Lee Miller

Elizabeth "Lee" Miller, Dama Penrose (23 april 1907 a 21 julio 1977) ia es un fotografiste e fotojornaliste american. El ia es un model de mode en New York City en la desenio de 1920 ante vadente a Paris, do el ia deveni un fotografiste de mode e artes bela. En la Gera Mundal 2, el ia es un corespondente de gera per Vogue, covrente avenis como la Blitz de London, la libri de Paris, e la campos consentra a Buchenwald e Dachau.

Vive temprana

Miller ia es naseda a 23 april 1907 en Poughkeepsie (pronunsiada Po-kip-si), New York. Sua jenitores ia es Theodore e Florence Miller. Sua padre ia es de desende deutx, e sua madre de desende scotes e eres. El ia ave un frate plu joven nomida Eric, e un frate plu vea nomida John. Theodore ia favore sempre Lee, e el usa el frecuente como un model per sua fotografia amator. Cuando el ia ave sete anios, Lee ia es violeda sesal cuando resta con un ami de la familia en Brooklyn, e infetada con gonorea. El ia viaja a Europa en 1925 per studia arte en Paris. Sua tempo en Europa ia es corta cuando sua padre ia clama el per reveni a New York. Alora, el ia enscrive en la Liga de Studiantes de Arte de New York.

Moda

Sua padre ia introdui el e sua frates a fotografia a un eda temprana. El ia es sua model - el ia fotografi sua fia adolesente nuda multe veses - e el ia mostra a el la aspetas tecnical de la arte. A 19 anios, el ia pasea cuasi ante un auto a un strada en New York, ma ia es prevenida par Condé Nast, la publcor de Vogue. Esta aveni ia aida el per comensa sua carera como un model. El ia apare en un xapo blu e perlas en un desinia par George Lepape sur la covre de la jornal de 15 marto 1927. La aspeta de Lee ia es esata cual la editor xef Edna Woolman Chase ia xerca per representa la idea nova de la "xica moderne".

Per la du anios seguente, el ia es un de la modeles la plu desirada en New York, fotografida par la fotografores de mode la plu famosa, incluinte Edward Steichen, Arnold Genthe, Nickolas Muray, e George Hoyningen-Heune. Un fotograf par Steichen ia es usada per anunsia teletas de fem par Kotex, sin sua acorda, cual ia fini sua carera como un model de mode. El ia es empleada par un desinior de mode en 1929 per desinia detalias de mode en depintas de la Renase, ma el ia deveni fatigada par esta, e ia trova fotografia plu efetosa.

Fotografia

En 1929, Miller ia viaja a Paris con la intende de es un aprendor su la artiste e fotografiste surealiste Man Ray. An si, a prima, el ia insiste ce el no nesesa aprendores, Miller pronto ia deveni sua model e colaboror, e sua amor e musa. En cuando el ia es en Paris, el ia inisia sua propre studio de fotografia, frecuente prende la asinias de mode de Ray, afin el pote foca sur sua depinta.

Con Ray, el ia rediscovre la tecnica fotografial de solari, tra un asidente descriveda como la resulta de un mus corente sur sua pede, cual causa ce el comuta la lus en la media de la prosede de developa. La duple ia usa la tecnica como sua sinia vidal, con esemplos como la foto de Miller solarida en Paris 1930, par Ray, e la foto de la surealiste Meret Oppenheim, ami Dorothy Hill, e la stela de filmas silente Lilian Harvey, tota par Miller. La usa de solari acorda con la prinsipe surealiste ce la acaso nonconsensa es un parte importa en arte, e lo mostra la apela de la stilo a la nonrazonante o paradoxal en combina de positiva e negativa. Mark Haworth-Booth ia descrive solari como "un media surealiste perfeta, en cual positiva e negativa aveni simultan, como en un sonia".

Entre la amis de Miller ia es Pablo Picasso, Paul Éluard, e Jean Cocteau, ci ia es tan ipnoseda par la belia de Miller ce el ia covre el en bur e muta el a un molda de jeso de un sculta clasica per sua filma "La sangue de un poesiste". En un disputa con Ray sur la atribui de sua obras coproduida, Ray ia talia posible un imaje de la colo de Miller con un lama.

Pos departi de Ray e Paris en 1932, el ia reveni a New York e ia institui un studio per fotografia personal e comersial con sua frate Erik (ci ia es empleada par la fotografiste de modo Toni von Horn) como sua aidor en la sala oscur. Miller ia lua du apartes en un construida un bloco de Radio City Music Hall. Un de la apartes ia deveni sua propre casa, e la otra ia deveni la Studio Lee Miller. Clientes ia inclui BBDO, Henry Sell, Elizabeth Arden, Helena Rubinstein, Saks Fifth Avenue, I. Magnin e Co., e Jay Thorpe.

En 1932, Miller ia es incluida en la esibi de fotografia european moderne a laJulien Levy Gallery en New York, e en la esibi de fotografistes internasional a la Museo de Brooklyn con László Moholy-Nagy, Cecil Beaton, Margaret Bourke-White, Tina Modotti, Charles Sheeler, Ray, e Edward Weston. Como un responde a la esibi, Katherine Grant Sterne ia scrive un revista en Parnassus, lodante la obras de Miller.

En 1933, Julien Levy ia furni Miller con la sola esibi solo de sua vive. En sua clientes ia es Joseph Cornell, atores Lilian Harvey e Gertrude Lawrence, e la atores african-american de la opera de Virgil Thomson e Gertrude Stein "Cuatro Santas en Tre Atas" (1934).

En 1934, Miller ia abandonada sua studio per sposi Aziz Eloui Bey, un comersior e injenior egiptian, ci ia veni a New York per compra aparatas per la ferovia nasional de Egypte. Sua fotos de esta periodo, an si no como un fotografiste profesal, es regardada como alga de sua imajes surealiste la plu stonante. Magritte ia funda sua depinta "Le Baiser" sur un de sua fotos de la deserto.

A 1937, Miller ia deveni noiada con sua vive en Cairo e ia reveni a Paris. Ala, el encontra la artiste brites Roland Penrose, ci el ta sposi plu tarde. Ance en 1934, Miller ia contribui un cosa a la esibi de cosas surealiste en la Galeria de London. Cuatro de sua fotos ia es esibida en la Galeria Zwemmer en London. La anio seguente, sua obras ia es mostrada a la Museo de Arte Moderne en New York como un esibi sur Britan en la gera.

Gera Mundal 2

Pos la comensa de la Gera Mundal 2, Miller ia abita en Hampstead en London con Penrose cuando la bombarda de la site ia comensa. Iniorante la suplicas de sua amis e familia en la SUA, el ia comensa un carera en fotojornalisme como la fotografiste ofisial de la gera per Vogue. El ia es reconoseda par la Armada de SUA como un corespondente de gera per Condé Nast de desembre 1942. El ia ecipida con David E. Scherman, un fotografiste per Life, en multe asinias.

El ia viaja a Franse min ca un mense pos D-Dia e ia fotografi la usa prima de napalm a la aseja de San Malo, e la libri de Pari, la Batalia de Alsas, e la teror de la campos de consentra a Buchenwald e Dachau. Un foto par Scherman de Miller en un bania, con un tubo de dux anelida pos sua testa, sujestente un laso, fotografida a la aparte de Adolf Hitler en Munxen, es un de la imajes la plu iconin de la coopera entre Miller e Scherman. Como un de la persones prima per ariva a la apartes secreta de Hitler, Miller ia confesa ce el ia ave sua adirije en sua pox per anios. Pos la foto en la bania, Miller ia baniada ala e ia dormi en sua leto. En esta tempo, Miller ia fotografi enfantes morinte en un ospital en Wien, la vive de campanianes en Magiar pos la gera, la corpos mor de ofisiores nazi e sua familias, e final, la esecuta de Ministro Prima László Bárdossy. Pos la gera, el ia continua labora per Vogue per du anios plu, fotografinte moda e selebradas.

En Britan

Pos reveni a Britan de Europa sentral, Miller ia comensa sufri de episodos sever de depresa e cual nos nomi aora la sindrom de stresa postraumal. El ia comensa bevi alcol multe e ia deveni nonserta sur sua futur. En 1946, el ia viaja con Penrose a la SUA, do el ia visita Man Ray en California. Pos ce el ia descovre ce el ia es ensita par Penrose con sua sola fio, el ia divorsa Bey e, a 3 maia 1947, el ia sposi Penrose. Sua fio, Antony Penrose, ia es naseda en setembe 1947.

En 1949, la duple ia compra Farley Farm House en Chiddingly, Sussex sude. En la desenios de 1950 e 1960, la cultiveria ia deveni un tipo de Meca per artistes visitante, como Picasso, Ray, Henry Moore, Eileen Agar, Jean Dubuffet, Dorothea Tanning, e Max Ernst. En cuando Miller ia continua fotografi per Vogue, el ia desprende la sala oscur per la cosina, e el deveni un cosinor gurme. Seguente sua servor de casa Patsy, el ia spesiali en "comedas istorial" como porco joven rostada, e comedas primitiva como nubes de zucar en salsa cola. El ia furni ance fotos per biografias ce Penrose ia scrive sur Picasso e Antoni Tàpies. Ma la imajes de la gera, spesial los de la campos de consentra, ia continua turba el, e el ia comensa a cual sua fio ia descrive plu tarde, un "spiral a su". Sua depresa ia pote es aselerada par sua sposos adultera.

Ance en esta periodo, Miller ia es investigada par securia brites MI5, su la suspeta ce el ia es un spior soviet.

En otobre 1969, Miller ia es demandada en un intervisa con un reportor de la New York Times, cual ia atrae el a fotografia. El ia responde ce el ia es "un caso de estende se a un ramo enfernin e siera lo pos tu" (a matter of getting out on a damn limb and sawing it off behind you).

Mori

Miller ia mori de cancar a la cultiveria en 1977, con 70 anios. El ia es senida, e sua senes ia es sperdeda tra sua jardin de erbos de cosini.