Dean Barrow
Dean Oliver Barrow (* 2. März 1951 in Belize-Stadt) is en Avkaat un Politiker ut Belize (UDP). He weer 2008 bet 2020 Premierminister von Belize.
Leven
[ännern | Bornkood ännern]Barrow is an’n 2. März 1951 as Söhn von Joyce Erica, borene Lindo (27. November 1929–7. Juni 2006), un den Aftheker Arthur Innes Barrow (3. April 1924–3. September 2009) in Belize-Stadt (to de Tied de Hööftstadt von Brietsch-Honduras) boren.[1][2][3] De Jurist Denys Barrow is sien Broder un de Politikerin Denise Barrow siene Süster. He weer op dat St Michael’s College in Belize-Stadt un hett na de School an de University of the West Indies in Cave Hill (Barbados) Juristeree studeert, wat he 1973 mit en Bachelor of Laws afslaten hett.[1] An de Norman Manley Law School in Mona (Jamaika) hett he denn 1975 sien Certificate of Legal Education maakt.[1] In dat Johr is he in Belize as Avkaat tolaten worrn.
Sien Master of Laws hett he 1981 an de University of Miami School of Law kregen un an de University of Miami noch en Master of Arts in International Relations ranhängt, den he 1982 kregen hett.[1]
Al von 1975 af an hett Barrow in de Kanzlie von sien Unkel Dean Lindo mitarbeidt un is dor 1977 Partner worrn. 1989 hett he mit Rodwell Williams de Kanzlie Barrow and Williams apenmaakt. Siet 2008 hett he aver nich mehr praktizeert.
Barrow weer in eerste Eh verheiraadt mit Lois Michele Young (* 19. Januar 1951). De beiden hebbt twee Kinner (Anwar un Deanne). An’n 7. Februar 2009 hett he in Savannah in twete Eh Kim Simplis (* 3. März 1972) freet, mit de he een Dochter hett. Sien Söhn Jamal Michael Barrow (* 8. November 1978) ut en Beziehung mit Frances Imeon Myvett (Süster to Michael Finnegan) is ünner’n Naam Shyne as Rapper aktiv. Barrow hett also veer Kinner.[1]
Politik
[ännern | Bornkood ännern]Barrow is 1983 för de UDP in’n Stadtraad von Belize-Stadt wählt worrn, bi de nächste Wahl 1986 aver nich wedder antreden.[4]
Bi de Parlamentswahl in Belize 1984 weer he Kannedaat för de UDP in’n Wahlkreis Queen’s Square un hett de Wahl mit 66,5 % von de Stimmen gegen Ralph Fonseca von de PUP wunnen. Ok bi de Wahlen 1989 (63,9 % von de Stimmen gegen Thomas Greenwood, PUP), 1993 (68,6 % gegen Juliet Soberanis, PUP), 1998 (50,79 % gegen Richard Bradley, PUP), 2003 (55,36 % gegen Bradley), 2008 (76,10 % gegen Anthony Sylvestre Jr., PUP), 2012 (79,12 % gegen Anthony Sylvestre Jr., PUP) un 2015 (78,39 % gegen Anthony Sylvestre Jr., PUP, un Garry Matus, BPP) kunn he sik in’n sülven Wahlkreis wedder dörsetten.
Dormit is he siet 14. Dezember 1984 Afornten von dat Repräsentantenhuus von Belize.
Bi de Wahl 1984 hett de UDP dat eerste Maal in Belize de Wahl wunnen un den Premierminister stellt. Ünner Premierminister Manuel Esquivel is Barrow von 1984 bet 1989 Butenminister ween (Kabinett Esquivel I). Nadem an’n 4. Juni 1986 Hubert Elrington dat Amt as Generaalstaatsanwalt afgeven hett, hett Barrow bet 1989 ok düssen Posten övernahmen.
De Wahl 1989 hett de UDP verloren un Barrow weer Oppositschoonsafornten. Bi de Wahl 1993 hett aver wedder de UDP de Macht övernahmen un Esquivel is en tweet Maal Premierminister worrn. Ünner em weer Barrow von 1993 bet 1998 Butenminister, Generaalstaatsanwalt un Viez-Premierminister (Kabinett Esquivel II). In’n Januar 1995 hett Barrow tosätzlich von Manuel Esquivel dat Ministerium för Natschonale Sekerheit övernahmen.
Na de Wahl 1998 is de UDP för acht Johr in de Oppositschoon gahn. Esquivel is in’n August 1998 as Parteibaas von de UDP afwählt worrn un Barrow is Parteibaas worrn. He weer denn von’n 30. August 1998 bet 8. Februar 2008 Oppositschoonsföhrer.
Bi de Wahl 2008 kunn de UDP 25 von de 31 Seten halen. Barrow is an’n 8. Februar 2008 Premierminister worrn un hett in dat Kabinett Barrow I, dat an’n 11. Februar 2008 insworn worrn is, ok dat Amt as Minister för Finanzen övernahmen. Bi de Wahlen 2012 un 2015 kunn sik de UDP beide Maal wedder dörsetten. Barrow is Premierminister bleven un hett de Kabinetten Barrow II un Barrow III billt.
An’n 19. Oktober 2016 hett Godwin Hulse sien Tostännigkeit as Minister för Polizei an Barrow afgeven.
An’n 13. Dezember 2016 hett Vanessa Retreage ehr Ämter as Ministerin afgeven un Barrow hett von ehr den Posten as Minister för Natürliche Ressourcen övernahmen. Dorbi hett Barrow sien Tostänngkeit för de Polizei in dat Portfolio von Wilfred Elrington överdragen.
An’n 12. Juni 2018 hett Barrow den Posten as Minister för Natürliche Ressourcen an Hugo Patt afgeven un dorför von em den Posten as Minister för Arbeid, Lokale Verwaltung, Ländliche Entwicklung, Energie, Versorgung, Apentlichen Deenst, Wahlen un Grenzen övernahmen.
De Verfaten von Belize verlöövt blots dree Amtstieden för’n Premierminister. Dorüm müss Barrow bi de Wahl 2020 sien Amt afgeven.
Siet 2015 is Barrow Maat von dat Privy Council.
Footnoten
[ännern | Bornkood ännern]- ↑ a b c d e The Prime Minister, Pressamt von de Regeren von Belize
- ↑ Mother of Opposition Leader dies at 78, Channel 5 Belize an’n 8. Juni 2006
- ↑ Arthur Innes Barrow, PM’s father, passes away, Channel 5 Belize an’n 3. September 2009
- ↑ Myrtle Palacio: Belize City Council Election Results 1962 to 2003
Weblenken
[ännern | Bornkood ännern]
1981–1983: George Cadle Price | 1983–1984: Vernon Harrison Courtenay | 1984–1989: Dean Barrow | 1989–1993: Said Musa | 1993–1998: Dean Barrow | 1998–2002: Said Musa | 2002–2003: Assad Shoman | 2003–2006: Godfrey Smith | 2006–2007: Eamon Courtenay | 2007–2008: Lisa Shoman | 2008–2020: Wilfred Elrington | 2020–: Eamon Courtenay
1981–1984: Said Musa | 1984: Vernon Harrison Courtenay | 1984–1986: Hubert Elrington | 1986–1989: Dean Barrow | 1989–1993: Glenn Godfrey | 1993–1998: Dean Barrow | 1998–1999: Richard Bradley | 1999–2003: Godfrey Smith | 2003–2004: Eamon Courtenay | 2004–2008: Francis Fonseca | 2008–2010: Wilfred Elrington | 2010–2012: Bernard Q. Pitts | 2012–2015: Wilfred Elrington | 2015–2017: Vanessa Retreage | 2017–2020: Michael Peyrefitte | 2020–: Magali Marin-Young
1981–1984: C. L. B. Rogers | 1984–1989: Curl Thompson | 1989–1993: Florencio Marin Sr. | 1993–1998: Dean Barrow | 1998–2007: Johnny Briceño | 2007–2008: Juan Vildo Marin | 2008–2016: Gaspar Vega | 2016–2020: Patrick Faber | 2020: Hugo Patt | 2020–: Cordel Hyde
1981–1984: George Cadle Price | 1984–1989: Manuel Esquivel | 1989–1993: George Cadle Price | 1993–1998: Manuel Esquivel | 1998–2008: Said Musa | 2008–2020: Dean Barrow | 2020–: Johnny Briceño