Balázs Taróczy
Balázs Taróczy (* 9. Mai 1954 in Budapest) is en ehmalger ungarsch Tennisspeler.
Sien hööchste Eenzelplatzeeren in de Weltranglist weer Nummer 13. He kunn in sien Karriere 13 Turniere winnen - all up Sandbelag. He is todem Rekordsieger vun dat ATP-Turnier in Amersfoort, wo he söss Mal winnen kunn, dorvan fiev Mal in Reeg.
Sien gröttere Erfolge fier he aber in' Düppel. He wunn all tosommen 26 Titel, dorünner 1981 de French Open, 1985 Wimbledon as ok 1982, 1983 un 1986 dat Düppel Masters (jewiels mit Heinz Günthardt). 1985 reck he ok den 3. Platz in de Düppel-Weltranglist.
He speel 14 Johr lang för de ungarsch Davis-Cup-Mannschap un is Rekordholler vun sien Land in Eenzel un Düppelsiegen. All tosommen hett he 95 Mal för Ungarn speelt un hett dorvan 76 Mal wunnen.
1989 un 1990 weer he Trainer vun Goran Ivanišević, mit de he ok eenig Düppel up de ATP Tour bestreeden hett.
