中國共產黨第十次全國代表大會

中國共產黨第十次全國代表大會於1973年8月24號至28號响北京召開。參加大會嘅代表共1249人，代表當時全國2800萬黨員。

喺中共第十次全國代表大會召開前嘅8月20號，中央政治局通過決議，永遠開除林彪、葉群、黃永勝、吳法憲、李作鵬、邱會作等人嘅黨籍。

毛澤東主持大會，周恩來作政治報告；王洪文作關於修改黨章嘅報告。

大會通過咗政治報告、關於修改黨章嘅報告同《中國共產黨章程》。十大黨章保留咗九大黨章中關於黨嘅性質、指導思想、基本綱領、基本路線等內容，响結構上作出一啲調整，條文部分改得唔多。總綱中只取消咗有關林彪嘅論述同林彪嘅論點。值得指出嘅係，十大黨章响「左」傾錯誤方面嘅新發展，主要係充實所謂兩條路線鬥爭經驗嘅內容，將「批判修正主義列為加強黨嘅思想建設嘅長期任務」；片面提出「反潮流」原則，要求黨員要具有反潮流嘅精神等。

大會最後選出咗195名中央委員同124名候補中央委員。一啲喺「文化大革命」中遭到打擊，被排斥喺九屆中央委員會之外嘅老幹部，好似鄧小平、王稼祥、烏蘭夫、李井泉、譚震林、廖承志等被選為中央委員。雖然江青集團嘅骨幹分子更多咁進入新嘅中央委員會，但一批眾望所歸嘅老同志入選，畢竟反映咗黨內健康力量嘅增強。

一中全會

中國共產黨第十屆中央委員會第一次全體會議於1973年8月30號响北京舉行。會議選舉咗中央領導機構，名單如下：

中央委員會主席：毛澤東
中央委員會副主席：周恩來、王洪文、康生、葉劍英、李德生
中央政治局委員：（以下按姓氏筆劃為序）毛澤東、王洪文、韋國清、葉劍英、劉伯承、江青（女）、朱德、許世友、華國鋒、紀登奎、吳德、汪東興、陳永貴、陳錫聯、李先念、李德生、張春橋、周恩來、姚文元、康生、董必武
中央政治局候補委員：吳桂賢（女）、蘇振華、倪志福、賽福鼎
中央政治局常務委員會委員：毛澤東、王洪文、葉劍英、朱德、李德生、張春橋、周恩來、康生、董必武

二中全會

中國共產黨第十屆中央委員會第二次全體會議於1975年1月8號至10號响北京舉行。會議討論咗第四屆全國人民代表大會嘅準備工作。決定將《中華人民共和國憲法修改草案》、《關於修改憲法的報告》、《政府工作報告》同全國人民代表大會常務委員會、國務院成員嘅候選人名單，提請全國人民代表大會討論。會議選舉鄧小平為中共中央副主席、中央政治局常務委員。同意李德生辭去中共中央副主席、中共中央政治局常委嘅職務。之前中共中央任命鄧小平為中共中央軍委副主席兼中國人民解放軍總參謀長、國務院第一副總理。

三中全會

中國共產黨第十屆中央委員會第三次全體會議於1977年7月16號至21號响北京舉行。全會開幕時，全體同志起立，為毛澤東、周恩來、朱德、康生、董必武等已故嘅老一輩無產階級革命家，為悼念十屆二中全會以嚟逝世嘅中央委員會委員、候補中央委員同其他同志默哀。全會一致通過《關於追認華國鋒任中國共產黨中央委員會主席、中國共產黨中央軍事委員會主席的決議》、《關於恢復鄧小平同志職務的決議》，決定恢復鄧小平嘅中共中央委員、中央政治局委員、常委、中共中央副主席，中共中央軍委副主席，國務院副總理，中國人民解放軍總參謀長嘅職務。全會一致通過《關於王洪文、張春橋、江青、姚文元反黨集團的決議》，決議永遠開除「四人幫」嘅黨籍，撤銷佢哋嘅黨內外一切職務。另外全會完全同意中央政治局關於提前召開中國共產黨第十一次全國代表大會嘅決定。