Krasnozavodsk

Krasnozavodsk
Краснозаводск

Lidnanznam	Flag
Valdkund	Venäma
Eläjiden lugu (2023)	14,432 ristitud
Pind	20 km²
Telefonkod	+7−49 654-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Jumalanmaman Iveronan jumalaižen pühäpert' (om saudud vll 2005−2006)

Krasnozavodsk (ven.: Краснозаво́дск) om Venäman lidn Moskvan agjan pohjoižes. Mülüb Sergijev Posadan lidnümbrikho (edel vn 2019 sulakud — rajonha), sen kaikiš penemb lidn nellän kesken eläjiden lugun mödhe, nellänz' surtte eländpunkt.

Istorii

Eländpunktan aluz om pandud vl 1916 udenno Troickii-šlibaktegimenno (radaškanzi vn 1915 heinkuspäi, nüg. himine tegim). Vhesai 1937 žilon nimituz oli Zagorskii i Radnikžilo tegimenno nomer 11, vl 1938 — Vozroždenije, vl 1939 — Lesnoi, vl 1940 — Krasnozavodskii. Se sai lidnan statusad vl 1940 nügüdläiženke nimitusenke.

Novostroik-radnikžilo lugetihe lidnan mikrorajonaks vhesai 2000. Erištuihe sidä Peresvet-lidnaks vl 2000, sen jäl'ghe Krasnozavodskan ristitišt poleni kahthe kerdha.

Krasnozavodsk šingotase himižel tegimel (patronad, pirotehnikan šlibakod), sauvondmaterialiden pästandal, sömtegimištol (čajun pakuitez, südäiveziden tegim).

Geografijan andmused

Lidn sijadase lidnümbrikon keskuzpalan päivnouzmas, Kunj-jogen randal (ven.: Кунья́, amuine Kunjem / Куньема 46 km pitte, Dubnan hura ližajogi), 220 m ü.m.t. keskmäižel korktusel. Matkad Vladimiran agjhasai om kahesa kilometrad päivnouzmha. Matkad Moskvhasai (Moskvan rengazavtotehesai) om 80 km suvipäivlaskmha-suvhe, lidnümbrikon Sergijev Posad-keskushesai om 15 km suvipäivlaskmha-suvhe. Lähembaine lidn om Peresvet koumes kilometras suvipäivlaskmha.

«Holmogori»-avtote (M8-trass) mäneb koumes..kudes kilometras suvipäivnouzmha lidnaspäi. Vanh Jaroslavlin mante läbitab lidnan suvipäivnouzmad i ühtenzoitab Sergijev Posadanke oikti. Lähembaine passažirraudtestancii om Bužaninovo seičemes kilometras suvipäivnouzmha «Sergijev Posad — Aleksandrov»-keskustal, sišpäi kümnekilometrine sarak tuleb lidnha, kävutadas vaiše jüguiden täht.

Vhesai 2019 lidn oli lidnankundan keskuz, sen pind oli 40,42 km², mülütihe lidnankundha Semönkovo- i Rogačovo-külid Krasnozavodskan ližaks.

Eläjad

Vl 1939 žilon ristitišt oli 13 382 eläjad, vl 1959 lidnan — 19 523 eläjad. Vn 2010 Venäman rahvahanlugemižen mödhe lidnan eläjiden lugu oli 13 392 ristutud. Kaik 13 297 eläjad oli lidnas vl 2017. Otab lidnümbrikon 5..6 % ristitištos. Kaikiš suremb lidnan ristitišt oli 29 900 eläjad vl 1992.

Rahvahad (2010): venälaižed — 95,0 %, totarlaižed — 1,1 %, toižed rahvahad — 3,9 %.

Ortodoksižen hristanuskondan kaks' jumalanpertid oma saudud lidnas.

Sergijev Posadan kolledžan openduzkorpus nomer koume (koumespäi) radab Krasnozavodskas (edel vn 2021 keväz'kud erigoittud Krasnozavodskan kolledž) om lidnan professionaližen opendusen aluzkundaks.

Irdkosketused

• Lidnümbrikon tobmuden sait (sergiev-posad.net). (ven.)
• Lidnan da enččen lidnankundan informacine sait (krasnozavodsk.ucoz.ru). (ven.)