Lompat ke isi

Rano Karno

Wikipedia Minangkabau - Lubuak aka tapian ilimu
Rano Karno
Lahia8 Oktober 1960 (umua 64)
Jakarta, Indonesia
KawarganagaraanIndonesia
KarojoAktor, politikus, sutradara
Partai politikPartai Demokrasi Indonesia Perjuangan
PasanganDewi Indriati
AnakRaka Widyarma, Deanti Rakasiwi
DusanakRubby Karno, Tino Karno, Santy Karno, Suty Karno, Nurly Karno
Signature

Rano Karno (lahia 8 Oktober 1960; umua 64 taun) adolah saurang aktor jo politikus Indonesia nan manjabek sabagai Gubernur Banten dari taun 2014 sampai 2017. Sabagai aktor, inyo dikana samanjak mambintangi film Gita Cinta dari SMA pado taun 1979.

Biografi

[suntiang | suntiang sumber]

Rano Karno lahia pado tanggal 8 Oktober 1960,[1] anak laki-laki dari aktor senior Soekarno M. Noor nan badarah Minangkabau, barasa dari Bonjol, Pasaman, Sumatra Barat, jo bininyo nan basuku Betawi banamo Lily Istiarti Soekarno. Inyo gadang di daerah Kemayoran, Jakarta Pusat.[1][2] Karano gaji apaknyo saketek, inyo tumbuah dalam kamiskinan. Rano manyabauik bahwasonyo kaluarganyo hanyo punyo ciek piriang untuak maagiah makan limo urang, sarupo jo judul lagu dangdut.[2] Meskipun kaluarganyo bansek, inyo barhasil manamekan sakolahnyo, walaupun harus baimek.[2] Sabagai panghibur, Rano ecok mangunjuangi perpustakaan nan dikalola dek Balai Pustaka untuak mambaco karya-karya sastra klasik Indonesia, tamasuak novel Salah Asuhan karya Abdul Muis jo carito rakyat Malin Kundang.[2]

Kabiasaan mambaconyo mambantu dirinyo mandapek peran partamonyo sabagai aktor.[2] Pado umua sapuluah taun, inyo ikuik audisi untuak produksi film Malin Kundang. Dalam audisi tu, inyo indak satuju jo parubahan jalan caritonyo, dan mangecek ka sutradara kalau "jalan caritonyo indak bantuak itu".[2] Awalnyo, apaknyo indak mandukuang pilihannyo untuak manjadi bintang film karano pakarajoan tu indak akan maubah nasib kaluarganyo.[2]

Satalah Malin Kundang, pado taun 1972 Rano mambintangi film adaptasi novel Si Doel Anak Betawi.[2] Karano film tu laku, Rano ditawaran mambintangi film lainnyo, antaro lain Rio Anakku (1974) jo Di Mana Kau Ibu? (1974).[2] Pado taun 1979, inyo bamain sabagai Galih dalam film nan disutradarai dek Arizal bajudul Gita Cinta dari SMA.[2]

Pado taun 1990, Rano mulai mancubo manyutradarai sinetron, barawal dari sinetron Si Doel Anak Sekolahan. Sinetron iko awalnyo sampek ditulak dek stasiun TV karano terlalu basipek kedaerahan, tapi akhianyo sukses dan taruih diproduksi sapanjang anam musim.[2] Dari taun 2002 sampai 2007, Rano manjabek sabagai anggota Majelis Permusyawaratan Rakyat, kamudian dari taun 2002 sampai 2007, Rano manjabek sabagai UNICEF Goodwill Ambassador, nan mampromosian literasi.[1][2]

Buku partamonyo bajudul The Last Barongsai ditabikan pado taun 2010.[2] Pado taun nan samo, inyo marilis film lain bajudul Satu Jam Saja.[3]

Karier politik

[suntiang | suntiang sumber]

Pado taun 2008, Rano mancalonkan diri sabagai wakil bupati Kabupaten Tangerang, bapasangan jo bupati petahana Ismet Iskandar.[4] Pasangan iko mamanangkan pamilu jo manjabek sampai taun 2013.[4] Sambia manjabek sabagai wakil bupati, Rano taruih aktif di dunia hiburan.[2]

Pado awal 2011, Rano mulai bakampanye untuak manjadi Gubernur Jakarta malawan gubernur petahana Fauzi Bowo. Inyo diusuang dek Partai Demokrasi Indonesia Perjuangan.[5] Maskipun sampek unggul di awal,[5] Rano mambatalkan pancalonannyo sabagai Gubernur Jakarta kamudian mancalonkan diri sabagai Wakil Gubernur Banten, bapasangan jo gubernur petahana Ratu Atut Chosiyah.[6] Pado tanggal 30 Oktober, KPU Banten maumumkan Ratu Atut-Rano Karno mamanangkan pamilu, jo parolehan suara 50%. Inyo mangundurkan diri sabagai Wakil Bupati Tangerang pado patangahan Desember 2011.[4] Rano dilantiak sabagai Wakil Gubernur Banten pado tanggal 11 Januari 2012.[4]

Satalah Ratu Atut ditangkok karano kasus suap, Rano maambiak aliah jabatannyo sabagai Gubernur Banten pado taun 2015.[7] Inyo mancubo mancalonkan diri baliak untuak maso jabatan kaduo pado pamilihan gubernur 2017, tapi kalah dek Wahidin Halim.[8]

Pangharagoan

[suntiang | suntiang sumber]

Pado Festival Film Indonesia 1974, Rano mandapek Piala Citra untuak kategori Pemeran Cilik Terbaik ateh panampilannyo dalam film Rio Anakku. Pado taun nan samo, inyo mamanangkan kategori Aktor Anak Terbaik di Asia Pacific Film Festival untuak film Di Mana Kau Ibu?.[2] Anam taun kamudian, Rano mandapek Piala Citra baliak ateh perannyo dalam film Taksi.[2] Pado taun 1995, inyo maraih pangharagoan Aktor Terbaik jo Sutradara Terbaik untuak sinetron Si Doel Anak Sekolahan.[2]

Kahidupan pribadi

[suntiang | suntiang sumber]

Rano manikah jo Dewi Indriati, nan dikaruniai saurang anak padusi jo saurang anak laki-laki. Inyo adolah kakak dari artis Suti Karno jo adiak dari aktor Tino Karno.[2]

Rujuakan

[suntiang | suntiang sumber]
Catatan kaki
  1. ↑ a b c TokohIndonesia.com, Si Doel, Wagub.
  2. ↑ a b c d e f g h i j k l m n o p q r Hamdani 2010, Indonesian Star Rano.
  3. ↑ The Jakarta Post 2010, Reva thrilled to be acting.
  4. ↑ a b c d Fidrus 2011, Rano quits Tangerang.
  5. ↑ a b The Jakarta Post 2011, Rano Karno and Fauzi.
  6. ↑ The Jakarta Post 2011, Rano Karno to run.
  7. ↑ "Besok, Rano Dilantik Jadi Gubernur Banten di Istana". Republika. 12 August 2015. Diakses tanggal 7 Januari 2024. 
  8. ↑ "Court rejects petition, Wahidin-Halim to lead Banten". The Jakarta Post (dalam bahasa Inggris). 5 April 2017. Diakses tanggal 7 Januari 2024. 
Daftar pustaka

Pautan lua

[suntiang | suntiang sumber]
Diambiak dari "https://min.wikipedia.org/w/index.php?title=Rano_Karno&oldid=3148409"