Betchete ri-

Po des linwincieusès racsegnes sol sititchete "ri-", alez s' vey sol Wiccionaire

Li betchete ri-, ki si dvreut purade lomer betchete r(i)- / (è)r-, c' est ene vicante betchete do walon.

Cognes

Ele si pout trover, dins tos les mots k' elle fôrmêye, dizo les alofômes ki shuvnut :

Dj' el rivoe di l' ôte costé del voye.

Ribasti ene veye k' esteut distrûte : c' esteut çoula nosse bouye.

Dji l' erwaitive passer.

Erlevez vos, et stierdoz vos ouys !

Vos rloukîz les cmeres, asteure ?

La k' i rboerlêye : "Bodje tu rade did la !"

Si l' bodje kimince pa ene voyale, n' a k' ene cogne : r- : raler, ranoncî, regadjî, ralårdji, rimpli.

Portant, po les viebes ki cminçnut pal betchfessî oi, ci-cial si cdût come si ç' sereut ene cossoune : rioister, rioizeur, rioirtiyî.

Li betchete ri- si pout cåzu mete so tos les viebes e walon, et minme eto so sacwants bodjet ki n' sont nén des viebes. Metans :

so les aidants viebes : raveur u rawè, resse, rivoleur, ripoleur, rissaveur u rissepi, rifaleur.
so des adviebes u des pronos : rila (vo m' rila, vo nd erla, vo vos rla ?); rizè (va rzè !, va t' erzè !); rizî (alans rzî, va rzî !).
so des viebes ki kminçnut ddja pa on R : rirpassé tins, riroter.

ridi m' ki ti m' voes voltî ! = el dire co on côp

ribatijhî (del sope, del gote) = rimete di l' aiwe co on côp.

rinovler mes rmerceymints = les rinde noveas co on côp.

ricomincî = comincî on deujhinme côp.

Sinse nén radjoutrece: li betchete ri- ni dene nén ene rawete di sinse; li viebe avou l' betchete ri- si pôreut replaecî på viebe simpe

Il ont rboerlé come des vexhåds = il ont boerlé foirt

Dji va rguignî les djins ki pasnut pal fniesse = dj' elzès va aler guignî (riloukî)

Riwaite bén a twè ! = waite bén a twè (ni prind nou risse)

rivômi = vômi

rixhorbi l' tåve = xhorbi l' tåve

rimete si soper = rivômi.

ritourner l' pådje = el tourner dins l' ôte sinse.

Novea sinse, diferin do viebe sins betchete; ou adon, k' i fåt loukî lon po trover li rnovelmint d' l' accion.

ristinde, ripoli = passer on fier electrike so des bounès lokes lavêyes et souwêyes.

Les viebes avou l' betchete ri- sont-st ahåyants po ratourner les fråzes francesses avou les adviebes "de nouveau, à nouveau". Metans :

Fr. : Il ya des charges positives au-dessus du nuage, des négatives dans le nuage puis à nouveau des positives en-dessous.

Wa : Gn a des tchedjes pôzitives ådzeu del noûlêye, des negatives divins, pu gn è ra des pôzitives padzo.

Les aidants viebes avou ri- ratournèt des ôtes piceures e francès.

Fr. : Veux-tu reprendre de la soupe ?

Wa : Rivouss del sope ?

ri- + ki-/co- => ric-: ricmander, ricdure, ricfoirter, ricmincî
ri- + di- => rid-: ridmander, mins pout dmorer «ridi-» divant l' betchfessî sch; ridischinde
ri- + dis- => ridis-: ridisfé