Camera
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
'ne Camera is 'n apparaat um beelde mèt vas te lègke, zoewel stèlstaonde beelde (foto's) es bewegende beelde (film). In princiep is 't 'n geslote kas of ruimte, mèt aon eine kant 'n look (leukske) of 'n lens boedoor leech kin valle wat geprojekteerd weurt op de wand aon d'n aandere kant. 't Woord is aofkomstig vaan 't Letiense woord Camera Obscura, wat 'doonker kamer' beteikent. Oersprunkelek woort de camera obscura mèt 'ne matglaze achterwand es hölpmiddel gebruuk door teikeneers en sjèlders. Door de aofbeelding op 't glaas op dun pepier euver te teikene waor me in staot um perspectivisch zjuste teikeninge te make. Pas later woort 't meugelek, door de oetvinding vaan 't chemisch procedé, um echte foto's te make.
Camera's kinne zoewel in 't ziechbaar spectrum wèrke es in aander deile vaan 't electromagnetisch spectrum (beveurbeeld infraroed camera's).
Wèrking vaan de camera
[bewirk | brón bewèrke]Beelde vaslègke
[bewirk | brón bewèrke]Traditioneel camera's 'vaange' 't leech op fotografische film of plaat. Videocamera's en digitale camera's gebruke elektronica, miestal 'ne Charged Coupled Device (CCD) - of CMOS-sensor, boenao 't beeld weurt opgeslage op 'ne magnetische band (tape) of op geheugekaarte in de camera.
Camera's die sequentieel beelde opsloon neume v'r filmcamera's. Camera's die inkel beelde opsloon neume v'r fotocamera's (in 't Ingels ouch wel 'still camera' geneump). Dees twie categorieë euverlappe evels want still camera's weure ouch in de filmindustrie gebruuk veur special effects.
Stereocamera's maak foto's die 3-dimensioneel liekene, doortot twie beelde weure gemaak die gecombineerd zörge veur 'n illusie vaan deepte in 't samegestèld beeld. Stereocamera's höbbe 2 lenze nevenein.
Focus
[bewirk | brón bewèrke]Door de optische eigensjappe vaan fotografische lenze kinne allein veurwerpe op 'ne bepaolde aofstand vaan de lens sjerp (in focus) weure aofgebeeld. De aofstand kin op versjèllende menere weure aongepas. De sumpelste camera's höbbe zoegenaomde fixed-focus lenze. Dit zien groethooklenze mèt 'n klein diafragma, boedoor al op 'nen aofstand vaan zoe'n 3 meter tot ooneindeg redelek in focus is. Dit soort lenze zien vrij goojekoup te make en tröfs te miestal aon in wegwerpcamera's.
De camera kin ouch 'n beperkte focus deepte höbbe. Door 'ne focus-ringk te drejje kin de gebruker zelf 't zjuste focus bepaole. Miestal weurt dat daan aongegeve met gestyleerde symbole wie sjouwers mèt kop, twie lui nevenein, 'ne boum of berg. 't Probleem heibij is tot de gebruker de aofstand zelf vrij nauwkeurig moot insjatte.
Um dit te veurkoume oontwikkelt me de meetzeukercamera. Bove op de camera steit 'n systeem um de aofstand te mete, boenao de lens ingestèld kin weure. Dit weurt later aongepas doortot de lens otomatisch in focus weurt gezat. In Single Lens Reflex (SLR) camera's weurt de compositie en 't focus door de fotograaf middels 't objectief vasgestèld, dewijl in Twin Lens Reflex (TLR) camera's 'n objectief én 'n focus lens weurt gebruuk. Modern camera's höbbe allewijl 'n autofocus systeem die deveur zörge tot 't focus otomatisch weurt vasgestèld.
Beleechting
[bewirk | brón bewèrke]De gruutde vaan 't diafragma en de helderheid vaan de scene bepaole wieväöl leech door de lens vèlt gedoerende 'ne bepaolde tied. De sleter bepaolt wielang deen tied is. Dezelfde compositie kin gemaak weure door de sletertied korter te make en 't diafragmagetal te verkleine of door de sletertied te verlenge en 't diafragmagetal te vergroete.
Bronne
[bewirk | brón bewèrke]Veur d'n teks vaan dit artikel is gebruuk gemaak vaan de Nederlandse en d'n Ingelse wiki.