Juhnov

Juhnov
Юхнов

Lidnanznam
Valdkund	Venäma
Eläjiden lugu (2023)	6,470 ristitud
Pind	9,04 km²
Pämez'	Jelena Močalova (kezaku 2009—)
Telefonkod	+7−48 436-xx-xxx
Avtokod	40
Aigvö	UTC+3 (MSK+0)

Juhnov (ven.: Ю́хнов) om Venäman lidn da lidnankund Kalugan agjan lodehes. Se om Juhnovan rajonan administrativine keskuz.

Istorii

Eländpunkt mainitase 15. voz'sadaspäi kuti Juhnovan Kazanin mez'jumalankodi (nügüd' päjumalanpert' lidnan keskuzpalas). Žilo sai lidnan statusad vl 1777, oli makundan keskuseks vspäi 1796. Šingotihe kahten mectegimel i Varšavan avtotel edel revolücijad. Vl 1921 lämoipalo mureni lidnad. Toižen mail'man sodan aigan lidn oli okkupiruidud nacistoil (kül'mku 1941 — 5. keväz'ku 1942).

Juhnov šingotase sauvondmaterialiden pästandal (mecan ümbriradmine, plastikiknad) i omblendfabrikal. Maižanduzrajonan keskuz.

Geografijan andmused

Lidn sijadase rajonan keskuzpalan lodehes, Ugr-jogen oiktal randpolel (ven.: Угра́ 399 km pitte, Okan hurapol'ne bassein), 150 m ü.m.t. keskmäižel korktusel. Ugran oiged Kunov-ližajogi (ven. Кунова 15 km pitte) läbitab lidnan keskuzpalad i sädab järved siš.

Matkad Kalughasai om 71 km päivnouzmha-suvipäivnouzmha orhal vai 88 km avtotel. Lähembaižed lidnad oma Medin' 48 km pohjoižpäivnouzmha orhal vai avtotedme, Kondrovo 46 km päivnouzmha orhal vai 56 km avtotedme, i Mosal'sk 32 km suvipäivlaskmha orhal vai 47 km avtotedme. «Moskv — Roslavl'»-avtote läbitab lidnan pohjoižpalad i ristikoičese «Kalug — Väz'm»-avtotenke kahtes kilometras suvipäivlaskmha lidnaspäi.

Tobmuz

Juhnov om lidnankundan üks'jäižeks eländpunktaks. Lidnankundan pind — 9,04 km².

Lidnankundan tobmuden pämez' om sen Administracijan pämez'. Lidnan Duman ezimez' om Tat'jana Šamarina vn 2022 tal'vkuspäi. Edeline Duman ezimez' om Dmitrii Kondratjev (reduku 2019 — tal'vku 2022).

Eläjad

Vl 1939 lidnan ristitišt oli 3 769 eläjad. Vn 2010 Venäman rahvahanlugemižen mödhe lidnan eläjiden lugu oli 7 056 ristitud, rajonan pol', vn 2021 — 6 610 ristitud. Kaik 6 079 eläjad oli lidnas vl 2017. Kaikiš suremb lidnan ristitišt oli enamba seičemed tuhad eläjid vl 1979 (7 178 rist.) i vll 2000−2011 (7 700 rist. vl 2003).

Rahvahad (2010): venälaižed — 94,6 %, ukrainalaižed — 1,4 %, toižed rahvahad — 4,0 %.

Rahvahad (enamba 0,4 % vl 2021): venälaižed — 84,3 %, armenijalaižed — 2,7 %, tadžikalaižed — 0,9 %, ukrainalaižed — 0,6 %, uzbekad — 0,4 %, vaugedvenälaižed — 0,4 %, toižed rahvahad — 2,7 %, rahvahuden ozutandata — 8,0 %.

Ortodoksižen hristanuskondan koume pühäpertid oma kaičenus i saudud lidnas: Jumalanmaman Kazanin jumalaižen päjumalanpert' (om saudud vll 1790−1815 i udessündutase) i kaks' časounäd. Niiden ližaks kaks' jumalanpertid ei ole kaičenus.

Lapsiden opendusen aluzkundad oma kaks' päivkodid (nomer 1 i 2), keskškol, čomamahtoiden škol, lapsiden da norišton sportškol. Lähembaižed professionaližen opendusen aluzkundad ratas Kondrovos i Kalugas.

Galerei

• 
  Lidnan Kazanin jumalaižen päjumalanpert', vn 2021 nägu
• 
  Tulend Kazanin päjumalanpertin territorijha (2014)
• 
  Transportižen «Avtomobilist»-edheotandan sauvuz vl 2008
• 
  Jaugnikoiden sild Juhnovan järves päliči vl 2014

Irdkosketused

• Lidnan tobmuden sait (yuxnov-r40.gosweb.gosuslugi.ru). (ven.)