Aliivibrio

Aliivibrio é un xénero de bacterias da familia Vibrionaceae. É un xénero de recente creación, onde se incluíron especies que antes estaban encadradas no xénero Vibrio, tal como aconsellaban os estudos xenéticos. O xénero é de ambientes mariños e presenta bioluminescencia.

Etimoloxía

O nome Aliivibrio deriva do latín alius, que significa outro, diferente, e do xénero existente Vibrio, polo que Aliivibrio significa "o outro Vibrio".

Especies

O xénero contén as seis especies seguintes

• A. finisterrensis Beaz-Hidalgo et al. 2010. O nome desta especie refírese a Galicia, onde foi atopada vivindo en ameixas, xa que finisterrensis refírese a finisterra, literalmente o fin do mundo, que era onde no mundo antigo romano se consideraba que estaba en Galicia.
• A. fischeri (Beijerinck 1889) Urbanczyk et al. 2007. É a especie tipo do xénero. O seu nome específico procede do científico alemán Bernhard Fischer, un dos primeiros que estudou as bacterias bioluminescentes. Esta bacteria era moi coñecida polo seu nome anterior Vibrio fischeri, xa que foi moi estudada.
• A. logei (Harwood et al. 1980) Urbanczyk et al. 2007. O nome logei procede do alemán Loge (Loki), nome dun deus nórdico do lume e das trasnadas. Vive en augas frías.
• A. salmonicida (Egidius et al. 1986) Urbanczyk et al. 2007. O seu nome significa que mata salmóns. Vive en augas frías.
• A. sifiae Yoshizawa et al. 2011. A palabra sifiae procede de Sif, o nome dunha deusa nórdica de cabelos loiros, da cor da luminescencia que produce esta especie.
• A. wodanis (Lunder et al. 2000) Urbanczyk et al. 2007. Nome procedente do deus nórdico Wodan (Odín), deus das artes, a cultura, a guerra e a morte. Vive en augas frías.