基因流動

基因流動（gene flow）係遺傳學同進化論上嘅一個概念，指一個個體群（population）嘅遺傳差異流去另一個個體群。如果流動率係夠高，令兩個個體群嘅等位基因嘅頻率相同，兩個個體群就可以睇成為單一嘅個體群。

上圖係基因流動嘅抽象圖解；想像家陣有兩個族群（A 同 B）嘅雀鳥，佢哋兩個群體俾座山隔開咗，箭咀表示基因嘅傳遞，族群 A 具有令隻雀羽毛藍色嘅等位基因，而族群 A 入面有個個體遷徙去 B 地區嗰度，喺 B 地區搵到伴侶生後代，令 B 地區首次有咗隻羽毛藍色嘅幼雀。睇埋顯性。

物種之間嘅基因流動會涉及所謂嘅橫向基因轉移（horizontal gene transfer）－即係一啲基因由一隻生物傳去另一隻唔係佢仔女嘅生物嗰度。呢種事通常喺細菌入面先至會發生，而且仲會搞到醫學方面嘅研究者好頭痛：一個物種嘅細菌俾啲藥殺到咁上下會開始有抗藥性－因為冇抗藥性嘅個體話咁快就死嗮，淨返啲抗藥性勁嘅個體先會生存到落嚟，跟手呢啲抗藥性勁嘅個體會繁殖，（抗藥性係受基因影響嘅）生一啲同佢哋一樣抗藥性勁嘅下一代出嚟，最後成個物種變到抗藥性愈嚟愈強。除咗噉，細菌仲有可能做橫向基因轉移將自己嘅抗藥性基因傳俾第啲物種嘅細菌，搞到成柞細菌物種都變到有抗藥性。