The American Heritage Dictionary of the English Language

The American Heritage Dictionary of the English Language (kort AHD) is 'n Amerikaanse woordeboek van die Engelse taal wat deur die Bostonse uitgewery Houghton Mifflin Harcourt (HMH) gepubliseer word. Sy samestelling het voortgespruit uit 'n geskil oor Webster se Third New International Dictionary. Die eerste uitgawe het in 1969 verskyn, die mees onlangse vyfde uitgawe in 2011. Die 2011-uitgawe is intussen hersien en drie keer herdruk, in 2012, in Maart 2016 en in Oktober 2018, met 'n omvang van 2112 bladsye.^[1]

Geskiedenis

James Parton, die redakteur en mede-eienaar van die geskiedkundige tydskrif American Heritage, was ontsteld oor die beweerde permissiewe benadering tot taalgebruik in die derde uitgawe van Webster se woordeboek van die Engelse taal wat in 1961 gepubliseer is. Ná 'n vergeefse poging om die betrokke uitgewery, Merriam-Webster, oor te neem om sodoende die woordeboek se inhoud volgens sy eie beginsels reg te stel, het Parton 'n kontrak met Houghton aangegaan om 'n nuwe woordeboek van Engels saam te stel.

Die AHD is uitgegee en geredigeer deur die leksikograaf William Morris wat in 1947 bekendheid verwerf het met sy klein woordeboek Words, en 'n gebruikerspaneel van 105 persoonlikhede soos skrywers, redenaars en ander bekendes wat vir hul behoudende taalgebruik bekendgestaan het. Morris het nogtans net willekeurig gebruik gemaak van dié paneel en dikwels eerder sy eie standpunt en siening oor taalkundige sake by die samestelling van die woordeboek laat invloei as om na die advies van ander deskundiges te luister.^[2]

Taalkunde

Die AHD was die eerste woordeboek waarvoor taalkundige inligting soos woordfrekwensies in literêre en ander tekste met behulp van korpustaalkundige metodes verkry is. Nóg 'n vernuwende stap was die kombinasie van preskriptiewe inligting (advies oor die juiste taalgebruik) en deskriptiewe inligting (verwysing na voorbeelde van taalgebruik na aanleiding van geskrewe tekste).

Aanhalings is saamgestel volgens 'n databasis met een miljoen woorde en aanhalings wat oor drie reëls gestrek het, soos saamgestel deur Henry Kučera, 'n taalkundige van die Brown-universiteit te Providence, Rhode Island.

Gebruikerspaneel

Vir deskundige advies oor taalgebruik, insluitende omstrede of problematiese konstruksies, is 'n paneel saamgestel. Dit bestaan in sy huidige vorm uit naastenby 200 persoonlikhede uit 'n verskeidenheid beroepe waar korrekte en gevoelige taalgebruik vereis word. Huidige en vroeëre paneellede sluit skrywers (Isaac Asimov, Barbara Kingsolver, David Foster Wallace en Eudora Welty), digters (Rita Dove, Galway Kinnell, Mary Oliver en Robert Pinsky), dramaturge (Terence McNally en Marsha Norman), joernaliste (Liane Hansen en Susan Stamberg), literatuurkritici (Harold Bloom), kolumniste en kommentatore (William F. Buckley, Jr. en Robert J. Samuelson), taalkundiges en kognitiewe wetenskaplikes (Anne Curzan, Steven Pinker en Calvert Watkins) en humoriste (Garrison Keillor, David Sedaris en Alison Bechdel) in. Pinker, die skrywer van die stylgids The Sense of Style en Harvard College Professor en Johnstone Family Professor by die Harvard-universiteit se Departement van Sielkunde, beklee tans die amp van paneelvoorsitter.^[3]

Die gebruikerspaneel is op 1 Februarie 2018 ontbind.^[4]

Illustrasies en fonetiese alfabet

Deel van die AHD se vernuwende benadering tot uitleg is die besluit om die woordeboek van klein fotografiese illustrasies te voorsien. Daar is kleurprente aan ewe bladsye se linker- en onewe bladsye se regterkant. Regs onder op elke onewe bladsy verskyn besonderhede oor die AHD se fonetiese alfabet. Die uitgewers het besluit om nie die Internasionale Fonetiese Alfabet (IFA) se notasiestelsel te gebruik nie.

Verwysings

Eksterne skakels

Amptelike webtuiste en aanlynuitgawe

American Heritage Dictionary

The Dictionary Society of North America

Dictionary Society of North America

[1] "Houghton Mifflin Harcourt: American Heritage Dictionary of the English Language, Fifth Edition. Besoek op 7 Junie 2016". Geargiveer vanaf die oorspronklike op 29 Mei 2020. Besoek op 24 Mei 2020.

[2] John Ottenhof: The Perils of Prescriptivism: Usage Notes and The American Heritage Dictionary. In: American Speech, volume 71, nommer 3 (Najaar 1996), bl. 272-284

[3] ahdictionary.com: Usage Panel. Besoek op 7 Junie 2016

[4] the weekly Standard, 2 Desember 2018: The Dictionary and Us. Besoek op 6 Augustus

[1]

[2]

[3]

[4]

l b w Woordeboeke van Engels
Oudengels en Middelengels	An Anglo-Saxon Dictionary Dictionary of Old English Middle English Dictionary
Histories	Catholicon Anglicum (1483) The English Schoole-Master (1596) The New World of English Words (1658) A New English Dictionary (1702) An Universal Etymological English Dictionary (1721) A Dictionary of the English Language (1755) Webster's Dictionary (1828) Worcester's Dictionary Richardson's New Dictionary Imperial Dictionary (1847–50) Century Dictionary (1889–91)
Amerikaans-Engels	American Heritage Dictionary of American English Dictionary of American Regional English Encarta New Oxford American Oxford American Random House Webster's Webster's New World Webster's Third New International Dictionary World Book Dictionary
Brits-Engels	Chambers Collins Oxford English Concise Oxford English Compact Oxford English Shorter Oxford English Historical Thesaurus Oxford Dictionary of English Penguin
Kanadees-Engels	Canadian Oxford Dictionary of Canadianisms Gage Canadian (Volledige lys)
Australies-Engels	Australian National Australian Oxford Macquarie
Aanlyn	Wiktionary Collaborative International Dictionary of English Urban Dictionary Wordnik
Leerling / Engels as vreemde of tweede taal	Cambridge Advanced Learner's Collins COBUILD Advanced Longman Dictionary of Contemporary English Macmillan English Dictionary for Advanced Learners Merriam-Webster's Advanced Learner's Oxford Advanced Learner's