Mark St. John
|
C'l artìcul chè 'l è scrit in
Miranduléś |
Mark Leslie Norton, cgnusû méj c'n al nóm 'd art ad Mark St. John (Los Angeles, 7 ad Favràr dal 1956 - New York, 5 'd Avrìl dal 2007) 'l è stâ 'n chitarìsta hard rock americàṅ, cgnusû prinsipalmènt p'r èsar stâ mémbar di Kiss a i tèmp dal disc Animalize dal 1984 quànd 'l iva tòlt al pòst ad Vinnie Vincent. In séguit 'l à fat part dal grup di White Tiger.
'L è mòrt par n'emuragìa in dal sarvèl quànd al gh'iva sōl sinquànt'un an.
Biugrafìa
Mìstar ad chitàra califurgnàṅ e mémbar di Front Page, Mark al vîṅ cuntatâ da i Kiss in dal 1984 par tōr al pòst dal licensiâ Vinnie Vincent, tgnénd adrē a 'n cunsìli dal custrutōr ad chitàri Grover Jackson ch'al 'l iva arcmandâ. St. John al sòna in òt di nóṿ pès 'd Animalize, al secónd disc dal „Baś“ sénsa truc, e 'l cumparìs anc in dal vìddeo 'd Heaven's On Fire.
La sò stòria c'n i Kiss la dura però pôc parchè a gh salta fóra 'n artrît ch'la gh'impedìs ad sunàr durànt i cuncèrt (al in farà sōl dū) parchè al gh'iva sémp'r al maṅ e i bras infiâ. Paul Stanley al n éra gnanc tant cuntènt ad lò dgénd che durànt al registrasiòṅ d'l àlbum al n éra mai bòṅ ad sunàr par dū vòlti dal part di pès in na manéra cumpàgna. P'r i sò prubléma 'd salùt, Mark 'l è custrét a lasàr al sò pòst a Bruce Kulick in dal Dicémbar dal 1984.
In dal 1985 Mark al dà vita insém a 'l cantànt David Donato a 'n grup ciamâ White Tiger. In séguit al próa a lauràr cun 'l èx baterìsta di Kiss Peter Criss ma 'l ròbi i n vànan mia bèṅ sèg. In dal 1999 al fà vgnir fóra 'n EP, p'r un prugèt ciamâ Mark St. John Project, pò in dal 2003 un disc strumentàl, prima ad sparìr da la séna muśicàla.
La sò mòrt
Al 14 ad Setémbar dal 2006 Mark al finìs par soquànt dè in na parśòṅ dla cuntèa 'd Orange in Califòrgna dòp ch'la pulisìa la gh'iva catâ di strumènt par tratàr la dròga e dòp ch'al s éra anc arvultâ sèg. A 'l inìsi i 'l ìvan mis in un durmitòri dna strutùra par di crìmin minga viulènt ma pò 'l è stâ trasferî in dla caśèrma F-West dòp ch'l iva dit ch'l iva śgranfgnâ dla ròba a 'n àtar parśunēr e ch'l éra in pinsēr par la sò sicurésa. Na guàrdia l'arév pò traplâ a 'l sò spali cuntànt incòsa a 'n grup 'd àtar galeòt dla strutùra ch'in séguit i 'l aṅ piciâ, impinî 'd bòti e pugnalâ cun di àpis. I éran na vintìna a 'l incìrca e, dòp c'l at ad vindéta lè, la sò muróśa la n éra gnan più bòna 'd arcgnós'r-al.
Turnâ lìbar, sénsa psēr far-as curàr da 'n mèdag parchè al n gh'iva minga n'asicurasiòṅ, St. John 'l à tacâ a star mâł e avēr da spés di mâi 'd tèsta e di dulōr a i mùscui. Un sò amìg 'l à dit ch'al n éra più lò, 'l éra finî in depresiòṅ e 'l iva vindû tut i sò vistî par cumpràr-as dla dròga, tacànd anc a śgar l'èrba in di giardèṅ par campàr. St. John 'l è mòrt dòp soquànt méś par n'emuragìa a 'l sarvèl, cauśàda da n'overdose 'd metanfetamìni a dita dal mèdag ch'al 'l à viśitâ dòp mòrt.
Discugrafìa
c'n i Mark St. John Project
- 1999 - Mark St. John Project
- 2003 - Magic Bullet Theory
c'n i Kiss
- 1984 - Animalize
c'n i White Tiger
- 1986 - White Tiger
- 1999 - Raw