Menyang kontèn

Perry Como

Saka Wikipédia Jawa, bauwarna mardika basa Jawa
Perry Como
Perry Como during rehearsal, u. 1961
Pratélan latar wuri
Jeneng lairPierino Ronald Como
Lair(1912-05-18)18 Mèi 1912
Canonsburg, Pennsylvania, U.S.
SurudMèi 12, 2001(2001-05-12) (umur 88)
Jupiter Inlet Colony, Florida, U.S.
GénrePop, easy listening
PakaryanSinger, actor
PirantiVocals
Mangsa akarya1932–1997
LabèlDecca, RCA Victor
Sing magepokanFreddy Carlone Orchestra
Ted Weems Orchestra

Pierino Ronald Como (lair ing Canonsburg, Pennsylvania, Amérika Sarékat, 18 Mèi 1912) ya iku penyanyi kondhang ing Amérika Sarékat. Dhèwèké duwé jeneng panggung Perry Como. Saliyané dadi penyanyi, dhèwèké uga dadi aktor TV lan filem. Acara tv Perry Como wis tau disiaraké ing sadonya. Perry Como iki nduwèni suara kang apik lan sipat panglipur saéngga dhèwèké bisa dadi idola masarakat. Dhèwèké bisa dadi penyanyi kang kondhang amaga sipaté kuwi mau. Como bisa suksès ing pagawéyané dadi artis tv, filem, lan penyanyi sawisé Perang Donya II. Sasuwéné dadi penyanyi lan artis kang kondhang, dhèwèké wis bisa olèh pirang-pirang pangaji-aji.[1]

Kauripan

[besut | besut sumber]

Perry Como lair ing Canonsburg, Pennsylvania, Amérika Sarékat. Bapaké jenengé Pietro Como lan ibuké jenengé Lucia Travaglini. Perry Como iki anak kaping pitu saka sepuluh. Perry Como iki dadi anak kaping pisan kang lair ana ing tlatah Amérika amarga sedulur-sedulur sadurungé lair ana ing Itali. Sadurungé pindah menyang Amérika ing taun 1910, bapak lan ibuké Perry Como kuwi asalé saka dhaérah Abruzzese, ya iku salah sawijining kutha kang ana ing Itali.[2] Sanadyan lair ing Amérika Sarékat, dhèwèké ora bisa omongan nganggo basa Inggris amarga nalika ing omah dhèwèké mung omongan nganggo basa Itali karo wong tuwané lan sedulur-seduluré.[3]

Ing Canonsburg, Perry Como nyambi nyambut gawé tukang cukur rambut ngéwangi wong tuwané kawit umur 10 taun.[1] Kawit cilik, Perry Como wis mulai kepincut karo musik amarga bapaké nyekolahaké anak-anaké, kalebu Perry Como, ing sekolah musik. Nalika ana ing sekolah musik, Perry Como uga kepincut kanggo dolanan alat-alat musik kang manéka warna. Dhèwèké nyambut gawé kanggo nambah ragad supaya bisa tetep nerusake sekolah musik. Como luwih bisa nuduhaké kemampuan ana ing alat musik tinimbang swara. Dhèwèké bisa dolanan alat musik kaya ta trombon, gitar, lan organ ing geréja. Ing Canonsburg, Como dadi anggota Italian band karo salah sawijining wong kang dadi langganané nalika nyambut gawé dadi tukang cukur, ya iku bapaké penyanyi Bobby Vinton.[4] Saliyané nduwé mimpi dadi penyanyi lan pemain musik kang kondhang, Como uga nduwèni papénginan dadi tukang cukur paling apik ing kutha Canonsburg.[5]

Perry Como pado ing umur 33 taun karo Roselle Belline lan nduwé anak cacahé telu kang dijenengi Ronnie Como, David Como, lan Terrie Como. Como lan Belline ketemu nalika pikning ing Chartiers Creek, Pennsylvania, Amérika Sarékat.[5] Ing taun 1958, Como lan sakulawarga lunga menyang Itali kanggo mèngeti ambal warsa palakrama ing umur 25 taun palakramané karo Belline. Taun 1971, Como kena musibah ya iku tiba saka panggung nalika rekaman acara Winter Show ing Hollywood.[6] Sawisé kuwi, Perry Como divonis déning dokter kena penyakit kanker kandung kemih ing taun 1993. Taun 1998, Roselle Belline seda ing umur 84 taun ing umur palakramané karo Perry Como kaping 65 taun.[7]

Perry Como séda ing tanggal 12 Mèi 2001 ing Jupiter Inlet Colony, Florida. Dhèwèké séda amarga penyakit Alzheimer. Upacara kaurmatan sadurungé Como dikubur dipimpin déning Imam ing Geréja Katolik St. Edward, Florida. Como dikuburaké ing Riverside Memorial Park, Florida bareng karo bojoné kan wis séda taun 1998 kepungkur.[8]

Karir

[besut | besut sumber]

Musik lan swara

[besut | besut sumber]

Kariré dadi penyanyi dimulai nalika Perry Como lan kanca-kancané lunga menyang Cleveland nonton Freddy Carlone péntas orkèstra. Tamu-tamu kang diundang ing acara kuwi mau kang kira-kira nduwé bakat ing musik utawa nyanyi. Ing kana, Perry Como tampil amarga diundang déning Freddy Carlone. Freddy Carlone ngakon sapa baé kang nduwé bakat ing babagan musik lan swara kanggo nyanyi bareng. Sawisé Perry Como nyanyi bareng Carlone, dhèwèké ditawani Carlone pagawéyan ing Carlone band amarga Carlone kepincut karo swarané Perry Como nalika nyanyi.[9] Como lumebu dadi personél band mung telung taun banjur gabung ana ing orkèstra Ted Weems. Como gabung karo orkèstra kasebut amarga Carlone pracaya yèn Como gabung ing orkèstra kasebut, kariré Como ing babagan swara bisa apik. Nalika kuwi, orkèstra Weems lan Como tanda tangan kontrak lan Como nyambut gawé bareng orkèstra Weems[10]. Sawisé kuwi, vokalis ing orkèstra Weems metu lan diganti karo Perry Como. Perry Como bisa kondhang liwat orkèstra Weems amarga Weems duwé program ing seminggu pisan, ya iku ing radio taun 1936-1937.[11]

Ing sasi Mèi 1974, Como konsèr amal ing London. Konsèr kuwi minangka konsèr kapisan Perry Como kang dianakaké ing njaba Amérika Sarékat. Konsèr kuwi dianakaké déning Variety Club of Britania Raya. Sawisé konsèr kuwi, Perry Como nganakaké konsèr manèh ing Inggris nalika sasi Nopèmber lan sawisé konsèr dhèwèké diundang ing Kedhaton Buckingham kanggo rembugan babagan konsèr kang arep dianakaké ing Inggris nalika musim semi. Sawisé rembugan déning Kedhaton Buckingham, Perry Como banjur ngandharaké yèn dhèwèké arep nganakaké tur konsèr ing Inggris taun 1957 nalika musim semi.[12] Perry Como kerep diundang ing acara-acara resmi, kaya ta ing taun 1984, Perry Como diundang ing Gedhung Putih kanggo nglipur Prèsidhèn Itali wektu iku, ya iku Sandro Pertini. Perry Como uga nglipur Ratu Elizabeth saka Britania Raya nalika Ratu Elizabeth medhayoh ing California.[3]

Filem lan TV

[besut | besut sumber]

Perry Como uga kondhang ing babagan filem. Dhèwèké bisa dadi tokoh Hollywood amarga pepacakané kang bisa nrenyuhaké ati. Amarga pepacakané kang apik ing filem, Perry Como dikontrak 7 taun karo 20th Century Fox nalika taun 1943. Dhèwèké banjur main ing filem-filem kang diprodhuksi déning 20th Century Fox. Fiem-filem kuwi, ya iku Something For the Boys (1944), March of Time (1945), Doll Face (1945)[13], If I'm Lucky (1946), lan Words and Music for Metro-Goldwyn-Mayer (1948).[14]

Saliyané duwé pagawéyan minangka paraga filem, Perry Como uga duwé pagawéyan ing TV. Mulané, ing taun 1948, Perry Como pindhah menyang TV nalika ana siaran program radio NBC ya iku Chesterfield Supper Club. Sadurungé dadi aktor ing acara TV, Perry Como ora bisa dadi awake dhéwe lan nduwèni rasa yèn dhèwèké ora bisa main ing TV amarga biasa main ing filem. Nanging, sasuwéné dhèwèké main ing acara TV, Como dadi biasa lan bisa dadi awaké dhéwe. Taun 1950, Como pindhah menyang CBC lan acara kang biyasané digawakaké déning Como sadurungé ing CBC kuwi diganti dadi jenengé dadi The Perry Como Chesterfield Show. [15]

Biyasané nalika nyambut gawé ing TV, Perry Como bisa dadi pranatacara ing variety show seminggu pisan kaya kang dilakokaké ing NBC TV. Taun 1956, The Perry Como Show diputer ing TV NBC ing New York Ziegfeld Theater. Acara kuwi dadi acara TV warna kaping pisan. Taun 1959, Como dikontrak déning Kraft, ya iku salah sawijining industri panganan ing Amérika. Ing kana, Perry Como duwé acara mingguan ya iku Kraft Music Hall. Taun 1962, Menteri Pertahanan Robert McNamara nduwèni pepinginan yèn Perry Como dadi pranatacara ing acara TV ing pangkalan Angkatan Laut. Taun 1964, Perry Como lan para kru motrèt ing kebon Vatikan kanggo acara Natal Kraft Music Hall. Ing kana, Perry Como tampil bareng karo para penyanyi paduan suara. Dhèwèké padha nyanyi lagu-lagu Natal ing basa latin kang ditulis déning Domenico Bartolucci.[16] Taun 1967, Perry Como ngurangi tawaran acara-acara TV amarga wis akèh tawaran acara TV nalika préi Natal. Acara Natal Perry Como nalika kuwi direkam ing pirang-pirang nagara, ya iku Irlandia, Mèksiko, Kanadha, Amérika Sarékat, lan ing Mekah. Nanging, miturut préntah Perry Como, acara kuwi ora sida disetèl.[17]

Pangaji-aji

[besut | besut sumber]

Sasuwéné dadi penyanyi lan pemain filem kondhang, Perry Como nduwé tanda pakurmatan akèh ing babagan musik lan filem.Taun 1959, Perry Como nampa grammy award kategori wiraswara kanthi pepacakan vokal becik dhéwé. Saliyané kuwi, ing antarané taun 1955 tekan taun 1959, Perry Como nampa Emmy Award limang taun maturut lan nampa uga Peabody Award taun 1956.[18] Como nampa gelar kaurmatan saka Kennedy Center Honor ing taun 1987. Ing taun 1990, Perry Como dilantik ing Academy of Television Arts & Science (ATAS) ing Amérika Sarékat. Akademi kuwi minangka salah sawijining yayasan utawa organisasi kaurmatan kanggo mènèhi pangaji-aji lan tanda kaurmatan déning para seniman kan gawé kemajuan ing industri TV Amérika Sarékat.[5]

Saliyané nampa pangaji-aji lan gelar kaurmatan saka yayasan-yayasan ing Amérika Sarékat, Perry Como uga nampa kaurmatan saka kutha Canonsburg. Para wong kang dedunung ing kutha Canonsburg seneng amarga salah sawijining warga kutha bisa kondhang ing Amérika Sarékat lan ing donya. Perry Como uga dadi bahasan ing artikel-artikel koran lokal Canonsburg. Koran lokal kang ngamot Perry Como ing artikelé ya iku Canonsburg Daily Notes. Artikel babagan Perry Como kuwi ditulis lan dibabar ana ing tanggal 19 Juli 1934. Canonsburg Daily Note kalebu koran lokal kapisan kang ngamot warta babagan Perry Como.[19]

Rujukan

[besut | besut sumber]
  1. ↑ a b Severo, Richard (2001-05-13). "Perry Como, Relaxed and Elegant Troubadour of Recordings and TV, Is Dead at 88". The New York Times (ing basa Inggris Amérika Sarékat). ISSN 0362-4331. Dibukak ing 2020-01-13.
  2. ↑ Graybill, Guy. (2008). Bravo! : greatness of Italian music. Boston: Dante University Press. ISBN 978-0-937832-49-3. OCLC 757989692.
  3. ↑ a b "Rome News-Tribune - Google News Archive Search". news.google.com. Dibukak ing 2020-01-13.
  4. ↑ Grefenstette, Jerry. (2009). Canonsburg. Charleston, SC: Arcadia Pub. ISBN 978-0-7385-6533-0. OCLC 311792649.
  5. ↑ a b c Macfarlane, Malcolm, 1942- (2009). Perry Como : a biography and complete career record. Jefferson, N.C.: McFarland & Co. ISBN 978-1-4766-0024-6. OCLC 681620014.{{cite book}}: CS1 maint: multiple names: authors list (link)
  6. ↑ "Host Perry Como welcomes Mitzy Gaynor and Art Carney". Rome News-Tribune. 1971-12-03. Dibukak ing 2020-01-14.
  7. ↑ Fitch, Antoinette (1998-08-01). "Perry Como's Wife Sings His Praises At 65th Wedding Anniversary". Pittsburgh Post-Gazette. Dibukak ing 2020-01-14.
  8. ↑ Simmons, Scott (2011-02-10). "Fans take pennies to Perry's gravesite in Tequesta". Palm Beach Florida Weekly. Dibukak ing 2020-01-15.
  9. ↑ Fishman, Charles (1992-01-24). "Perry Como". Orlando Sentinel. Dibukak ing 2020-01-16.
  10. ↑ "Perry Como Started Out To Be Barber". Herald Journal. 1951-10-28. Dibukak ing 2020-01-16.
  11. ↑ Dunning, John, 1942-. On the air : the encyclopedia of old-time radio. New York. ISBN 0-19-507678-8. OCLC 35586941.{{cite book}}: CS1 maint: multiple names: authors list (link)
  12. ↑ "Como UK Tour His First Ever". Billboard. 1974-12-07. Dibukak ing 2020-01-16.
  13. ↑ Garrison, Maxine (1945-09-30). "Canonsburg Barber Is Hoofing Now". Pittsburg Post-Gazzete. Dibukak ing 2020-01-16.
  14. ↑ Sasso, Joey (1949-08-27). "Como Believes in Television". Sun Journal. Dibukak ing 2020-01-16.
  15. ↑ Baft, Atra (1955-04-01). "Perry Como SIgns With NBC For One-Hour Show Weekly". Reading Eagle. Dibukak ing 2020-01-16.
  16. ↑ "Perry Como ~ Greatest Christmas Songs liner notes". web.archive.org. 2015-01-20. Diarsip saka sing asli ing 2015-01-20. Dibukak ing 2020-01-16.
  17. ↑ staff, Greg Dawson of the Sentinel. "NO PERRY COMO? SAY IT AIN'T SO". OrlandoSentinel.com (ing basa Inggris Amérika Sarékat). Dibukak ing 2020-01-16.
  18. ↑ "Como, Gleason Win Peabody Award". The Independent. 1956-04-12. Dibukak ing 2020-01-15.
  19. ↑ "Perry Como Meets With Success With Big Park Orchestra". Canonsburg Daily Notes. 1934-07-19. Dibukak ing 2020-01-15.


Dijupuk saka "https://jv.wikipedia.org/w/index.php?title=Perry_Como&oldid=1647907"