Aesir

La aesir (en norsce vea, ǫ́ss, plural æsir; fema ásynja, plural ásynjur) es la membros de la panteon major en la relijio de la popla norsce antica. Esta inclui Odin, Frigg, Tor, Balder, e Tir. La nomes de la tre aesir prima, la frates Odin, Vili, e Ve, refere a states spirital o mental: Vili es la vole o desira consensa, Ve es la santa o spiritosa, e Odin es la manica o estasiante.

La panteon du es nomida la vanir, cual inclui Niord, Frei, e Freia. En la mitolojia, la du grupos gera con lunlotra, cual resulta en un panteon unida.

La terma conaseda en engles vea es os (plural ese), cual refere a cualce dio en la paganisme anglosason; deutx alta vea ave ans (plural ensi); goto ave ance ans; e la protogermanica reconstruida es *ansuz (plural *ansiwiz). La runa ansuz (ᚫ) es nomida per la aesir. La parola norsce vea e engles vea god ("dio") ia es adotada per usa par cristianes, ma os e ass ia desapare de usa relijiosa. Ma lo continua en la forma de la nomes propre de multe locas e persones: Osmund, Oswald, Astrid, e Anselm, e nomes familial como Osgood e Osborn.

Alga studiantes de mitolojia ia sujesta ce la interatas entre la aesir e la vanir refleta la interatas entre clases sosial, o du clanes potiosa. Un otra teoria sujesta ce la vanir (e la culto de fertilia asosiada con los) pote es plu vea ca la aesir, ci ia es asosiada con gera, e ce la contrasta es un esemplo de un desacorda cuasi recordada. La arceolojiste Maria Gimbutas sujesta ce la aesir e la vanir representa la desloca de un grupo nativa a Europa germanica par un tribu gerosa invadente. E la filosofiste de relijio Mircea Eliade sujesta ce la disputa es un varia plu tarda de un mito indoeuropean consernante la desacorda e ultima reintegra de un panteon de dios de tera, economia, e fertilia e un panteon de dios de sielo, gera, e rena.