Democratia
Democratia (de la elinica δημοκρατία, "rena par la popla"), en sua sinifia moderen, ave tre aspetas, tota per un sistem de governa en cual la sitadanes eserse potia par vota En un democratia direta, la sitadanes intera forma la corpo governante, e los vota direta sur cada caso, pe sur la pasa de un lege spesial de imposta. En un democratia represental, la sitadanes eleje representores de entre se mesma. Esta representores asembla per forma un corpo governante, como un lejeria. En un democratia constitual, la potias de la majoria es eserseda en un strutur de un democratia represental, ma la constitui limita la majoria e proteje la minorias, tipa par la promove de diretos individua, pe libria de parla o libria de asosia.
La nonsertia de resultas es inerente en democratia, cual causa de tota fortias debe luta repetente per la reali de sua interesas, cual es como la potia de un grupo de persones devolui a un colie de regulas. Democratia ueste, como distinguida de lo cual ia esiste en sosias premoderne, es jeneral videda como orijina en la site-statos como Atina clasica e la Republica Roman, do scemas variosa e grados de diretos de vota de la popla (mas e libre), ia es atentada ante la forma ia desapare en la ueste a la comensa en cuando acel edas ia cade.
Seguente la siensiste de politica Larry Diamond, democratia es composada de cuatro elementos importante: un sistem political per eleje e recambia la governa par elejes libre e justa; la partisipa ativa de la popla, como sitadanes, en politicas e la vive sivil; proteje de la diretos umana de tota sitadanes; e un rena de leges, en cual la leges e prosedes aplica egal a tota sitadanes.
La terma ia apare en la sentenio sinco aec per nomi la sistemes political cual esiste alora en la site-statos elinica, spesial Atina, per sinifia "rena par la popla", contrastante con aristocratia (ἀριστοκρατία), cual sinifa "rena de un elite". Teorial, esta definas es oposante, ma pratica la distingui ia es istorial neblida. La sistem de Atina clasica, per esemplo, ia dona sitadania democrata a omes libre, e ia escluida sclavos e femes de partisipa. En cuasi tota governas democrata tra istoria antica e moderne, sitidania democrata es composada de un clase elite, asta la permete de vota ia es estendeda a tota sitadanes adulte en la plu de democratias moderne tra la promoves de vota de la sentenios 19 e 20.
Democratia contrasta con formas de governa en cual potia es tenida par un individua, como en un monarcia asoluta o dictatura, o en cual potia es tenida par un cuantia peti de individuas, como en un oligarcia o plutocratia. An tal, esta oposas, eritada de filosofia elinica, es aora ambigua car governas moderne ave elementos miscada democrata, oligarciste, e monarcial. Karl Popper ia defini democratia como contrastante con tirania o autarcia, e donce focante sur la oportunas per la pople per controla sua xefes e per espulsa los sin nesesa un revolui.