Mark van Eeuwen

Mark van Eeuwen
akteur
persoanlike bysûnderheden
echte namme	Mark Willem van Eeuwen
nasjonaliteit	Nederlânsk
berne	23 july 1976
berteplak	Warnsveld (Gelderlân)
etnisiteit	Nederlânsk
reg. identiteit	Nedersaksysk
jierren aktyf	2004 – no
offisjele webside
Mark van Eeuwen op Twitter

Mark van Eeuwen (folút: Mark Willem van Eeuwen; Warnsveld, 23 july 1976) is in Nederlânsk tillefyzje-, film- en toanielakteur en teffens presintator en filmprodusint. Hy waard ferneamd mei syn rol as Jack van Houten yn 'e soapsearje Goede Tijden, Slechte Tijden. Fierders hat Van Eeuwen spile yn û.m. de films Rendez-vous en Kidnapping Mr. Heineken.

Libben en karriêre

Jonkheid en oplieding

Van Eeuwen waard yn 1976 berne yn Warnsveld, by Sutfen, mar brocht syn earste libbensjierren troch yn it Feluwske Beekbergen. Mei tolve jier ferhuze er mei syn âlden en jongere broer Dirk-Jan nei Schijndel, dêr't er fierder opgroeide. Nei't er de middelbere skoalle trochrûn hie oan it Elde Kolleezje yn syn wenplak, studearre er kommersjele ekonomy oan 'e Hegeskoalle fan Utert.

Under syn studintetiid yn Utert wie Van Eeuwen lid fan it Utrechtsch Studenten Corps, dêr't er û.m. aktyf belutsen wie by it Studenten Toneelgezelschap. Doe't er yn Utert syn bachelortitel behelle hie, learde er fierder foar in mastergraad oan 'e Universiteit fan Amsterdam. It wie yn dy tiid dat Van Eeuwen him oanmelde foar de London Academy of Music and Dramatic Arts, dêr't er yn 2004 ôfstudearre.

Karriêre

Aktearwurk

Nei wat figuraasje- en reklamewurk krige Van Eeuwen yn 2004 syn earste echte rol yn 'e dramasearje Bitches. Datselde jiers hied er in lytse byrol yn 'e troch Johan Nijenhuis regissearre spylfilm Snowfever. Yn 2005 bemachtige Van Eeuwen een gastrol yn 'e Ingelske dramarige Mike Bassett: Manager, fan tillefyzjestjoerder ITV. Foar Yorin spile er yn 2004-2005 de rol fan Matthijs van Groningen yn 'e dramasearje Kicken. Yn it foarjier fan 2005 waard er selektearre foar de rol fan Jack van Houten yn 'e RTL4-soapsearje Goede Tijden, Slechte Tijden. Mei dy rol, dy't er fan 2005 oant 2017 fertolke, briek er troch, en dêrtroch wist er ek oar wurk te krijen, lykas in gastrol yn 'e searje Voetbalvrouwen (2007) en in rol yn 'e film De Eetclub (2010). Fierders hied er yn 2015 rollen yn searjes as Dagboek van een Callgirl en Meiden van de Heerengracht.

Yn 2012 die Van Eeuwen mei oan it realitytillefyzjeprogramma Strictly Come Dancing, in dûnswedstryd foar bekende Nederlanners. Op 13 oktober dat jiers wûn er de westryd tegearre mei syn partner, dûnsynstruktrise Jessica Maybury. Yn 'e finale moast er it opnimme tsjin presintatrise Sylvana Simons, dy't doe al wiken foar de ûnbekreaude winneresse holden waard. Van Eeuwen krige lykwols úteinlik de measte stimmen fan it publyk.

Yn novimber 2013 begûnen de opnamen fan 'e histoaryske film Kidnapping Mr. Heineken, oer de ûntfiering fan Freddy Heineken. It wie de Ingelsktalige remake fan De Heineken Ontvoering, út 2011. Van Eeuwen krige yn 'e remake de rol fan ûntfierder Frans Meijer tabedield (dy't yn it Nederlânsktalige orizjineel spile wie troch Teun Kuilboer). De oare ûntfierders waarden spile troch Jim Sturgess en Sam Worthington, wylst sir Anthony Hopkins de rol fan Freddy Heineken op him naam. Yn 'e simmer fan 2014 hie Van Eeuwen fierders de haadrol yn 'e troch Antoinette Beumer regissearre film Rendez-vous, nei de roman mei deselde namme fan skriuwster Esther Verhoef.

Yn july 2015 setten de repetysjes útein foar de musical The Bodyguard, dy't op 27 septimber fan dat jier yn premiêre gie. Van Eeuwen hie dêryn de rol fan liifwacht Frank Farmer (yn 'e oarspronklike film fertolke troch Kevin Costner). Yn 2016 hie Van Eeuwen mei Peaske de rol fan 'e apostel Petrus yn 'e musical The Passion 2016. Yn 2018 spile er de rol fan Wulf yn 'e histoaryske aventoerefilm Redbad, fan regisseur Roel Reiné, oer de achtste-iuwske kening fan de Friezen mei deselde namme. Yn 2020 hie Van Eeuwen in lytse rol as fersetsman Pim den Oever yn 'e oarlochsfilm De Slag om de Schelde, oer de histoaryske Slach om 'e Skelde út 'e einfaze fan 'e Twadde Wrâldoarloch.

Oar wurk

Njonken syn aktearkarriêre hat Van Eeuwen ek wurke as presintator, û.m. yn Vrienden Houden Huis (2008) en Ik Kom bij Je Eten (2009-2010), en as stimakteur yn 'e Nederlânsktalige ferzje fan 'e animaasjefilm Monsters vs. Aliens (2009). Yn 'e simmer fan 2014 produsearre er tegearre mei Beau van Erven Dorens foar Veronica it tillefyzjeprogramma De Vliegende Hollanders. Fierders wie Van Eeuwen ek útfierend produsint foar de Amerikaansk-Kolombiaanske film Blunt Force Trauma (2015), mei yn de haadrol Mickey Rourke, en foar de Nederlânske histoaryske oarlochsfilm De Slag om de Schelde út 2020.

Filmografy

As akteur

Filmografy as akteur
jier	titel	rol of funksje	opmerkings
tillefyzje
2004	Bitches	Patrick	gastrol; 1 ôfl.
2004–2005	Kicken	Matthijs van Groningen	fêste rol
2005–2017	Goede Tijden, Slechte Tijden	Jack van Houten	soapsearje; 810 ôfl.
2005	Mike Bassett: Manager	Ronnie van Needlemans	gastrol; 1 ôfl.
2007	Voetbalvrouwen	Damian	weromkearende rol; 4 ôfl.
2007	Zone Stad	onenightstand	gastrol, 1 ôfl.
2008	Vrienden Houden Huis	n.f.t.	as presintator; op RTL5
2009–2010	Ik Kom bij Je Eten	n.f.t.	as presintator; op RTL4
2012	Strictly Come Dancing	himsels	dielnimmer oan in realitytillefyzjeprogramma by de AVRO; winner fan dûnswedstryd
2014	Rechercheur Ria	Dirk de Groot	gastrol; 1 ôfl.
2015	Dagboek van een Callgirl	Bernard Lansink van Rechteren	weromkearende rol; 2 ôfl.
2015	Bluf	William Fines	gastrol; 2 ôfl.
2015	Meiden van de Herengracht	Billy	gastrol; 1 ôfl.
2016	The Passion 2016	Petrus	tillefyzjespecial y.f.m. Peaske
2016–2022	Flikken Rotterdam	Dries van Weelden	fêste rol; 60 ôfl.
2017	B.A.B.S.	Angus Davidson	weromkearende rol; 5 ôfl.
2017	Roodkapje: Een Modern Sprookje	Scout	tillefyzjefilm foar bern
2017–2018	Familie Kruys	himsels	weromkearende rol; 2 ôfl.
2020	Kerstgezel.nl	Joost	minysearje; 4 ôfl.
2021	Yentl en De Boer: De Serie	stalkingslachtoffer	gastrol; 2 ôfl.
2022	Odds	Fred Joosten	gastrol; 1 ôfl.
films
2004	Snowfever	Dirk
2009	Monsters vs. Aliens	Derek Dietl	as stimakteur by de Nederlânsktalige neisyngronisearring
2010	I Can Fly	Willem van Gent
2010	De Eetclub	Michel Brouwers
2013	App	Sim
2013	Finn	heit fan Erik
2015	Kidnapping Mr. Heineken	Frans Meijer	alternative titel: Kidnapping Freddy Heineken; Ingelsktalige remake fan De Heineken Ontvoering
2015	Rendez-vous	Eric
2016	Sing	Eddie	as stimakteur by de Nederlânsktalige neisyngronisearring
2017	Alles voor Elkaar	Mike
2018	Blijf van Mijn Kind	Teun
2018	Redbad	Wulf
2020	De Slag om de Schelde	Pim den Oever
2020	King of the Road	minister
2022	Stromboli	Karel	ek filmprodusint

As produsint

Filmografy as produsint
jier	titel	rol of funksje	opmerkings
tillefyzje
2014	De Vliegende Hollanders	tillefyzjeprodusint	yn 'e mande mei Beau van Erven Dorens; foar Veronica
2020	Kerstgezel.nl	útfierend produsint	minysearje; 4 ôfl.; ek akteur
2024	De Joodse Raad	tillefyzjeprodusint	minysearje; 5 ôfl.
films
2015	Blunt Force Trauma	útfierend produsint
2019	Colosseum	filmprodusint	koarte film
2020	De Slag om de Schelde	útfierend produsint	ek akteur
2021	Love in a Bottle	filmprodusint
2022	Berenklauw	filmprodusint	koarte film
2022	Stromboli	filmprodusint	ek akteur
2023	Leeuwin	filmprodusint

Keppelings om utens

• (ned) Mark van Eeuwen op Twitter
• (in) Folsleine filmografy fan Mark van Eeuwen yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Artikel oer Mark van Eeuwen op 'e Nederlânsktalige Wikipedy. Commons Wikimedia Commons  Ofbylden dy't by dit ûnderwerp hearre, binne te finen yn de kategory Mark van Eeuwen fan Wikimedia Commons.