Vai al contenuto

Bauhaus

Da Wikipedia.

C'l artìcul chè 'l è scrit in Miranduléś Emiliàn


«
White on white translucent black capes, back on the rack, Bela Lugosi’s dead, the bats have left the bell tower, the victims have been bled, red velvet lines the black box.»
(EN)(Bela Lugosi’s dead, 1979)
«
Biànc in sal biànc luśènt tabàr négar, la schina in sla róda, Bela Lugosi 'l è mòrt, i papastrèi i aṅ lasâ al campanìl, a 'l vitmi i gh'aṅ tòlt al sangṿ, la casa négra frudàda ad vlu rós.»
(MUD)


I Bauhaus i èṅ un grup muśicàl Post-punk/Gothic rock ingléś ch'al s è furmâ a Northampton in dal 1978. A 'l inìsi i ìvan sarnî al nóm ad Bauhaus 1919, nóm tòlt da la scóla 'd art tedésca fundàda pròpria in dal 1919.

Biugrafìa

Al grup di Bauhaus tòlt śò a Lóndra in dal Favràr dal 2006
Al logo di Bauhaus

Gl'inìsi (1978-1980)

I fradèi Haskins, Kevin (baterìa e percusiòṅ) e David J (bas), i ìvan bèla partecipâ a di prugèt muśicài cuma i Craze o i Submerged Tenth ma sénsa avér dal sucès. A chi lōr a s śònta pò al chitarìsta Daniel Ash ma al ròbi i n càmbian minga par gnint in fiṅ tant ch'i cgnósan la parsòna ch'la cambiarà al destìṅ dal grup: Peter Murphy. Pèla dimóndi śbiàvda cuma un cadàvar, grugn dasquadrâ, còrp da schéltar, màgar cum un ciòld, cavìi drit in sla suca tut négar: un umèṅ cumpàgn al n psiva minga pasàr sénsa èsar vdû da i tri ch'i al sarnìsan cuma cantànt.

Da 'd lè a pôc (Agóst dal 1979) a vèṅ fóra par la cà discugràfica Small Wonder Records al prim sìngul Bela Lugosi's Dead/Boys, na canta ch'la dura da piò ad nóṿ minùt in unór dal famóś atōr ungheréś ad film da scarésa Béla Ferenc Dezső Blaskó, dit Bela Lugosi, ch'al ś véd in sla cupertìna cun di ali da papastrèl.

Murphy al la canta ad parsòna anc dènt'r al film cult ad Tony Scott Miriam si sveglia a Mezzanotte (Miriam la s darséd a Meśanòt dal 1983) mèntar al vampîr David Bowie al diś a la sò cumpàra Catherine Deneuve «A n gh'è mia giàs». La canta la dvénta fiṅ da subìt un sucès in dal discutéchi underground e la s pòrta sèg la mòda p'r i śóvan ad vistìr-as ad négar scultànd cla mùśica lè acsè vilìda e scura.

In dal Nuvémbar dal 1979 i Bauhaus i fìrman pò un cuntràt cun l'etichéta 4AD dla Beggars Banquet e in dal Śnar dal 1980 i faṅ gnir fóra al sìngul Dark entries/Untitled dal stîl post-punk vèrs al dark śvélt e turturâ.

«
He's soliciting on his tan brown brogues (Dark Entries), girating through some lonesome devils row (Dark Entries), pinpointing well meaning upper class prey (Dark Entries), of walking money checks possessing holes (Dark Entries), he often sleekly offers his services (Dark Entries), exploitation of his finer years (Dark Entries), work with loosely woven fabrics (Dark Entries), of lonely office clerks (Dark Entries), any lay suffices his dollar green eye (Dark Entries). I came upon your room it stuck into my head, we leapt into the bed degrading even lice, you took delight in taking down, all my shielded pride until exposed became my darker side.»
(EN)(Dark entries, 1980)
«
'L è drē a 'rciamàr sèg cun i sò scarpòṅ lustrâ ad maròṅ (Vóś Scuri), girànd 'd intóran a di grup ad diàvui da par lōr (Vóś Scuri), butànd bèṅ 'l òć fra 'l vój di óm pîṅ ad bèsi (Vóś Scuri), tulénd pusès di buś di aségn ch'i gìran (Vóś Scuri), lò al śibìs i sò servìsi lusuóś (Vóś Scuri), sfrutànd i sò an più bèi (Vóś Scuri), al lavóra cum a gh pâr di tesû industriài (Vóś Scuri), di impiegâ sulitàri 'd ufìsi (Vóś Scuri), e al sudìsfa tut al puśisiòṅ p'r i sò òć vérd ad sòld (Vóś Scuri). A sòṅ gnû in dla tò cambra, 'l éra cum na fisa, a sém saltâ in sal lèt in mèś a i piōć, a t è piaśû śmuntàr al mè urgój diśarmâ, fiṅ tant che 'l è gnû fóra quél ch'a gh'iva lugâ dèntar ad mè.»
(MUD)
Daniel Ash

Al tèrs sìngul Terror couple kill colonel al dascór 'd un culunèl masâ in dla sò cà par maṅ dna còpia naśìsta. Da cl'atra banda dal disc a gh'è invéci Scopes, un braṅ misterióś ch'a n s capìs gnint.

In dal Setémbar dal 1980 a taca al sò prim tour in di Stat Unî. In cal mèntar a véd la luś la cover di T-Rex Telegram Sam e in Utóbar al prim àlbum dal grup, In the Flat Field (In dal camp tut cumpàgn). In dla cupertìna, in na cambra scura, a ś véd un risulèṅ cavâ śò nûd ch'al sòna un sibiulòṅ. Al disc uriginàl al gh'à dèntar nóṿ pès (fra i quài la title track, Double Dare, Spy in the Cab e Stigmata Martyr) ma in séguit l'è gnuda fóra n'edisiòṅ cun òt braṅ da piò, i tri sìngui precedènt e al sò b-side. Cal disc chè al finìs in di prim pòst dal clasìfichi di lavōr muśicài indipendènt e a 'l 72śum ad quéla uficiàla dal canti pop.

«
In a crucifiction ecstasy, lying cross chequed in agony, stigmata bleed continuously, holes in head, hands, feet and weep for me, stigmata oh you sordid sight, stigmata in your splintered plight, look into your crimson orifice, in holy remembrance, in scarlet bliss. In nomine patri et filii et spiriti sanctum.»
(EN)(Stigmata Martyr, 1980)
«
In n'èstaśi ad crucifisiòṅ, restànd inciuldâ in sla cróś in dal patimènt, al stigmi i bùtar fóra dal sangṿ cuntinuamènt, buś in sla tèsta, maṅ, pē e i piànśan par mè, stigmi oh vuàtar viśiòṅ schifóśi, stigmi in dal vòstri cundisiòṅ in frantùm, dav 'n òć a i vòstar buś crèmas, in di arcòrd sàcar, in dla cuntintésa scarlàta. In dal nóm dal pàdar, dal fiōl e dal spìrit sant.»
(MUD)

I ùltim an insém in di an Utànta (1981-1983)

Peter Murphy

Al sucès dal prim disc al pórta in élt i dū sìngui gnû fóra in séguit. Difàti Kick in the Eye e The Passion of Lovers (ch'i faràṅ part d'l àlbum ch'l éra drē a gnir fóra) i gh la càvan a 'ndar dèntar in di prim ssanta pòst dal clasìfichi ingléśi.

In d'l Utóbar dal 1981 al grup al fà catàr in di negòsi al sò secónd lavōr fat par la nóva cà discugràfica Beggar's Banquet Records, Mask (Mascra), un disc cun dal sulusiòṅ muśicàli nóvi (da 'l dub a la letrònica), cun di strumènt mai druâ prima (tastéri e chitàra acùstica), sénsa però luntanàr-as da 'l stamp dark di inìsi. La cupertìna la nas da un diśégn ad Daniel Ash. 'L àlbum 'l è stâ un sucès, tucànd al pòst 30 in dal clasìfichi dal Régn Unî, cun i dū sìngui vèć e al nóvi Hair Of The Dog, Dancing, Mask (a gh'è un vìddeo ad cla canta chè) e Hollow Hills braṅ ad punta.

«
The man who was mortally wounded in war kept on fighting, the man who was cut to the quick by love kept on loving, the man who was merciless tortured by thoughts kept on thinking, the man who was crippled with concern kept on caring, hair of the dog.»
(EN)(Hair of the dog, 1981)
«
'L óm ferî a mòrt in guèra 'l à cuntinuâ a cumbàtar, 'l óm culpî dûr da l'amór 'l à cuntinuâ a vlér bèṅ, 'l óm ch'l éra turturâ sénsa cumpasiòṅ da i sò pinsér 'l à cuntinuâ a pinsàr, 'l óm ch'l è stâ ruinâ dal sò interès 'l à cuntinuâ a preucupàr-as, bvanda ch'la cura gl'imbariàg.»
(MUD)

Anc al 1982 'l è stâ 'n an fis ad sucès p'r i Bauhaus. In Mars a vèṅ fóra 'l EP Searching for Satori (45śum pòst in clasìfica) mènt'r in Istâ 'l è al tùran di sìngui Spirit e pò Lagartija Nick. Prima ad far gnir fóra al tèrs àlbum The Sky's Gone Out (Al cēl 'l è andâ fóra) in d'l Utóbar dal 1982, al grup al rigìstra na cover ad sucès dal braṅ ad David Bowie Ziggy Stardust (15śum pòst in clasìfica) ch'al pòrta in élt anc 'l àlbum (ch'al finìs drit a 'l quàrt pòst a sò vòlta). Al pès ch'al al vèra (Third Uncle) 'l è na cover a sò vòlta ad Brian Eno mèntar i èṅ dvintâ di clàsic dla banda i braṅ Silent Hedges, Swing The Heartache e la trista The Three Shadows part 2. La versiòṅ su CD, cum al sòlit, la gh'à dèntar anc soquànti b-side cuma la strana Party of the First Part in dua i Bauhaus i faṅ sōl la mùśica, śuntànd-ag dèntar un dascórs fra 'l Diàvul e na dóna ch'la vrév far la cantànta, tòlt diretamènt dal cartòṅ animâ canadéś The Devil and Daniel Mouse dal 1978.

«
Who are you? My card, pretty lady. Devil May-Care Music Production, Beelzebub Scratch, President. I like your style, too bad you're not a singer. Oh, but I am, I am a singer! Hmm, no fooling. No, no listen... Fantastic, different. I want to be a star, of please! You've talked me into it. Contract! Just our standard contract, nothing fancy. Fame, fortune, fans, gold records, concerts, world tours, your name in lights. Take your time, read it all. Oh, I give up. Can I trust you? Ok, I'll sign. Write! Where's the ink? We always use blood, it's more permanent. Oh, I don't know, can't we wait for Dad?»
(EN)(Party of the first part, 1982)
«
Chi siv vò? Al mè bijét ad vìśita, bèla sgnóra. Prudusiòṅ muśicàli Devil May-Care, Presidènt Belzebù Scratch. A m piàś al vòstar stîl, 'l è un pcâ ch'a n sidi minga na cantànta. Oh, ma a'l sòṅ, a sòṅ na cantànta! Hmm, la m tóga briśa in gir. No, no scultàv... Ah ch' lavōr, mai vist un quèl cumpàgn. A vój èsar na star, par favōr! La m à cunvìns. Cuntrat! 'L è sōl al nòstar cuntràt standard, gnint ad chè. Fama, furtùna, amiradōr, disc 'd òr, cuncèrt, tournées mundiàli, al sò nóm in si cartlòṅ, la s tóga al sò tèmp, la 'l lèga tut. Oh, a gh dag sù. Pós-j-a fidàr-um ad vò? Và bèṅ, a fìrum. La scriva! In du è'l 'l incióstar? A druém sèmpar al sangṿ, al gh stà da piò. Oh, a n al sò minga, psém-j-a mia spetàr mè pàdar?»
(MUD)
David J a 'l bas

La prima versiòṅ dal disc la gh'iva dèntar anc al disc dal viṿ Press the Eject and Give Me the Tape (Schisa Eject e dà-'m al nàstar), un lavōr gnû fóra anc par sò cònt in dal 1982 e ch'al mitìva insém al registrasiòṅ di cuncèrt ad Lóndra e ad Liverpool di ùltim dū an. La versiòṅ su CD la gh'à anc siē bonus tracks cuma Terror Couple Kill Colonel e la cover ad Lou Reed Waiting for the Man rigistràda a Manchester al 28 'd Utóbar dal 1981.

«
Terror couple kill colonel in his West German home, three shots from three feet, dragged himself to the phone, terror couple kill colonel, terror couple kill colonel and as he lay there playing games with his pain he felt his choice of jobs, was such a mistake, he could have been a doctor in a soft easy chair instead he chose three stars.»
(EN)(Terror couple kill colonel, 1980)
«
Còpia ad terurìsta la masa un culunèl in dla sò cà in dla Germàgna d'l Òvest, tri cólp da un mètar, al s éra tgnû stric a 'l telèfun, còpia ad terurìsta la masa un culunèl, còpia ad terurìsta la masa un culunèl e mèntar al stava là par tèra śugànd cun al sò dulōr, al sintìva ch'al mistēr ch'l iva sarnî 'l éra stâ un grôs śbali, al sarév psû èsar un dutōr in sna pultróna còmda invéci 'l iva sarnî al tri stéli.»
(MUD)
I Bauhaus tòlt śò dal viṿ in d'l Agóst dal 2006 a Kentish Town

In dal 1983 Peter Murphy al s bèca na palmunìte e 'l è custrét a mulàr al sesiòṅ ad rigistrasiòṅ dal disc nóṿ (al più acùstic ad tut), lasànd spasi a Daniel Ash e David J che acsè i càntan anc in soquànt braṅ.

Al disc Burning from the Inside (Bruśànd ad dèntar) al véd la luś in dal 1983 cun al sìngul sarnî ch'l è She's in Parties. 'N àtar sìngul The Sanity Assassin al farà pò part dla versiòṅ su CD ad cal lavōr chè insém a àtar tri braṅ.

«
The sanity assassin picks off victims like flies, the sanity assassin let his fingers do the walking, the sanity assassin. The crack shot between your eyes, he's got you in his sights, he drops a capsule in your drink and spikes your dreams with madness, the razor in your head, he's the poison in your poison.»
(EN)(The sanity assassin, 1983)
«
Al sasèṅ dal tò equilìbri mentàl al fà fóra al vitmi cuma dal móschi, al sasèṅ dal tò equilìbri mentàl al lasa andàr a far dū pas al sò dida, al sasèṅ dal tò equilìbri mentàł. Al crack al t à tirâ na sćiuptàda in mèś a i òć, al t à tòlt sóta, al mét na pastìja in dal tò drink e 'l inciòlda i tò sógn cun la matéria, al raśōr in dla tò tèsta, 'l è al vlèṅ in dal tò vlèṅ.»
(MUD)

Na vòlta armìs, Murphy al pōl turnàr insém a la banda a far di cuncèrt in Giapòṅ. Subìt dòp i quàtar i vànan in Inghiltéra par la prumusiòṅ dal nóṿ disc ch'al gh la cava a finìr al 13śum pòst in clasìfica. In dal Luj dal stés an però al grup al s mòla lè, dand briśa na spiegasiòṅ dal parchè. A cal punt lè al cantànt al s mét insém a Mick Karn di Japan dand vita a i Dali's Car par pò tacàr na caréra da par lò. Dal cant suo Daniel Ash al taca a sunàr prima cun i Tones on Tail e pò cun i Love and Rockets insém a Haskins e David J.

La riugnòṅ (1998-2008)

Peter Murphy di Bauhaus vistî da Dracula

Durànt al perìud dla separasiòṅ, i vénan fóra soquànti racòlti e dū disc dal viṿ: Swing the Heartache: the BBC Sessions (cun dèntar dal vèci registrasiòṅ fati par John Peel e David Jensen) dal 1989 e Rest In Peace: The Final Concert (cuncèrt rigistrâ a Lóndra in dal Luj dal 1983) dal 1992.

In dal 1998, a quind'ś an da la fiṅ di Bauhaus, al grup al decìd ad met'r-as insém incóra, e a partìs na tournée mundiàla in dua i vénan cantâ dū pès nóṿ: Severance e The Dog's a Vapour. Al prim ad quist dū chè 'l è na cover di Dead Can Dance e la s cata in dal disc dal viṿ Gotham gnû fóra in dal 1999 (in dal versiòṅ live e fata in studi).

A s trata però 'd un fōg ad paja parchè subìt dòp Murphy al cuntìnua la sò caréra da par lò, a part un tour incóra insém in dal 2005 e 2006, cun di disc rigistrâ in sal mumènt par la Instant live.

Sōl in dal Mars dal 2008 i Bauhaus i daṅ a la luś un nóṿ lavōr ad studi, Go away white (Và via biànc), sénsa però far di tour prumusiunài. I pès i èṅ déś, tut incìś in pôc dè, soquànt bèla sintî (Dog's a Vapour la fava part dla compilation Heavy Metal 2000, Adrenalin e Endless Summer of the Damned i éran stadi sunàdi dal viṿ in dal 2006). Al grup al diś però che cal disc chè al sarà 'l ùltim dla sò caréra e che la stòria di Bauhaus la finìs lè.

Mémbar

David J e Murphy
  • Peter Murphy vóś e chitàra
  • Daniel Ash chitàra e vóś
  • David J bas e vóś
  • Kevin Haskins baterìa

Discugrafìa

Àlbum

  • 1980 - In the Flat Field
  • 1981 - Mask
  • 1982 - The Sky's Gone Out
  • 1983 - Burning from the Inside
  • 2008 - Go away white

dal Viṿ

  • 1982 - Press The Eject And Give Me The Tape
  • 1989 - Swing the Heartache: the BBC Sessions
  • 1992 - Rest In Peace: The Final Concert
  • 1999 - Gotham

Racòlti

  • 1983 - The Singles 1981-1983
  • 1985 - 1979-1983
  • 1986 - 1979-1983 Volume 1
  • 1986 - 1979-1983 Volume 2
  • 1997 - Beneath the Mask
  • 1998 - Crackle

Sìngui/EP

  • 1979 - Bela Lugosi's Dead/Boys
  • 1980 - Dark Entries
  • 1980 - Terror Couple Kill Colonel
  • 1980 - Telegram Sam
  • 1981 - The Passion of Lovers
  • 1982 - Kick In The Eye
  • 1982 - Searching For Satori EP
  • 1982 - Ziggy Stardust
  • 1982 - Lagartija Nick
  • 1982 - Beggars Banquet
  • 1983 - She's In Parties
  • 1983 - The Sanity Assassin
  • 2007 - The fona's song

Videografìa

  • 1992 - Archive
  • 1995 - Shadow & Light
  • 1999 - Gotham
  • 2005 - Shadow of Light Archive

Culegamènt estéran

Estratto da "https://eml.wikipedia.org/w/index.php?title=Bauhaus&oldid=134600"