Sinanglay
An sinanglay (inaapod man na pikadilyo) sarong lutò nin sirâ sa ginutaan na popular sa Rehiyon Bikol. An pwedeng sanglayon iyo an tilapia, talusog o karpa alagad ini ugaring madugi. An kaibahan kaini sa ibang mga ginutaan iyo ta sinosoksokan an tulak kan sirâ nin dakul na giniris na kamatis dangan pinapasiram pa ta may salak na mga bawang, sibulyas asin làya. Pinapatos ini kan dahon nin natong o petsay.
Pangaran
[baguhon | baguhon an source]Gikan sa tataramon na "sanglay" an pangaran kan lutong Bikolnon na ini.[1] Mantang an "pikadilyo" gikan man sa tataramon na Espanyol na picadillo.[2]
Pag-andam
[baguhon | baguhon an source]Sa pagluto kaini: badion ngùna an mga sirâ. An paghilap bako sa tulak kundi sa may talodtod nya magpoon. Maggutâ kan niyog. Sa pinakalipotok iramas an mga giniris na kamatis, làya, sibulyas asin bawang na inasinan sagkod na magnamit. Sa lambang binadì, isoksok an mga giniris tapos tiklopon saka patoson sa dahon natong. Bugkoson kan kinunit na dahon batag na linobloban ngani syempre dai magburuka.
An kaserola o kaldero talapitapan nin dahon natong o kan mga paklang sa irarom kaini ngarig dai matotong an linuluto. Ikaag na an mga binurugkos na mga sira sa kaserola. Ikaag naman an ikaduwang ginuta' abot o sayaw sa langkaw kan sinuruknong na sira. Kaagan giraray nin diit na asin sagkod na magnamit.
Kun gustong dakul an mga gulaygulay, ibabaw an abot sa sampolong dahon nin natong asin seguruhon na maguta' ngani manamit na maray an mga natong. Lutoon na sagkod na maglomoy.
Kataytayan nin mga ladawan
[baguhon | baguhon an source]-
An itsura kan kiniskisan na puyo na ginagamit sa pagluto kan pikadilyo o sinanglay
-
An itsura kan talusog na gamit sa pagluto nin sinanglay
Toltolan
[baguhon | baguhon an source]- ↑ Joram Paul Bag-ao Jabonillo. Pagkaong Binol-anon: A Preliminary Study of Boholano Culinary Linguistics p. 27
- ↑ pikadilyo. Mintz, Malcolm W. Bikol Dictionary. Volume II. Bikol-English Dictionary. Uniprint. Perth, Western Australia. 2004. p. 789. ISBN 0 9580383 5 X
