Shulgi
Shulgi[1] (mòrt en 2047 av. JC) es un rèi de la IIIa dinastia d'Ur que reinèt de 2094 a 2047 av. JC. Succediguèt a Ur-Nammu (2112-2094 av. JC) e foguèt remplaçat per Amar-Sin (2046-2038 av. JC).
La premiera partida de son rèine foguèt consacrada a la reorganizacion politica, militara e administrativa dau reiaume qu'aviá conegut un periòde d'expansion important dins lo corrent dau rèine de son paire. Per aquò, se raprochèt dau modèl d'Akkad e prenguèt en particular lo títol de « rèi dei quatre nacions ». La construccion de la zigorat d'Ur faguèt pereu partida d'aquela politica. D'efèct, aqueu bastiment permetiá de proclamar l'estatut divin dei sobeirans d'Ur e sa primautat sus Mesopotamia. La segonda partida dau rèine, a partir de 2070 av. JC, veguèt la represa d'una politica expansionista en direccion d'Elam, dei Monts Zagros e dau nòrd de Mesopotamia. Pasmens, leis Elamitas li opausèron una resisténcia acarnada e Ur foguèt finalament obligada de fortificar sa frontiera orientala.
En fòra d'aquò, Shulgi semblava de tenir una cultura importanta (mai d'una inscripcion lo presenta coma un sobeiran letrut) e son rèine sembla marcat per una activitat intellectuala importanta. En particular, plusors mites e tèxtes majors de la cultura mesopotamiana (coma lei racòntes d'Enmerkar ò l'Epopèia de Gilgamesh) i foguèron mes a l'escrich per lo premier còp.
Liames intèrnes
[modificar | Modificar lo còdi]Bibliografia
[modificar | Modificar lo còdi]Nòtas e referéncias
[modificar | Modificar lo còdi]- ↑ Dins certaneis estudis europèus ancians, son nom èra escrich Dungi en causa d'un biais diferent d'escriure lei lengas mesopotamianas vièlhas.