Leonid Sherwood

Leonid Sherwood
Geboortenaam	Leonid Vladimirovich Sherwood
Gebore	(1871-04-28)28 April 1871 Moskou, Russiese Ryk
Sterf	28 Augustus 1954 (op 83) Sint Petersburg, Sowjetunie
Nasionaliteit	Rusland (1871–1914)  Sowjetunie (1922–1954)
Veld	Beeldhouwerk
Opleiding	Moskou Skool vir verf, Beeldhoukuns en argitektuur Imperial Akademie vir Kuns
Beweging	Sosialistiese realisme postimpressionisme
Werke	Swaelnes
Beïnvloed deur	Auguste Rodin

Leonid Vladimirovich Sherwood (dikwels ook getranskribeer as Leonid Vladimrovich Shervud; * 28 April 1871 in Moskou, † 28 Augustus 1954 in Leningrad) was 'n Russiese beeldhouer en argitek van Brits-Ierse afkoms.

Sherwood is in 'n familie van Brits-Russiese kunstenaars en argitekte gebore. Hul stamvader, William Sherwood, het met sy Ierse vrou na Rusland geëmigreer en hom in Aleksandrofski gevestig. Sy kleinseun (en Leonid se pa), die argitek en skilder Wladimir Osipowitsj Sherwood (1833-1897), het bekendheid verwerf met sy ontwerp vir die Historiese Museum op Moskou se Rooiplein wat in 1883 geopen is.

Leonid was een van tien kinders wat vir Wladimir Sherwood gebore is. Hy het in die voetspore van sy beroemde vader gevolg en tussen 1886 en 1891 aan die Moskouse Skool vir Toegepaste Kuns gestudeer. Daarna het hy sy akademiese opleiding aan die Akademie vir Kunste in Sint Petersburg voortgesit en hom op beeldhoukuns toegespits. Sy beeldhoukuns is deur die beginsels van die Sosialistiese realisme geïnspireer. Sherwood is vir sy verdienste as Sowjet-Russiese kunstenaar met die Orde van die Rooi Vlag van Arbeid vereer.

Sy bekendste werk as argitek is die Swaelnes, 'n klein Neogotiese kasteel aan die suidkus van die Krim wat hy vir die Balties-Duitse oliemiljoenêr Baron von Steingel tussen 1911 en 1912 gebou het.