Azul cobaltu

L'azul cobaltu ye un color fríu, qu'históricamente obteníase utilizando sales de cobaltu. La empresa más importante del mundu que lu fabricaba nel sieglu XIX foi la noruega Blaafarveværket, a cargu de Benjamin Wegner. El pigmentu ye estraordinariamente estable.

Yá nel sieglu XVI, dellos compuestos del cobaltu usábense pa da-y un tonu azul al vidru pero nun foi aisláu hasta que, en 1735, el químicu suecu George Brandt (1694-1768) lu va preparar a partir del arseniuru. ^[1]

Allugamientu y usos

Siguiendo la ruta de la seda y dende Persia l'óxidu de cobaltu necesariu p'algamar el color azul na porzolana aportaba a China y les pieces blanques y azules resultantes nel sieglu XIV, cuando se va conocer n'Europa, conviértense n'oxetos de coleición mui arranaos, como lo amuesa la presencia de pieces de porzolana blanca y azul en bodegones y natures muertes de la pintura flamenca. ^[2]