Timothy Eaton
Timothy Eaton | |
|---|---|
 | |
| Gebore | Maart 1834 |
| Sterf | 31 Januarie 1907 |
| Beroep | Entrepreneur |
| Bekend vir | Stigter van T. Eaton Co. Ltd. |
| Eggenoot | Margaret Wilson Beattie |
| Kinders | Vyf seuns, drie dogters |
| Ouer(s) | John Eaton Margaret Craig |
| Geloof | Metodisme |
| Handtekening | |
 | |
Timothy Eaton (* Maart 1834 in Clogher naby Ballymena, graafskap Antrim, Ierland; † 31 Januarie 1907 in Toronto, Kanada) was 'n Kanadese sakeman van Presbiteriaanse Ulster-Skotse afkoms wat bekendheid verwerf het as die stigter van T. Eaton Co. Ltd., Kanada se grootste afdelingswinkelketting wat op sy hoogtepunt winkels dwarsoor die land bedryf en kantore in oorsese wêreldstede soos Londen en Parys geopen het.[1]
Eaton was die vierde seun van John Eaton, 'n pagboer in Ulster (tans Noord-Ierland) en sy vrou Margaret Craig. Nadat hy 'n opleiding as verkoper in 'n Ierse winkel ontvang het, het Eaton sy twee ouer broers gevolg en hom in 1854 in Kanada gevestig waar hy 'n tyd lank in 'n winkel in Bo-Kanada gewerk het. Twee jaar later het hy saam met sy broer James 'n klein winkel in Kirkton, 'n nedersetting in die Huron Tract-streek van Suidwes-Ontario, geopen. Die onderneming is in 1860 na St Mary's naby Stratford verskuif.
Eaton was bewus van die omwenteling wat in die destydse kleinhandelbedryf aan die gang was en vol van idees hoe hy self voordeel kon trek uit dié veranderinge. In 1869 het hy sy eie winkel op die sidwestelike hoek van Yonge- en Queenstraat, Toronto geopen waar hy 'n reeks nuwe verkoopmetodes met sukses ingevoer het, waaronder verkope teen vaste pryse en kontant in teenstelling met ouer handelspraktyke waarin kredietkope, ruilhandel en prysonderhandelinge 'n sentrale rol gespeel het.
Sy tweede doelwit was om die diensvoorwaardes en werksomstandighede van sy personeel te verbeter. In die laat 1880's was vaste sluitingstye om ses uur saans tussen Maandag en Vrydag en teen middag op Saterdae reeds 'n vaste instelling in Eaton se onderneming. Hy het daarnaas vir 'n aangename werksomgewing met soveel as moontlik natuurlike lig en vars lug gesorg.
In 1884 het Timothy Eaton begin om sy handelsware ook per katalogus te bemark sodat bewoners van afgeleë boerderygemeenskappe vir die eerste keer toegang tot 'n wye verskeidenheid verbruikersgoedere gekry het. Binne enkele jare was Eaton se katalogusse in die meeste Kanadese huishoudings te vinde. Toe Eaton in 1907 in die ouderdom van 72 in Toronto oorlede is, het sy handelsonderneming meer as 9 000 werknemers in sy winkels in Toronto en Oshawa in diens gehad. Dwarsoor die wêreld is kantore gevestig om goedere in te koop.
In die laat 20ste eeu het Eaton's se bestuur moeilikhede ondervind om betyds by nuwe ontwikkelinge in die kleinhandelsbedryf aan te pas en in 'n veranderde ekonomiese klimaat op koers te bly, terwyl ook wanbestuur 'n rol by die onderneming se agteruitgang gespeel het. In 1999 het Kanada se suksesvolste kleinhandelreus bankrot gespeel.
Verwysings
[wysig | wysig bron]Normdata  |
|
|---|