Asociación Regionalista Gallega
| Asociación Regionalista Gallega | |
|---|---|
| Tipo | partido político |
| Ideoloxía | rexionalismo galego |
| Data de fundación | 1890 |
| Data de disolución | 1892 |
| Presidente/a | Manuel Murguía (1890-1892)  |
| Sede | Santiago de Compostela |
| País | Galicia |
| [ editar datos en Wikidata ] | |
A Asociación Regionalista Gallega, foi unha organización política rexionalista galega activa entre 1890 e 1892.
Traxectoria
[editar | editar a fonte]En novembro de 1890 constituíuse en Santiago de Compostela o Comité Central Regionalista presidido polo liberal Manuel Murguía, aínda que a maioría dos seus membros viñan do tradicionalismo, entre eles Alfredo Brañas, Salvador Cabeza de León, José Tarrío García e Juan Barcia Caballero. En 1891 fórmanse comités locais, baixo o nome xa de Asociación Regionalista Gallega, en Lugo, A Coruña, Ourense, Pontevedra, Vigo e Tui. En total non chegou a moito máis de 50 asociados, aínda que nas eleccións municipais de Santiago José Tarrío e Cabeza de León saíron elixidos concelleiros.
La Patria Gallega (1891-1892) foi o seu órgano oficial, dirixido por Murguía, e no que Brañas escribiu artigos importantes para a evolución posterior do rexionalismo. En 1893 apareceu El Regionalista, de curta duración. A Asociación Regionalista Gallega mantivo contactos cos rexionalistas cataláns a través de Murguía, que participou nos Jocs Florals de Barcelona de 1890 e colaborou en La España Regional de Barcelona.
Entre as actuacións da ARG destaca a organización dos Xogos Florais de Tui en 1891, nos que Brañas e Murguía empregaron o galego por vez primeira nun acto público e a participación na Xunta de Defensa de Galicia que se opuña ao traslado da capitanía militar fóra de Galicia.
As diferenzas entre tradicionalistas e liberais impediu a consolidación da organización, aínda que foi un chanzo moi importante na formación dun sentimento nacional galego, ao ser a primeira organización política rexionalista de Galicia.