Isolacion acostica
L'isolacion fonica, o isolacion acostica, permet d'evitar la propagacion del bruch.
Dins un mitan compressible, mai sovent dins l’aire, lo son se propaga jos forma d'una variacion de pression creada per la font sonora. Sola la compression se desplaça e non pas las moleculas d’aire, o sonque d'unes micromètres. Lo son se propaga tanben dins los solids jos forma de vibracions dels atòms nomenadas fonons. Aquí tanben, sola la vibracion se propaga, e non pas los atòms que fan sonque vibrar fòrça fèblament a l'entorn de lor posicion d'equilibri.
Tot bastit e infrastructura o activitat « pòt èsser cadun son torn « atacaire » o « atacat » sul plan acostic; cal donc subretot analisar plan l’environament sonor a l'entorn de la pèça, la proximitat mejancièra e los damatges acostics que poiriá provocar l’expleitacion del bastit qui a a construire al vejaire de la destinacion d'aqueste ». L'isolacion pòt èsser interiora o exteriora. Unes materials (laissas e mòtas de tèrra vegetalizadas) pòdon tanben dins una cèrta mesura absorbar lo bruch e atal lo rebatre pas.
Materials isolants fonics
[modificar | Modificar lo còdi]
Mai sovent, mai un material es dens, mai es isolant acostic (lei de massa). D'efièchs de pèl e de resonança son a vegadas de prene en compte se lo material es pas rigid (tòla, placa prima, etc).
Los absorbants acostics coma la lana de ròca, la lana de veire, de cambe o de cellulòsa son, dins lo domèni del bastit, sovent designats « isolants fonics » o « isolants acostics » per error (intervenon de fach, coma absorbants o « amortissaires », dins un sistèma massa-ressòrt-massa permetent una bona isolacion acostica de mendre pes).
L'isolacion per l'exterior d'un imòble o d'ostals mejancièrs presenta de plen d'avantatges termics e conomiqcs, mas se las parets o postams son conductors del bruch (ex: malons de beton), un doblatge interior per un isolant fonic pòt èsser necessari per mermar o suprimir la transmission del bruch entre lotjaments vesins, contra la « transmission laterala » per la faciada o un malon unic.
Mesura d'isolacion
[modificar | Modificar lo còdi]Existís un indici de mesura pels bruchs aerians (Rw), es a dire lo bruch de carrièras (trafic rotièr) e lo bruch ròsa (autres bruchs aerians), e tanben un indici pels bruchs d'impactes (Lw), que son exprimits en decibèls (dB) (veire Son). Existís tanben de valors C e Ctr que son dè termes d’adaptacion pels bruchs ròse e rotièrs.
Per mesurar l'eficacitat d'isolacion als bruchs d'impacte, se compta mai sovent la diferéncia de dB entre lo materials nud e amb l'isolant (Ln). Mai la diferéncia de Lw es importanta, melhora es l'isolacion. Se compta a vegada amb lo coeficient Ln, que presenta lo bruch demorant après passatge dins l'isolacion: mai aqueste es bas, mens la noisença es granda e melhora es l'isolacion.
L'absorpcion acostica o correccion acostica, qu'es diferenta de l'isolacion fonica, condiciona lo rebat dels sons dins una pèça donada. Es exprimida en alfa sabina. Mai la valor es pròcha de 1, melhora et l'absorpcion. Precisament, es lo rapòrt de la poténcia absorbada per la oténcia incidenta (en W/m²). Per gaireben totes los materials, la valor depend fòrça de la frequéncia sonora estudiada.