Lila Kedrova

Lila Kedrova (Лиля Кедрова), 1918–2000, fuit scaenica Russo-Francica, quae anno 1965 praemio Oscar optimae secundarum partium actrici dicato adfecta est pro fabula cinematographica notissima Zorba the Greek (1964). Quamquam permultis pelliculis interfuit, ante omnia in theatralibus scaenis floruit.

De vita

Lila Kedrova, a prima origine Елизавета Николаевна Кедрова / Ielizaveta Nikolaievna Kedrova, Petrogradi die 9 Octobris anno 1918 nata est. Quem annum ipsa pronuntiavit, sed fieri potest, ut aliquot annis ante nata sit. Parentes eius cantores Russici erant, nam pater Nicolaus, cantor operaticus, primum quadricinium marum, quod carmina liturgica cantaret, creavit, et mater Sophia cantrix erat Theatri Mariae.

Anno 1922 familia Kedrov timens persecutiones Iosephi Stalin Russiam Sovieticam reliquit. Primum Berolini consederunt. Deinde familia anno 1928 Parisios transiit, quod parentes meliorem quaestum ibi facere volebant. Parisiis pater quadricinium recreavit, et mater apud Conservatorium Parisiense docere coepit.

Lila anno 1932 parentibus invitis choro patriae exsulum Russicorum se adiunxit, et quidem Constantini Stanislavski dicipulis, qui Parisios immigraverant.^[1] Hoc initium erat prosperi vitae cursus theatralis. Anno 1945 in fabula in Theodori Dostoievski Fratres Karamazov posita prodiit in Théâtre de l'Atelier. In aliis quoque theatris (sicut Antoine et Poche) usque ad annum 1977 prodiit.

Ab annis 1950 tribus decenniis actrix interfuit permultis conficiendis pelliculis plerumque Francicis. Anno 1964 primum in pellicula Anglica prodiit, scilicet Zorba the Greek, quamquam Anglice non callebat. Nam Michaeli Cacogianni dispositori pelliculae roganti, ut partes madame Hortense agendas susciperet, quam libentissime se velle responderat, ac an Anglice calleret, sciscitanti "Oui" mentita erat. Etsi Mme Hortense, veterem meretricem fucatam, minus aetate aequiperare posset, et ipsa agendi rationem suam aspernabatur, tamen collegio criticorum digna visa est, cui praemium Oscar optimae secundarum partium actrici dicatum tribueretur.

Ultimis annis morbo Alzheimeriano laborabat, donec die 16 Februarii anno 2000 pneumonia vitam amisit Sault Ste. Marie in urbe Ontarionis.

Pelliculae selectae

1938: Ultimatum
1953: Weg ohne Umkehr
1954: Les impures
1954: Le défroqué
1955: Razzia sur la chnouf
1956: Calle Mayor
1956: Jusqu’au dernier
1958: Les Amants de Montparnasse
1958: La femme et le pantin
1959: La donna dell'altro
1963: La mort d’un tueur
1964: Zorba The Greek
1965: A high wind in Jamaica
1965: Penelope
1966: Torn Curtain
1966: Maigret à Pigalle
1968: Il suo modo di fare
1970: The Kremlin Letter
1971: A Time for Living
1971: Rak
1973: Soft Beds, hard Battles
1975: Le orme
1976: Le locataire
1977: Moi, fleur belle
1978: Le cavaleur
1979: Les égouts de paradis
1979: Clair de femme
1981: Blood Tide
1981: Tell me a riddle
1983: Testament
1984: Sword of the Valiant – The Legend of Gawain and the Green Knight
1988: Some Girls

Notae

↑ Rule 2000; Woo 2000.

Bibliographia

Rule, Vera (2000) Lila Kedrova. The Guardian, 24 Aprilis.
Woo, Elaine (2000) Lila Kedrova; Won Oscar, Tony for ‘Zorba the Greek’, The Los Angeles Times, 21 Aprilis.

Nexus externi

de operibus et vita in IMDb, elencho internationali histrionibus dedicato
vita paucis verbis depicta

[1] Rule 2000; Woo 2000.

[1]