Uslandschwiizer-Organisazion

D Uslandschwiizer-Organisazion (ASO) isch e Stiftig, wo für d Inträsse vo de Schwiizer und Schwiizerinne luegt, wo noch dr Uswanderig us dr Schwiiz imene andere Land vo dr Wält, ebe im «Usland», läbe.

D Organisazion isch ane 1916 vo der Neue Helvetische Gsellschaft gründet worde. Si isch d Kontaktstell vo mee als 750 Schwiizerveräine und schwiizerische Instituzione uf dr ganze Wält. Au für die politische Behörde vo dr Schwiiz isch si als Informazionswäg für d Uslandschwiizer wichtig. Das sind rund 778'000 Persone mit em Bürgerrächt vo dr Schwiiz, wo für ne gwüssi Zyt oder für immer vo dr Heimet wägg ines anders Land ggange sind.

D ASO het als hauptsächlechs Organ dr Uslandschwiizerroot und für d Verwaltigsufgabe es Sekretariat, wo z Bärn isch. Si publiziert sächs Mol im Joor d Zytschrift «Schweizer Revue», wo i föif Sprooche erschynt und i 380'000 Exämplar trukt und a d Schwiizer i allne mögleche Länder verschikt wird.

Für d Schwiizer im Usland leistet d Uslandschwiizer-Organisazion Hilf, wenn s um rächtlechi Froge im Land, wo si hi uswandere, goot, oder au wenn öper noch em Ufenthalt i dr Frömdi wider i d Schwiiz möcht zrugg cho.

Jedes Joor organisiert d ASO inere Gmeind i dr Schwiiz dr Uslandschwiizer-Kongräss. Ane 2016 het si under em Motto «D Schwiiz – e Deil vo dr Wält» z Brunne im Kanton Schwyz, wo sid 1991 am Ufer vom Vierwaldstättersee es Dänkmol ufem «Uslandschwiizer-Platz» stoot,^[1] iry Hundertjoor-Fyr und z Bärn dr Jubiläumskongräss duregfüert.^[2] Am Kongräss 2017 z Basel het dr Bundesroot Alain Berset betont, wie wichdig d Uslandschwiizer für d Schwiiz und für d Wält sind, und er het dervo prichtet, ass bi de Volchsabstimmige vom Septämber 2017 d Uslandschwiizer scho vo acht Kantöön elektronisch über s Internet chönd deilnää.

Weblink

Fuessnoote

↑ Website füre Uslandschwiizerplatz
↑ D Schwiiz – Deil vo der Wält uf aso.ch

[1] Website füre Uslandschwiizerplatz

[2] D Schwiiz – Deil vo der Wält uf aso.ch

[1]

[2]