Penisola de Antartica
La Penisola de Antartica es la parte de Antartica la plu norde. Cada nasion ci esplora la area ave un nome diferente: per Txile, lo es la tera de O'Higgins, per Arjentina la tera de San Martin, per la SUA la penisola de Palmer, e per Britan tera Graham.
La penisola es parte de la penisola plu grande de Antartica ueste, estendente 1300 km de un linia entre Capo Adames e un punto sude de la Isolas Eklund. Su la glasia polal cual covre o, la penisola es composada de un cadena de isolas de roca madral, separada par canales profonda, juntada par un telon de glasia. Tera de Foco, la punto la plu sude de America Sude, es sirca 1000 km distante ultra la Pasaje de Drake. La penisola inclui un cuantia de glasias e scafales de jelo, spesial la Scafal Ronne e la Scafal Larsen.
La penisola ave multe stasiones de rexerca. Nasiones ia declara posese de la area, incluinte declaras supraponente par Arjentina, Txile, e Britan. Multe nasiones suporta la declara par Britan, ma no trata internasional reconose posese.
La penisola es multe montaniosa, e la culminas la plu alta es sirca 2800 metres de altia; la plu alta es Monte Hope, a 3239 m. Esta montes es videda como un continua de la Andes de America Sude, con un cresta sumar liante la du. Esta es la funda per la declaras par Arjentina e Txile.
La tereno de la penisola es tipal tundra antartica. On ave un cuantia de volcanes en la isolas sirca la penisola. Car la Penisola Antartica estende a norde de la Sirculo Antartica e es la parte la plu norde de Antartica, lo ave la clima la plu temperada en la continente. La temperatures es la plu calda en Janero, de 1° a 2°, e la plu fria en Junio, de -15° a -20°.
An si la clima es sever, la penisola ave multe spesies de animales e plantas. En la Mar Antartica, on pote trova balenas, focas, elefantos-de-mar, e multe spesies de pinguines. Esta pinguines es la sola de estas ci usa la tera estra la mar, spesial per reprodui. Avias estra la pinguines inclui petreles, stercoraros, gavotas, sternas, e cormoranes. La nototen es un spesie de pex comun en la Mar Antartica, e es notable per sua capasia per survive en acua fria. Ma cril es la plu comun animal en esta mares.
No multe plantas pote survive la clima de la penisola. Ma mos, licen, e alge pote crese sur la rocas. Du plantas florinte pote ance survive ala: erba capelin antartica (Deschampsia antarctica) e la colobanto (Colobanthus quitensis).
