d'aratcher tertous ches plants d'Gamay d'Dijon dusqu'à Mâcon por y rplanter du noért pinot. In éfet, ch'noért pinot il avoét jadis 'tè fort présint in Bourgonne pis il avoét unne fort boinne réputacion moais pindant ch'XIVe sièke in avoét plantè granmint d'Gamay, un plant qui baille granmint pus ed vin in quantitè, pis l'qualitè à ches vins d'Bourgonne al avoét cminchè à décroête, el réputacion d'tertout ch'vignobe itout. Adon, Filipe ech Hardi il o foait rfoaire d'ech noért pinot in Bourgonne pis ch'Gamay il o migrè dins ch'sud d'el région, d'Mâcon dusqu'à Lion. Cho vo dvenir ch'Beaujolais.
Ech noért pinot i donne un vin d'qualitè, avuc un gout bien fin pi bien fort, il o 'tè importè in Vau d'Loère pi il donnè ch'Sancerre qu'est un noért pinot qu'o foait in Anjou pi Poétou.