OINK!
| OINK! | |
|---|---|
| Tipo | Historieta, humor gráfico, didáctica, literatura infantil |
| Nº de páxinas | 48 |
| Cor | 4 cores (a toda cor) |
| Fundación | 2013 |
| Remata | 2014 |
| Empresa editora | Agalip S.L. |
| Director | Marcos Ferreira |
| Editorial | Galicia Ed. S. L. |
| Editor | Ana López |
| Editor asociado | Kiko da Silva |
| Colaboradores | Marilar Aleixandre, Silvia López, Jorge del Oro, Montse Rego |
| Ilustradores | Fernando Iglesias, Miguelanxo Prado, Kiko da Silva, Miguel Porto |
| Lingua | Galego |
| Localidade | Santiago de Compostela |
| Ámbito | Galiza |
| Periodicidade | Mensual |
| Prezo | 3 € |
| [ editar datos en Wikidata ] | |
A revista OINK! foi unha publicación en lingua galega nada en 2013, da que saíron ao mercado cinco números mensuais a un custe de 3 euros. A editora foi a empresa Agalip, de Bertamiráns, con licenza da Televisión de Galicia, estaba dirixida a nenos dos seis aos quince anos, e os contidos baseados no programa Xabarín Club. O 10 de agosto de 2013 foi presentada no salón de banda deseñada Viñetas desde o Atlántico, na carpa dos xardíns de Méndez Núñez na Coruña, asistindo Marcos Ferreira Sanmamed, responsábel da publicación; Rosa Vilas, directora xerente da TVG; Yolanda Sánchez, editora xefa da publicación, e Kiko da Silva, responsábel da banda deseñada. Logo foi presentada tamén no Culturgal dese ano.
Colaboradores
[editar | editar a fonte]
Na iniciativa participaron escritores e autores de banda deseñada como Miguelanxo Prado, Kiko da Silva, Miguel Porto, Fran Bueno, Marilar Aleixandre, Kohell, Victor Rivas, Pinto & Chinto, Miguel Robledo, Jacobo Fernández, e Andrés Meixide entre outros. Miguelanxo Prado foi o autor da capa, ademais de ilustracións interiores.[1] Varios dos autores participaran tamén na revista Golfiño, unha incursión previa do Xabarín na banda deseñada. A revista estaba dirixida por Marcos Ferreira Sanmamed, sendo a redactora xefa da revista Yolanda Sánchez Fidalgo, Ana López López como editora, María Villasó en corrección de contidos; o seu consello de redacción estaba formado por Fátima García Doval e Lucia Castro Díaz. A maquetación facíana Heitor Real Arregui e Oscar Seijas. Colaboraban Silvia López Gómez na sección "Pasatempos" e Jorge del Oro e Montse Rego na sección "Fedellando".
Contidos
[editar | editar a fonte]Presentada cun obxectivo de entretemento alternativo á cultura dos superheroes, con fins didácticos e perspectiva galega e universal. Tamén pretendía recuperar o espírito do Xabarín Club e impulsar novas bandas musicais.
"Nun tempo en que todo o dirixido á rapazada pasa polas factorías das grandes marcas. Cando todo o que se pensa para nenas ten forma de princesa rosa e para nenos forma de superheroe. Agora que os libros, as películas, a roupa e mesmo os iogures están inzados cheos dos mesmos personaxes infantís co único obxectivo de vender, nace algo diferente. Todos eles e elas alimentarán unha revista divertida, dinámica e, aínda que non o noten, educativa. queremos lembrar o que moitas veces esquecemos: os nenos e nenas son capaces de pensar, imaxinar, idear e deseñar cousas incribles. Só fai falla tratalos coma persoas que son e darlles os recursos que precisan para sacar todo ese potencial. Dende Galicia ollaremos para todo o planeta, veremos que acontece en lugares moi distantes, pero tamén pescudaremos a nosa terra. Queremos que a mirada local lles demostre que moi preto deles hai cousas incribles que paga a pena descubrir".[2]
Alén dos novos contidos, recuperáronse personaxes da revista Golfiño, como Fiz de Kiko da Silva, Os Escachapedras, de Marilar Alexandre e Fran Bueno e continuaron outras series.
Número 0
[editar | editar a fonte]Ficha de número e detalle do contido en Tebeosfera:[3] Revista con capa e contracapa a cor, encadernación con grampas e 48 páxinas interiores a cor e encadernación. "Territorio OINK!", presentado por Xabarin, a través dunha ilustración de Miguelanxo Prado, contidos lúdicos e didácticos, e historietas de "As viaxes de Iria", "Os Escachapedras", "Fiz", "Bup & Tap", "Tulpa", "O subterráneo verde do Prof. Sartán", "Legendë", "Mouchos, Catuxas, Sapos e Bruxas", "Tito Longueirón" etc.
Número 1
[editar | editar a fonte]Ficha de número e detalle do contido en Tebeosfera:[4] "Territorio OINK!" con ilustración de Miguelanxo Prado, na que se mostraba o seu personaxe facendo un grafiti (tema dun dos apartados deste número); apartados lúdico, divulgativo e didáctico, coas seccións "Satélite Xabarín", "Pensatempos", "andas na onda?" (Operación Rescate no océano), "A memoria, a Biblioteca dos Recordos" presentada por un dos personaxes da serie de debuxos animados Era unha vez... da produtora Procidis; "Imaxe do mes", bandas deseñadas de varios autores como Pinto & Chinto, Miguel Robledo, e a sección "Aprende a debuxar cómics con Fiz", de Kiko da Silva.
Número 2
[editar | editar a fonte]Ficha de número e detalle do contido en Tebeosfera.[5] Número adicado ao Samaín, coas seccións e colaboradores habituais, ademais de ilustracións de nenos gañadores do concurso "Ollo ao tesouro" do número anterior e da sección "Hai alguén aí?", con preguntas dos rapaces como "E para que serve o embigo?", "Por que os mosquitos lles pican a uns e a outros non?", "Como se fan as teas de araña?" ou "Porque teño cera nas orellas?".
Número 3
[editar | editar a fonte]Ficha de número e detalle do contido en Tebeosfera.[6] Número adicado ao outono, coas seccións e series de BD habituais, e unha sección con descrición de obras que serían representadas en Ourense, como O soldadiño de chumbo (teatro), O Kikirixote, aventuras e desventuras dun galo de curral (monicreques), O príncipe e o parrulo, Ilusionante (ilusionismo), O señor das Dunas (teatro), Don Gelati no teatro (teatro), Amadú (teatro), A historia do Apalpador (monicreques), La vuelta al mundo (teatro).
Número 4
[editar | editar a fonte]Ficha de número e detalle do contido en Tebeosfera.[7] Número adicado ao Nadal, coas series e seccións habituais, e "Novo no cortello!" na que se ofrecía unha mostra de novidades de libros infantís e xuvenís, ilustrados e de banda deseñada, videoxogos, aplicacións para móbiles, e estreas de cine dirixidas á mocidade; unha pequena recensión de cada un, incluíndo o nome da editorial e os seus autores principais, prezo e a idade recomendada etc.
Problemas para a continuidade
[editar | editar a fonte]En xaneiro do 2014, coincidindo coa publicación do quinto número, iniciaron a campaña de mecenado OINK! unha revista para a rapazada galega en Verkami, aínda que en marzo só acadaran uns 8.000 dos 36.000 € que precisaban para continuaren o proxecto.[8][9]
Notas
[editar | editar a fonte]- ↑ "Xabarín - Revista Oink!". Miguelanxo Prado, web oficial.
- ↑ "Nace OINK!, a revista do Xabarín". Bibliopazos blog.
- ↑ "Desglose de contidos do nº 0". Tebeosfera. Consultado o 20-1-2022.
- ↑ "Desglose de contidos do nº 1". Tebeosfera.
- ↑ "Desglose de contidos do nº 2". Tebeosfera.
- ↑ "Desglose de contidos do nº 3". Tebeosfera.
- ↑ "Desglose de contidos do nº 4". Tebeosfera.
- ↑ "Quedan menos de 48h para que finalice a campaña de captación de fondos da revista Oink! en Verkami". Praza.
- ↑ "OINK! Unha revista para a rapazada". Verkami.