Vesica piscis
A vesica piscis (vexiga de peixe) é un símbolo que consiste en dous círculos do mesmo radio que se cortan, de xeito que o centro de cada círculo está na circunferencia do outro. A forma creada denomínase mandorla (que significa "améndoa" en italiano). Era un símbolo coñecido nas antigas civilizacións de Mesopotamia, África e Asia.[1]
Descrición matemática
[editar | editar a fonte]Esta figura aparece na primeira proposición dos Elementos de Euclides, onde establece o primeiro paso na construción dun triángulo equilátero usando un compás e unha regra[2]. O triángulo ten como vértices os dous centros de disco e unha das esquinas afiadas da figura.
A relación matemática da súa anchura (medida polos puntos extremos do "corpo", excluíndo a "cola") coa súa altura é a raíz cadrada de 3, ou 1,7320508076... (porque de trazar a liña recta que une os centros dos dous círculos, con dous puntos onde os círculos se cortan, obtemos dous triángulos equiláteros unidos por un lado).
Usos
[editar | editar a fonte]A figura da vesica piscis con dous círculos emprégase nos diagramas de Venn, e se son tres, dá lugar ao símbolo da triquetra e ao triángulo de Reuleaux. Na arte cristiá, aparece nalgunha auréolas orientadas de xeito vertical coa denominación de mandorla, e tamén se emprega nos selos dalgunhas organizacións eclesiásticas.
A vesica piscis ten uso como símbolo dentro da masonaría, sobre todo nas formas dos colares que levan os oficiantes dos seus rituais[3], e igualmente nos selos das loxas masónicas[4][5]. Tamén se emprega como sistema de proporcionalidade na arquitectura gótica. Aparece ilustrado por Cesare Cesariano, o primeiro tradutor ao italiano da obra "De arquitectura" de Vitruvio (1521), na que é denominada como "a regra dos arquitectos alemáns".
Significado místico e relixioso
[editar | editar a fonte]En diversos períodos da historia foi obxecto de especulación mística. Probablemente, os primeiros foron os pitagóricos, que a consideraban unha figura sagrada.
O cociente 265/153 é unha aproximación á raíz cadrada de 3, e ten a propiedade de que non se obtén ningunha mellor aproximación con números menores. O número 153 aparece no Evanxeo de Xoán (21:11) como o número de peixes que Cristo fixo que capturasen no milagre da "captura de peixe", que algúns consideran como unha referencia cifrada das crenzas dos pitagóricos.
Galería
[editar | editar a fonte]-
Miniatura do Zodíaco dos irmáns Limburg
-
Escudo de Guam
-
Selo do abade de Lllwinning (Escocia)
-
Selo de William Fraser, bispo de St Andrews.
-
Triquetra
Notas
[editar | editar a fonte]- ↑ de la Plaza Escudero, Lorenzo (2015). Diccionario visual de términos de arte. Col. Grandes Temas. Madrid: Cátedra. p. 276. ISBN 978-84-376-3441-8.
- ↑ Heath, Sir Thomas L. (1956). The Thirteen Books of Euclid's Elements. Dover Publications Inc. p. 241. ISBN 0486600904.
- ↑ Ward, J.S.M. (1924). An Interpretation of Our Masonic Symbols. pp. 34–35.
- ↑ Mackay, Albert G. (1921). Encyclopaedia of Freemasonry 2. p. 827.
- ↑ Eyer, Shawn. "A vesica piscis e a masonaría". Arquivado dende o orixinal o 17-03-2015. Consultado o 28-11-2016.
Véxase tamén
[editar | editar a fonte] |
Wikimedia Commons ten máis contidos multimedia na categoría: Vesica piscis  |
Ligazóns externas
- Weisstein, Eric W. ""Vesica Piscis".". De MathWorld Recursos Web --A Wolfram. Consultado o 28-11-2016.
- Baseado no artigo da Wikipedia inglesa.
