Gesa de San Fermo Magior
|
Quest articol chì l'è scrivud in lombard, con la Noeuva Ortografia Lombarda |
La Gesa de San Fermo Magior a l'è una gesa de Verona, vuna di quater gese pussee importante de la cità insema al Dom, a la basilega de San Zen e a quella de sant'Anastasia. L'è anca sed de parochia de la diocesi de Verona, in del so vicariad de Verona Center.
Storia
[Modifega | modifica 'l sorgent]La saria nassuda 'me gesa paleocristiana del secol V, dedicada ai martir Fermo e Rustegh, e intorna al secol XI i benedetin la restruturen, e tegnen una gesa sota cont i reliquie di sant e ne fann vuna pussee granda sora: del secol XIII i francescan, ch'eren ben pussee a Verona, otegnen la gesa e 'l so convent, e la restruturen a dàgh un stil pussee gotegh. Cont el temp la deventarà vuna di gese favoride di sciori de Verona per meter sota i so mort.
Del 1757 a l'è dannegiada de 'n esondazzion de l'Ades e se scerniss de menà i reliquie di sant in l'altar magior, inscì che fussen al segur de l'aqua. Cont el rivà del Napoleon i francescan inn casciad via del convent e se retiren in Santa Maria de la Scala: san Fermo la deventa demanial e, dada al cler secolar, parochia e i despoliazzion napoleoneghe colpissen anca lee.
In tra la fin del secol XIX e 'l principi del secol XX a l'è dannegiada de vari event e donca dal 1905 al 1909 a l'è restaverada: in la segonda guerra mondial l'è colpida de una bomba, che la pizza un incendi che 'l toca no el sora in legn.
Architetura
[Modifega | modifica 'l sorgent]
Foeura
[Modifega | modifica 'l sorgent]La gesa l'è mituda vers ocident e l'è a forma de gabanna: in del defoeu se ved la diferenza di materiai in tra la costruzzion veggia, d'epoca romanega, e quella pussee noeuva. Gh'è un campanin, scominciad di benedetin e fornid di benedetin del secol XIV.
Gesa de Sora
[Modifega | modifica 'l sorgent]In la gesa de sora gh'è una navada unega, cont un'aula a forma de retangol: el presbiteri l'è volzad con trii basei, de l'altra banda a gh'è un absid. El tecc l'è fad de sedes cavriade de legn, foeura che per el presbiteri, che 'l gh'ha una volta a crosera cont i quater Evangelista.
Gh'è varie capelle e altar in di bande, dò inn magior e gh'hann una soa autonomia strutural.
Gesa de Sota
[Modifega | modifica 'l sorgent]La gesa de sota la se troeuva de bass e la gh'hà trè nav con di pilaster, che se alternen in tra quadrad e a forma de cros. La nav al center l'è partida a mità de pilaster picinin.
El presbiteri l'è in alt anca lu, volzad de trii basei, e 'l gh'ha trii absid a forma de mez-sercc, cont una Cros de legn del secol XVI.
In di bracc del pseudo-transet gh'è do capelle. L'è tuta quatada de volte in crosera in muradura. In su pared e pilaster gh'è di fresch fad in tra el secol XI e XVI.
Bibliografia
[Modifega | modifica 'l sorgent]- Gian Paolo Marchini, San Fermo Maggiore, Verona, Banca Popolare di Verona, 1981, SBN IT\ICCU\LO1\0456352.
Alter proget
[Modifega | modifica 'l sorgent]Wikimedia Commons el gh'ha dent imagin o alter archivi su Gesa de San Fermo Magior
