Õ

õ

Õ (Majuskl) oda õ (Minuskl) is a Buagschdåb dea ausn lådainischn O mid da Tildn zãm gsézt is und in faschidane Schbråchn fia faschidane Foném fawent wiad. Im Boarischn schded dés O mid da Tildn oft fia a nasals O.

Da HTML-Code is Õ fia s'grose Õ und õ fia s'klõane õ. Mid da Dastnkombinazion ALT+0245 griagt ma a a klõans õ.

Dialekt

Wãn ma d'boarischn Dialekt fu Ésdareich und Bayern schreim wü, in dénans an Haufn nasale Vokale gibt, muas ma si iwaléng wia ma dé Laute im Gschriwanen widagém wü. S'nasale O wiad déswéng in da Dialektlitaratua oft mid da Tildn gschrim, zan Baischbü in "Mõ" fia hochdeitsch "Mann" oda "õana" fia hochdeitsch "einer". A auf Boatugisisch wiad dés Zaichn genau so fia a nasales O fawent.

Es gibt åwa kõa schdandardisiate Schreibwais fia s'Boarische und déswéng schreibt a da õane aso und da ãndane wida ãndas. Da wichdigsde Grund, warum si dé Markiarung fu nasale Vokale mid da Tildn nu néd aso duachgsézt håd, is wai ma auf da deitschn Dasdatua dé Zaichn néd drauf håd und dén Bugschdåm néta iwa n'ASCII-Code âigém kã oda mid söwa gmåchde Shortcuts.

Boatugisisch

Im Boatugisischn schded da Bugschdåb õ fia'n nasaln Vokal O. Dea Laut glingt umara aso wia da französische Vokal im Woat "pont". Im Intanazionaln Fonetischn Alfabet, a ois Lautschrift bekãnt, schreibt ma dén Laut a mid [õ]. Dés nasale o kimd im Boatugischischn oiwai doatn fia, wo fum Latein hea a N faloan gгnga is und dés o dafoa so nasal woan is. Dea Bugschdåb wiad nia am Ãfãng fu am Woat gschrim.

Am éfdastn siagt ma dés õ im Boatugisischn in da Kombinazion "ões", wås bai fü Pluaralfoamen fu Substantif fia kimd - zan Baischbü: balões (Båin), informações (Infoamazionen), patrões (Schefs), nações (Nazionen).

Estnisch

Im Estnischn is as Õ der 27sde Bugschdåb fum Alfabet. Ea schded fia an Laut zwischn W und E. In da Linguisdik sågt ma a, dés estnische Õ schded fian ungrundetn håiwadgschlossenan Hintazungenvokal.

Fia dés Foném håd ma fria õafåch a Ö gschrim, bis im frian 19tn Joahundat da Otto Wilhelm Masing (1763-1832) dés O mid da Tildn in d'estnische Schrift âigfiad håd, damid dé zwoa Laute a im Gschriwanen zan ausanãnda kena han. Baim SMS-schreim, baim Tschetn und baim e-Mail schreim, wos oft kõane Sondazaichn gibt, håd si in Estlãnd in lézda Zeid âibiagat, das ma schdåd an Õ a õafåch an 6a schreibt, oda a ö.

Vietnamesisch

In da vietnamesischn Lådainschrift schded s'Õ fia n'Laut [o], dea mid ana knaksadn Schdim grét wiad. Dés is a aufschdaigada Don mid am glotaln Faschlus und glai drauf an waida hécha weadadn Don. In da IPA-Schreibwais schreibt ma dafia a [o̰].

Aufbassn

In Bugschdåb Õ deaf ma néd mim ungarischn Ő fawegsln, wås a O mid zwoa Akzent oda Schdrichal is (Dopiakü). Dés Õ mid da Tildn gibts im Ungarischn goa ned. In mãnche Schriftoatn, zan Baischbü a in dea wås då in da Wikipedia fawent wiad, schaun åwa dé zwoa Zaichn komplet glaich aus und ma siagt kõan Untaschiad, wai oi zwoa de Zaichnkods ISO 8859-1 und ISO 8859-2 oda a Windows-1252 und Windows-1250 fawendn.

Im Netz