Osvaldo Pugliese

Osvaldo Pugliese
Irudi gehiago
Bizitza
Jaiotza	Buenos Aires, 1905eko abenduaren 2a
Herrialdea	Argentina
Heriotza	Buenos Aires, 1995eko uztailaren 25a (89 urte)
Hobiratze lekua	La Chacarita hilerria
Hezkuntza
Hizkuntzak	gaztelania
Jarduerak
Jarduerak	musikagilea eta piano-jotzailea
Jasotako sariak	ikusi Arte eta letren komendadorea
Genero artistikoa	tangoa Argentinako tangoa
Musika instrumentua	pianoa
Diskoetxea	Odeon EMI Philips
Sinesmenak eta ideologia
Alderdi politikoa	Argentinako Alderdi Komunista

Osvaldo Pedro Pugliese (Buenos Aires, 1905eko abenduaren 2a - Buenos Aires, 1995eko uztailaren 25a) argentinar piano jotzaile, musikagile eta orkestra-zuzendaria izan zen. Haren musika ideiengatik, teknika aberastasunarengatik, eta emozioen ñabardura ugari eskaintzeko gaitasunagatik, tangoaren estilista handienetakotzat daukate, batez ere piano-jotzaile gisa.

Bizitza

Ángel D'Agostinorekin lehenbizi, eta Vincenzo Scaramuzzarekin gero, egin zituen musika-ikasketak. 1926an Roberto Firpo taldearekin hasi zen jotzen, 1927an Pedro Maffiaren seikotearekin, eta 1929an Elvino Vardarorenarekin, Aníbal Troilo eta Alfredo Dobbirekin batera, besteak beste. 1934, 1935 eta 1936. urteetan Pedro Laurenz, Roberto Firpo eta Miguel Calóren orkestretan jo zuen, hurrenez hurren. Azkenik, 1939an, bere orkestraren buru jarri zen Nacional de Buenos Aires kafetegian.

1943an lehen diskoa grabatu zuen, "El rodeo" eta "Farol" abestiekin. Kontzertu asko eskaini zituen Argentina eta Uruguaiko kafetegi, irrati, zinema, antzoki eta telebistetan, eta bi kontzertu-bira handi egin zituen bere orkestrarekin, bata 1960an, Sobietar Batasunean eta Txinan zehar, eta bestea 1965ean, Japonian.

Musikagile gisa 1940ko hamarkadan egin zituen obrarik biribilenak: La Yunba (1943), Negracha (1942), Malandraca (1948).

Erreferentziak

• Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.

• Datuak: Q380673
• Multimedia: Osvaldo Pugliese / Q380673