Henry Ford

Henry Ford

Henry Ford (nogbẹ sọn azán gbantọ, Liyasun, owhe 1947) yin anazọnwatọ po ajọwatọ de po, e sọ jẹ gbẹduhun basi ji to owhe 1896, enẹ zọn bọ e dó azọnwhe Ford Motors Company tọn ai. E tẹnpọn bo hẹn ayiha dé wa aimẹ bọ e dó bọawu na ẹn nado nọ basi gbẹduhun lẹ to niyaniya mẹ. Azọnwhe susu lẹ lẹdo aihọn pé gbẹ nọ zan ayiha ehe bọ azọn yetọn lẹ dó nọ ya. Ayiha ehe lọ wazọn na ẹn taun bosọ gọalọna ẹn nado sọgan basi gbẹduhun susu lẹ to ogàn pẹvi de mẹ bọ akuẹ yetọn lẹ sọ nọ wado hugan azọnwhe devo lẹ tọn. E da Clara Bryant bo jivi dopo he nọ yin Edsel Bryant Ford.

Bejẹeji azọnwhe Ford Motors Company tọn

To 1903, Henry Ford do azọnwhe gbẹduhun tọn etọn ai. Àzọnwhe lọ sa gbẹduhun etọn tintan Model T to azán konukunatọ̀ntọ, Liyasun, owhe 1903. E sọ wa lẹzun ògán daho azọnwhe lọ tọn to owhe 1906. To whenuena e jẹ 1908 Ford lẹnpọn dọ emi na tẹnpọn bọ mẹhe tin to Amẹlika lẹ po na tindo gbẹduhun dopodopo bọ mẹde ma na hugan mẹdevo ba. Ẹnẹ wẹ zọn bọ e dó basi gbẹduhun susu Model T tọn, bọ yemẹpo dó sinmẹ dopolọ lẹ, yedọ yuyu. Sọle etlẹ yindọ $850 wẹ gbẹduhun kuẹ lọ, mẹsusu wẹ jlo nado dó gbẹduhun lọ, enẹwẹ zọn bọ gbọjẹ depope ma tin to azọn lọ kọn na ẹn bọ e ka sọ mọ akuẹ ganji.

Pọndohlan etọn gando tonudidọ go

Ford ma yimọ de dó yiwanna tonudidọ, enẹ wẹ zọn bọ to whenuena wẹkẹwhan tintan do wa aimẹ, homẹ etọn ma hùn paali bọ e sọ dọna togan lọ lẹ dọ ganmẹ gu wẹ yé té. E sọ yise dọ Júù lẹ wẹ yin whlepọn na aihọn lọ blebu. Yise ehe wẹ yé nọ ylọdọ Anti-Semitism. To 1919, e yi azọnwhe linlin tọn de bo jẹ linlin zin jẹgbonu ji. E sọ tẹnpọn nado dike na aihọn lọ pete ni yọnẹn dọ Júù lẹ wẹ to whlepọn dọn wa aihọn lọ ji. Enẹgodo e sọ gblewhẹdo akuẹsẹdotẹn Júù lẹ tọn dọ yé lẹ wẹ dọn wẹkẹwhan awetọ́.