Sæmundarhlíð
Sæmundarhlíð er byggðarlag í vestanverðum Skagafirði og liggur meðfram fjallshlíðinni sunnan frá Vatnsskarði út undir Reynistað. Austurmörkin eru við Sæmundará, sem rennur meðfram endilangri hlíðinni og sveigir svo til austurs skammt frá Reynistað. Á landnámsöld virðist Sæmundarhlíðarnafnið hafa náð lengra til norðurs, allt út að Gönguskarðsá. Hlíðin er kennd við landnámsmanninn Sæmund suðureyska.
Nokkrir bæir eru í Sæmundarhlíð. Syðst er Fjall, sem stundum er þó talið með Vatnsskarðsbæjunum, enda liggur vegurinn að Fjalli út frá þjóðvegi 1 í Vatnsskarði en ekki úr Sæmundarhlíð. Þar fyrir norðan er eyðibýlið Skarðsá. Þar bjó á 17. öld annálaritarinn og fræðimaðurinn Björn Jónsson, sem skrifaði meðal annars Skarðsárannál. Ysti bærinn er Geirmundarstaðir. Þaðan er sveiflukóngurinn Geirmundur Valtýsson.
Heimildir
[breyta | breyta frumkóða]- Hallgrímur Jónasson: Árbók Ferðafélags Íslands. Skagafjörður. Ferðafélag Íslands, 1946.
- Hjalti Pálsson (ritstj.): Byggðasaga Skagafjarðar II. bindi. Staðarhreppur - Seyluhreppur. Sögufélag Skagfirðinga, 2001. ISBN 978-9979-861-10-2
