Australia

Not to be confused with Australasia, Austrasia, or Austria.

El bandera de Australia.

Australia (oficialmente el Mancomunidad de Australia, English: Commonwealth of Australia) es un soberano estado que ta comprende con el australiano continente, el isla de Tasmania y manada mas chico isla. Australia el mas grande pais por area na Oceania y el aca-6 mas grande pais del mundo. Australia el mas viejo, mas llano y mas seco habitao continente, con el maga menos fertil suelo. Ele un megadiverso pais, y ta conferi el de suyo tamaño con un amplio variedad de maga paisajes y maga clima, con maga desierto na el centro, maga tropical selva na el noreste, maga tropical sabana na el norte y maga montañoso cadena na el sureste.

Ya empeza el maga antepasao del maga australiano aborigen a llega desde el Asiatico Sudeste haca 60,000–65,000 maga año, durante el Glaciacion Würm (Edad de Hielo). Ya asenta ellos na el continente y ya forma con aproximadamente 250 maga distinto lingüístico grupo na el momento del europeo colonizacion, manteniendo con algun maga del maga mas antiguo conocio artistico y religioso tradicion na el mundo. Ya comenza el escrio historia de Australia con el europeo exploracion de Australia. El maga holandes fueron el maga primero europeo conocio na llega a Australia, en 1606. Ya empeza el britanico colonizacion na 1788 con el establecimiento del penal colonia de Nueva Gales del Sur. A maga mediao del aca-19 siglo, explorao por maga europeo colono el mayor parte del continente, y establecio cinco mas adicional autonomo britanico colonia, cada uno obteniendo un responsable gobierno por 1890. Federao el maga colonia na 1901, formando con el Mancomunidad de Australia. Ya continua esto con un proceso de creciente autonomia con respecto al Reino Unido, destacao por el Ley de Adopcion del Estatuto de Westminster de 1942, y culminando na el Acto de Australia de 1986.

Australia es un federal parlamentarista constitucional monarquia comprendiendo con seis maga estado y diez maga territorio. Altamente urbanizao el de suyo poblacion de casi 27 maga millon, y mayoritariamente concentrao na el Costa Este. Canberra el capital del nacion, mientras que el de suyo maga mas poblao ciudad son Sidney, Melbourne, Brisbane, Adelaide (todo na el este) y Perth (na el oeste). Desde el decade 1970 ya promociona el maga australiano gobierno con el multiculturalismo. Culturalmente diverso Australia, y ta tene este pais con uno del maga mas alto poblacion, nacio na el extranjero, del mundo. Crucial al economia del pais el de suyo maga abundante natural recurso y el de suyo maga bien desarrollao internacional comercial eelacion, que ta genere con el de suyo maga ingreso procedente de maga diverso fuente, como el maga servicio, el maga minero exportacion, el banca, el manufactura, el agricultura y el internacional educacion. Na cuanto al maga internacional ranking de Australia, muy favorable este maga ranking para el calidad de vida, el salud, el educacion, el economico libertad, el maga civil libertad y el maga politico derecho.

Ta tene Australia con un altamente desarrollao economia de mercado y uno del maga mas alto ingreso per capita globalmente. Es un intermedio potencia, y ta tene con el decimotercero mas alto militar gasto na el mundo. Ele miembro de maga internacional grupo como el maga Unio Nacion, el G20, el OECD, el Mundial Organizacion del Comercio, el Economico Cooperacion Asia-Pacifico, el Foro del maga Isla del Pacifico, el Comunidad del Pacifico, el Mancomunidad de maga Nacion y el maga organizacion de defensa y seguridad ANZUS, AUKUS y el Cinco maga Ojo. Ele un importante hinde-OTAN aliao del maga Estados Unidos.

Etimologia

Derivao el nombre Australia (pronunciao Plantilla:IPAc-en na el australiano ingles) del latin Terra Australis ("tierra del sur"), un nombre usao desde el antigüedad para un hipotetico continente na el hemisfero sur. Ya usa manada cartografo del aca-16 siglo, pero hinde para identifica con el moderno Australia. Cuando ya empeza el maga europeo a visita y mapea con Australia na el aca-17 siglo, aplicao el nombre Terra Australis al maga nuevo territorio.

Hasta el inicio del aca-19 siglo, mejor conocio Australia como Nueva Holanda, un nombre primer aplicao por el holandes explorador si Abel Tasman na 1644 (na holandes, Nieuw-Holland) y rapidamente adaptao a otro maga idioma. Ocasionalmente usao pa el nombre Terra Australis, por ejemplo na maga cientifico texto del epoca. Ya populariza si Matthew Flinders con el nombre Australia, kay segun ele, este nombre "mas agradable al ojo, y un asimilacion al maga nombre del otro maga gran porcion del Tierra". Ta parece que el primera vez que oficialmente usao el nombre Australia fue na abril de 1817, cuando ya reconoce el gobernador si Lachlan Macquarie con el recepcion del maga carta de si Flinders de Australia de si Henry Bethurst, aca-3 Conde de Bathurst. Na diciembre de 1817, ya recomenda si Macquarie al Colonial Office con el formal adopcion del nombre. Na 1824, ya acorda el britanico Almirantazgo que debe el continente conocio oficialmente por este nombre. El primer oficial publicado uso del nuevo nombre fue The Australia Directory (El directorio de Australia) por el Hidrografico Instituto del Reino Unido na 1830.

Na ingles, ta inclui maga coloquial nombre para Australia con "Oz", "Straya" y "Down Under". Ta inclui otro maga epiteto con "the Great Southern Land" (el Gran Sureño Tierra), "the Lucky Country" (el Afortunao Pais), "the Sunburnt Country" (el Bronceao Pais) y "the Wide Brown Land" (el Amplio Moreno Tierra). Derivao el dos maga ultimo del poem "My Country" de 1908 por si Dorothea Mackellar.

Historia

Véase también: Cronologico de Australia.

Indigena prehistoria

Aborigen rupestre arte na el region de Kimberley de Occidental Australia

Ta comprende el maga indigena australiano con dos maga amplio grupo: el maga australiano aborigen del australiano continente (y el maga circundante isla, incluio Tasmania) y el maga isleño del estrecho de si Torres, un distinto melanesio gente. Estimao que ya empeza el humano ocupacion del australiano continente hace 50,000–65,000 maga año, con el migracion de maga persona por maga puente de tierra y maga corto maritimo travesia desde el actual Asiatico Sudeste. Incierto el numero del maga onda de migracion que ya contribui al este maga antepasao del maga moderno australiano aborigen. Reconocio el rocoso refugio de Madjedbebe na el Tierra de Arnhem como el mas antiguo sitio que ta mostra con el presencia de maga humano na Australia. El maga mas antiguo humano resto incuntrao son el maga resto del lago Mungo, fechao a 14,000 maga año antes del presente.

El aborigen australiano cultura es uno del maga mas antiguo continuo cultura na el Tierra. Na el momento del primer contacto europeo, el maga aborigen australiano fueron maga complejo cazador-recolector con maga diverso economia y sociedad, repartio na al menos 250 maga diferente lingüístico grupo. Ta oscila el maga estimacion del aborigen poblacion antes del britanico colonizacion entre 300.000 y un millón. Ta tene el maga aborigen australiano con un oral cultura con maga espiritual valor basao na el reverencia por el tierra y el creencia en el Tiempo del Sueño.

Ya asenta por primera vez el maga isleño del estrecho de si Torres na el de ellos maga isla hace unos 4.000 maga año. Cultural y lingüisticamente distinto del maga continental aborigen pueblo, ellos marino y ya obtene con el de ellos sustento del estacional horticultura y del maga recurso del de ellos maga arrecif y maga mar. Na algun maga isla, ya desarrolla ademas el agricultura, y ya aparece algun maga pueblo alrededor del aca-14 siglo.

A maga mediao del aca-18 siglo na el norte de Australia, establecio el contacto, comercio y intercultural compromiso entre el maga local aborigen grupo y el trepang del maga macasar pueblo, visitando del actual Indonesia.

Europeo exploracion y colonizacion

Aterrizaje de si James Cook al Bahia de Botany na el 29 de abril de 1770 para reclama con el costa este de Australia para el Reino de Gran Bretaña.

El maga holandes el maga primer europeo na registra con maga avistamiento y toca con tierra na el australiano continente. El primer barco y tripulacion que ya cartografia con el australiano costa y ya contacta con el maga aborigen fue el Duyfken, capitaneao por el holandes navegante si ppWillem Janszoon]]. Ya avista ele con el costa del peninsula del cabo York a maga principio de 1606, y ya aterriza el 26 de febrero de 1606 al rio Pennefather cerca del moderno aldea de Weipa na el cabo York. Mas tarde aquel mismo año, ya navega el español explorador si Luís Vaz de Torres por el maga isla del estrecho de si Torres. Ya cartografia el maga holandes con el totalidad del maga occidental y septentrional costa, y ya nombra con el isleño continente "Nueva Holanda" durante el aca-17 siglo, y masquen hinde realizao ningun intento de permanente colonizacion, ya deja manada naufragio con maga hombre varao o, como na el caso de Batavia na 1629, abandonao por motin y asesinato, ansina que este maga hombre el maga primer europeo na permanente habita na el continente. Na 1770, ya navega y ya cartografia el capitan si James Cook con el costa este, que ya nombra como "Nueva Gales del Sur" y ya reclama para Gran Bretaña.

Tras el perdida del de suyo maga americano colonia na 1783, ya envia el britanico gobierno con un flota de maga barco, el Primer Flota, bajo el mando del capitan si Arthur Phillip, para establecer con un nueva penal colonia na Nueva Gales del Sur. Establecio un campamento e izao el bandera del Reino Unido na Sydney Cove, Port Jackson, el 26 de enero de 1788. un fecha mas tarde convertio na el nacional dia de Australia.

El mayoria del maga temprano colono fueron maga convicto, desterrao por maga menor delito y asignao como maga peon o maga sirviente al maga "libre colono" (inmigrante hinde convicto). Masquen ya asenta el mayoria del maga convicto na el colonial sociedad una vez emancipao, tambien organizao maga rebelion y maga levantamiento de maga convicto, pero invariablemente reprimio este maga bajo el marcial ley. Ya instriga el Rebelion del Ron de 1808, el unico exitoso armao toma del gobierno na Australia, con un periodo de dos maga año de militar gobierno. durante el dos maga siguiente decada, gracias a maga social y economico reforma, junto con el establecimiento de un Legislativo Consejo y un Supremo Corte, ya pasa Nueva Gales del Sur de un penal colonia a un civil sociedad.

Ya disminui el indigena poblacion durante 150 maga año tras el europeo colonizacion, principalmente debio a maga infeccioso enfermedad. Con el expansion del colonizacion, ya muri maga mil de maga indigena na maga guerra de frontera de Australia mientras que desposeio otro maga del de ellos maga tradicional tierra.

Colonial expansion

Port Arthur (Tasmania), un anterior penal asentamiento, es uno de once maga australiano sitio de maga presidio alistao como maga Patrimonio del Humanidad.

Na 1803, establecio un asentamiento na el tierra de si Van Diemen (el actual Tasmania), y na 1813, ya atravesa si Gregory Blaxland, si William Lawson y si William Wentworth con el maga Azul Montaña al oeste de Sidney, abriendo con el interior al europeo colonizacion. Extendio el britanico reivindicacion a todo el australiano continente na 1827 cuando ya establece el Mayor si Edmund Lockyer con un asentamiento na King George Sound (hoy Albany). Establecio el colonia del Rio Swan (hoy Perth) na 1829, evolucionando na el mas grande australiano colonia por area, Occidental Australia. De acuerdo con el crecimiento del poblacion, tallao maga colonia de Nueva Gales del Sur: Tasmania na 1825, Meridional Australia na 1836, Nueva Zelanda na 1841, Victoria na 1851 y Queensland na 1859. Fundao Meridional Australia como un libre colonia, y nunca ya acepta con maga transportao convicto. Ya culmina creciendo oposicion al sistema de maga convicto na el de suyo abolicion na el maga colonia del este para el decada 1850. Inicialmente un libre colonia, ya practica Occidental Australia con el penal transporte desde 1850 hasta 1868.

Ya obtene individualmente el seis maga colonia con un responsable gobierno entre 1855 y 1890, ansina quedando electivo democracia que ya maneja con el mayoria del de ellos maga propio asunto sin deja de queda parte del britanico Imperio. Ya mantene el Colonial Oficina na Londres con el control de algun maga asunto, especialmente el maga exterior asunto.

A maga mediao del aca-19 siglo, ya cartografia tal maga explorador como si Burke y Wills con el interior de Australia. Ya llega un serie de maga fiebre del oro na Australia a un afluencia de maga nuevo migrante de China, America del Norte y continental Europa, ansina como maga brote bushranging y maga civil disturbio; ya alcanza este ultimo al de suyo maximo punto na 1854 cuando ya lanza maga minero de Ballarat con el Eureka Stockade contra el maga tarifa de licencia de oro. Ya mira el decada 1860 con un oleada de blackbirding, particularmente na Queensland, donde na manada situacion forzao el maga isleño del Pacifico na servidumbre por contrato. Durante este periodo, ya servi maga mil de maga australiano colono na el Guerra del maga Tierra de Nueva Zelanda. Ya marca el segunda guerra bóer (1899–1902) con el primer importante despliegue al extranjero del maga colonial fuerza de Australia.

Desde 1886, ya empeza maga australiano colonial gobierno a introduci maga politica llevando al separación de manada aborigen anak del de ellos maga familia y maga comunidad.

Del federacion al maga Mundial Guerra

Véanse también: Federacion de Australia, Australiano ejercito durante el Primer Mundial Guerra y Australiano ejercito durante el Segundo Mundial Guerra.

The Big Picture, un pintura por si Tom Roberts, representando con el apertura del primer Australiano Parlamento na 1901.

Na el 1 de enero de 1901, lograo el federacion del maga colonia tras un decada de planificacion, maga constitucional convencion y maga referendum, ansina establecio el Mancomunidad de Australia como nacion en virtud del nuevo Constitucion de Australia.

Tras el Imperial Conferencia de 1907, ya obtene Australia y manada otro autonomo britanico colonia de poblamiento con el estatus de maga autonomo dominio dentro del britanico Imperio. Australia fue uno del maga fundador miembro del Sociedad del maga Nacion na 1920, y posteriormente del maga Unio Nacion na 1945. Formalmente ya acaba el Estatuto de Westminster con el capacidad del Reino Unido para aproba con maga ley con efecto a nivel del Mancomunidad na Australia sin el consentimiento del pais. Ratificao el Ley de Adopcion del Estatuto de Westminster de 1942, pero antedatao este a 1939 para confirma con el validez del legislacion aprobao por el australiano Parlamento durante el Segunda Mundial Guerra.

Formao el Australianp Territorio del Capital na 1911 como el ubicacion del futuro federal capital de Canberra. Durante el de suyo construccion, ya servi Melbourne como temporal capital de 1901 a 1927. Transferio el Territorio del Norte del control del gobierno de Meridional Australia al federal parlamento na 1911. Ya queda Australia el colonial gobernante del Territorio de Papua (inicialmente anexionao por Queensland na 1883) na 1902 y del Territorio de Nueva Guinea (anteriormente Aleman Nueva Guinea) na 1920. Unificao el dos maga como el Territorio de Papua y Nueva Guinea na 1949 y ya independiza de Australia na 1975.

El bombardeo de Darwin de 1942, el primero de mas de 100 maga japones aereo ataque na Australia, 1942–1943 durante el Segundo Mundial Guerra.

Na 1914, ya uni Australia con el maga Aliao na el Primer Mundial Guerra y ya participa na manada del maga batalla principal librao na el Occidental Frente. Del cerca de 416.000 maga que ya servi, ya muri unos 60.000 y herio otro maga 152.000. Segun ta cree manada australiano, el derrota del maga australiano y neocelandes cuerpo del ejercito (ANZAC) a Galipoli de 1915 fue el "bautismo de fuego" (English: baptism of fire) que ya forja con el identidad del nuevo nacion. Conmemorao anualmente el inicio del campaña na el dia ANZAC, un dia tan importante a Australia como el Dia de Australia.

Desde 1939 hasta 1945, ya uni Australia co el maga Aliao durante el Segundo Mundial Guerra. Ya pelea el Australiano Fuerza de Defensa na el maga Pacifico europeo y Mediterraneo teatro. Debio al choque del derrota de Gran Bretaña na el Batalla de Singapur na 1942 —seguio poco despues por el bombardeo de Darwin y maga japones aereo ataque na Australia, 1942–1943—, ya cree manada australiano que inminente un japones invasion, ansina que ya ocurri un cambio del Reino Unido al maga Estados Unidos como el principal aliao y socio de seguridad de Australia. Desde 1951, aliao Australia al maga Estados Unidos bajo el tratado ANZUS, y mas tarde (2021) el tratado AUKUS.

Maga posguerra y contemporaneo epoca

Posguerra inmigracion a Australia desde Europa. Aqui, maga recien llegao na Australia na 1954.

Na el maga decada posterior al Segunda Mundial Guerra, ya disfruta Australia de maga significativo aumento na el nivel de vida, el libre tiempo y el suburbano desarrollo. Usando con el lema "pobla o perece" (English: populate or perish), ya estimula el nacion con un gran oleada de inmigracion de todo Europa, y denominao tal maga inmigrante como "maga Nuevo Australiano" (English: New Australians).

Un miembro del occidentral bloque durante el Frio Guerra, ya participa Australia na el Guerra de Corea y el Malayo Emergencia durante el decada 1950, y na el Guerra de Vietnam desde 1962 hasta 1972. Durante este tiempo, ya lleva el maga tension, sobre el comunista influencia na el sociedad, a maga fallio intento por el gobierno de si Menzies (1949–1966) para prohibi con el Comunista Partioo de Australia, y un amargo escision na el Australiano Laborista Partido na 1955.

Como resultao de un australiano referendum de 1967, ya obtene el federal gobierno con el poder de legisla con respecto al maga australiano aborigen, y llenamente incluio el maga australiano aborigen na el censo na Australia. Reconocio el maga precolonial interes de tierra (na Australia denominao como maga native title), por el ley, por primera vez, cuando ya dictamina el Supremo Tribunal de Australia, na el Caso Mabo contra Queensland (No 2) (1992), que Australia ni terra nullius ("tierra que hinde ta pertenece a nadie") ni "desertico e inculto tierra" (English: desert and uncultivated land) na el momento del europeo colonizacion.

Tras el abolicion na 1973 del maga ultimo vestigio del poiítica del Blanco Australia, ya transforma el demografia y el cultura de Australia como resultao de un gran oleada de inmigracin hinde europeo, principalmente de Asia. Tambien ya mira el maga final del aca-20 siglo con un enfoque cada vez mayor na maga lazo de exterior politica con otro maga nacion del Cuenca del Pacifico. Ya corta el Acto de Australia de 1986 con los el maga restante constitucional vinculos entre Australia y el Reino Unido mientras manteniendo con el monarca (na aquel entonces, el Reina Elizabeth, el aca-segundo) na el de suyo independiente capacidad como Reina de Australia. Na un republicano referendum de Australia de 1999, ya rechaza el 55% del maga votante con el abolicion del monarquia y el transicion a un republica.

Tras el maga atentao del 11 de septiembre de 2001 contra el maga Estados Unidos, ya uni Australia con el maga Estados Unidos na pelea na el Guerra de Afganistan desde 2001 hasta 2021 y el guerra de Irak desde 2003 hasta 2009. Na el aca-21 siglo, cada vez mas orientao el maga comercial relacion del nacion hacia Oriental Asia, con China como el mayor comercial socio de Australia por un gran margen.

Na 2020, durante el pandemia de COVID-19 na Australia, confinao cuanto el maga mas grande ciudad de Australia durante prolongao periodo, y restringio el libre circulacion a traves del maga nacional y estatal frontera, para trata de frena con el propagacion del virus SARS-CoV-2.

Cultura

Completao el Opera de Sidney na 1973 y declarao como un Patrimonio del Humanidad na 2007, ansina que este el mas joven edificio na recibi con tal designacion.

Ta refleja el contemporaneo australiano cultura con el indigena tradicion del nacion, el anglo-celta herencia del nacion y el mas reciente historia del muilticultural inmigracion a Australia. Tambien influencial el cultura de Estados Unidos. Ya llega a maga distintivo cultural rasgo el evolucion del australiano cultura desde el britanico colonizacion.

Ta identifica manada australiano con el igualitarismo, el compañerismo (na ingles, mateship), el irreverencia y un falta de formalidad como parte del de suyo nacional identidad. Expresao tal maga caracteristica na el jerga de Australia, ademas del comedia de Australia, na manada situacion caracterizao como seco, irreverente e ironico. Ta tene maga nuevo ciudadano y maga titular de visa que comete a "maga australiano valor" (English: Australian values) identificao por el Departamento de maga Interno Asunto como: el respeto al libertad del persona; el reconocimiento del Estado de Derecho; el oposicion al discriminacion por raza, genero y religion; y el comprension del "justo turno" (English: fair go): dicho que ta abarca este ultimo frase con el igualdad de maga oportunidad para todo y el compasion por el maga necesitao. Sin embargo, debatio (desde antes del Federacion) el significancia de este maga valor, y el defensa (o hinde) de ellos por parte del maga australiano mismo, masquen ta refleja esto, siempre, con el vivo debate incuntrao na cualquier libre sociedad.

Arte

Retenio al Museum of Old and New Art na Hobart, Tasmania, inspirao el mural Snake (1970) de si Sidney Nolan por el aborigen mito (del creacion del mundo) del Serpiente Arco Iris, ansina como maga flor del desierto na flor despues de un sequia.

Ta conta Australia con mas de 100,000 maga sitio de Rupestre arte, y ta infundi el maga diseño, patron y tradicional historia con el contemporaneo indigena australiano arte, "El ultimo gran artistico movimiento del aca-20 siglo" (English: the last great art movement of the 20th century) segun el critico si Robert Hughes. Entre el maga exponente de esto hay si Emily Kame Kngwarreye. Ya mostra el maga temprano colonial artista con un fascinación por la desconocio tierra. Durante el periodo previo al Federacion, impulsao maga nacionalista sentimiento por el maga impresionista obra de si Arthur Streeton, si Tom Roberts y otro maga miembro del Escuela de si Heidelberg del aca-19 siglo, el primer movimiento "distintivamente australiano" na el occidental arte. Masquen influencial dicho escuela durante el maga 1900, ya explora maga nuevo artistico tendencia el maga modernista, como si Margaret Preston y si Clarice Beckett, y mas tarde si Sidney Nolan. Ya queda el paisaje central na el trabajo del aborigen acuarelista si Albert Namatjira, ademas de si Fred Williams, si Brett Whiteley y otro maga posguerra artista que ya produci con maga obra, de eclectico estilo pero exclusivamente australiano, que ya oscila entre el figurativismo y el abstraccionismo.

Ya crece con lentitud el literatura de Australia na el maga decada posterior al europeo colonizacion, masquen mucho mas viejo el maga indigena oral tradicion, na manada situacion mas tarde recordao por escrio. Na el aca-19 siglo, ya captura si Henry Lawson y si Banjo Paterson con el experiencia del bush utilizando con un distintivo australiano vocabulario. Popular ba el de ellos maga obra. Considerao el balada del bush "Waltzing Matilda" (Paterson, 1895) como el (hinde oficial) nacional himno de Australia. Si Miles Franklin el tocayo del mas prestigioso literario premio de Australia, otorgao anualmente al mejor novela sobre el australiano vida. Ya gana el de suyo primer recipiente, si Patrick White, con el Premio Nobel de Literatura na 1973. Ta inclui maga ganador del Premio Booker de Australia con si Peter Carey, si Thomas Keneally y si Richard Flanagan. Tambien ya escribi maga australiano publico intelectual con maga seminal obra na el de ellos maga respectivo campo, incluio el feminista si Germaine Greer y el filosofo si Peter Singer.

Surgiendo del escena del pub rock, incuntrao AC/DC na el lista de maga musical artista con maga mayor venta na el mundo.

Na el maga escenico arte, ta tene el maga aborigen gente con maga tradicion de religioso y secular canto, danza y ritmico musica na manada situacion interpretao na maga corroboree. Al principio del aca-20 siglo, si Nellie Melba uno del maga mas importante cantante de opera del mundo, y mas tarde, ya logra internacional reconocimiento tal maga popular musico acto como el maga Bee Gees, AC/DC, INXS y si Kylie Minogue. Ta recibi manada compañia de maga escenico arte de Australia con financiacion a traves del Australia Council for the Arts (ya Creative Australia) del federal gobierno. Hay un sinfonico orquesta na cada estado, y un nacional compañia de opera, Opera Australia, bien conocio por el de suyo famoso soprano si Joan Sutherland. Representao el ballet y el baile por The Australian Ballet y cuanto estatal compañia. Ta tene cada estado con un publicamente financiao compañia de teatro.

Maga medio

Actor interpretando con el bushranger y forejio si Ned Kelly na The Story of the Kelly Gang (1906), el primer largometraje de ficcion del mundo.

Ya impulsa The Story of the Kelly Gang (1906), el primer largometraje de ficcion del mundo, con un boom na el cine de Australia durante el epoca del mudo cine. Despues del Primer Mundial Guerra, ya monopoliza Hollywood con el industria, y para el decada 1960 efectivamente ya cesa el australiano produccion de maga cine. Con el beneficio del apoyo del gobierno, ya trae el nuevo australiano ola del decada 1970 con maga provocador y exitoso pelicula, manada explorando con maga tema de nacional identidad, como Picnic en Hanging Rock, Wake in Fright y Gallipoli, mientras que ya queda maga internacional blockbuster Crocodile Dundee y el serie de pelicula Mad Max del movimiento Ozploitation. Na un cinematografico mercao inundao de extranjero contenio, ya obtene el maga australiano pelicula con una cuota de pantalla del 7,7% na 2015. El maga Premio AACTA el maga principal premio de cine y television de Australia, y ta inclui maga notable ganador del maga Premio del Academia con si Geoffrey Rush, si Nicole Kidman, si Cate Blanchett y si Heath Ledger.

Ta conta Australia con dos maga publico emisor (el Australian Broadcasting Corporation y el multicultural Special Broadcasting Service), tres maga cadena de comercial television, cuanto servicio de television de pago, y numeroso publico estacion de radio y television sin animo de lucro. Ta tene cada importante ciudad con al menos un diario periodico, y hay dos maga nacional diario periodico, The Australian y The Australian Financial Review. Na 2020, ya clasifica maga Reportero Sin maga Frontera con Australia como aca-25 na un lista de 100 maga pais arreglao por el libertad de prensa, detras de Nueva Zelanda (aca-8) pero frente al Reino Unido (aca-33) y el maga Estados Unidos (aca-44). Esta relativamente bajo clasificacion debio al limitao diversidad del; propiedad del maga comercial medio na Australia; ta controla News Corporation (59%) y Nine Entertainment (23%) con el mayoria del maga impreso medio.

Gastronomia

Maga vino de Meridional Australia.

Ya subsisti el mayoria del maga grupo de maga indigena australiano na un dieta de caza y recoleccion de maga nativo flora y fauna, tipicamente llamao bush tucker. Ya aumenta el de suyo popularidad entre maga australiano hinde indigena desde el decada 1970, con maga ejemplo como Backhousia citriodora, Macadamia spp. y el carne de canguro ya ampliamente disponible.

Ya introduci el primer maga colono con el gastronomia del Reino Unido e Irlanda al continente. Visible este influencia na tal maga plato como el fish and chips, y na el torta de carne, relacionao con el torta de filete de Bretaña. Tambien durante el colonial periodo, ya allana el camino el maga chino inmigrante para un distintivo austaliano chino cocina.

Ya transforma el maga migrante de posguerra con el gastronomia de Australia, trayendo consigo el de ellos maga culinario tradicion y contribuyendo a maga nuevo tipo de cocina fusión. Ya introduci el maga italiano con el cafe expreso y, junto con el maga griego, ya ayuda ellos a desarrolla con el cultura de cafe de Australia, donde considerao ya el flat white y el avocado toast o "smashed avo" como maga basico alimento de Australia. Ademas considerao como maga iconico australiano comida el tarta pavlova, el lamington, el Vegemite y el Anzac biscuit.

Australia un lider exportador y consumidor de vino. Producio el vino de Australia mayoritariamente na el maga sureño y mas frio parte del pais. Tambien ta consumi Australia con mucho cerveza, y ta anfitriona cada estado y territorio con manada cerviceria.

Deporte y recreacion

El Melbourne Cricket Ground fuertemente asociado con el historia y desarrollo del criquet y el australiano futbol, el dos maga mas popular deporte de Australia para maga espectador.

El criquet y el australiano futbol el maga predominante deporte na Australia durante el maga mes de verano e invierno, respectivamente. Australia unico na el sentido de que ta tene ele con maga profesional liga para cuatro maga codigo de futbol, cuya relativo popularidad dividio geograficamente. Originario de Melbourne na el decada de 1850, el australiano futbol el mas popular codigo na todo el maga estado salvo Nueva Gales del Sur y Queensland, donde ta domina el rugby league, seguio por el rugby union. Masquen ta ocupa ele con el cuarto lugar na popularidad y maga recurso, ta tene el futbol con el maga mas alto tasa de general participacion. Popular el criquet a traves de todo el maga frontera, y considerao por manada australiano como el nacional deporte. Ya compiti el seleccion de criquet de Australia contra Inglaterra na el primer partio de prueba (1877) y el primer One Day International (1971), y contra Nueva Zelanda na el primer Twenty20 International (2004), ganando con el tres maga partio. Tambien ya participa na cada edicion del Mundial Copa de Criquet, ganando con el torneo un record de seis maga vez.

Australia es uno del cinco maga nacion que ya participa na todo el maga Olimpico Juego de Verano del moderno era, y ya anfitriona dos maga vez con el maga Juego: 1956 na Melbourne y 2000 na Sidney. Tambien preparao para anfitriona con el maga Juego de 2032 na Brisbane. Tambien ya participa Australia na cada edicion del maga Juego del Mancomunidad, anfitrionando con el evento na 1938, 1962, 1982, 2006 y 2018. Ademas de un regular participante na el Mundial Copa de Futbol del FIFA, ya gana Australia con el Copa del maga Nacion del OFC cuatro maga vez y el Asiatico Copa una vez — el unico pais que ya gana con maga campeonato na dos maga diferente confederacion del FIFA

Ta inclui otro maga gran internacional evento celebrao na Australia con el Abierto de Australia, parte del torneo Grand Slam de tenis, y el Gran Premio de Australia de Formula Uno. Tambien ta atrae intenso interes el anual carrera de maga caballo del Copa de Melbourne, ademas del regata de maga yate de Sidney a Hobart. Tambien notable Australia para maga acuatico deporte, como el natacion y el surf. Originario de Australia el movimiento de salvamento de surf, y el voluntario salvavidas es uno del maga icono del pais. Na cuanto al maga deporte de invierno en Australia, ta ocurri este maga primariamente na el maga Australiano Alpe y na Tasmania.

Mira tambien

• Indice de maga articulo relacionao con Australia
• Resumen de Australia