Ir al contenido

Marilyn Monroe

Modificar os enlaces
De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Articlo d'os 1000
Marilyn Monroe
Información personal
Calendata naiximiento: 1 de chunio de 1926
Puesto naiximiento: Los Angeles (California, Estaus Unius)
Calendata muerte: 5 d'agosto de 1962
Puesto muerte: Los Angeles (California, Estaus Unius)
Conchuche: James Dougherty (1942-1946)
Joe DiMaggio (1954-1954
Arthur Miller (1956-1961)
Sitio web: www.MarilynMonroe.com
Globos d'Oro
Globo d'Oro a la Millor Actriz de Musical u Comedia:
-1960: por Some Like It Hot

Marilyn Monroe (nombre artistico de Norma Jeane Mortenson, baptizata como Norma Jeane Baker), naixita de Los Angeles (California) l'1 de chunio de 1926 y muerta en Los Angeles (California) o 5 d'agosto de 1962, estió una actriz, modelo, cantaire y productora cinematografica estausunidense, activa en o cine estausunidense dende meyatos d'os anyos 1940 dica la suya muerte y con cuantos premios recebitos mientres a suya carrera cinematografica.

Marilyn, qui morió con 36 anyadas d'edat en a cumbre d'a suya fama, se convertió en un mito erotico, estando una d'as mas conoixitas sex symbol d'a segunda metat d'o sieglo XX. A suya carrera cinematografica (luego de treballar como modelo fotografica) prencipió en zaguerías d'os anyos 1940 con a cinta Dangerous Years, dirichita por Arthur Pierson, pero no estió dica 1950, con as cintas The Asphalt Jungle (dirichita por John Huston) y All About Eve (dirichita por Joseph L. Mankiewicz) que a suya carrera se desembolicó con os suyos primers papels prencipals. Dende meyatos d'os anyos 1950 se convertió en una d'as actrices mas populars de Hollywood.

Marilyn Monroe, considerata una muller muit atractiva, casó en 1954 con o chugador de beisbol Joe DiMaggio, de qui se esvurció ixa mesma anyada ta tornar a casar-se con o escritor Arthur Miller en 1956. Morió o 5 d'agosto de 1962 en a ciudat californiana de Los Angeles, por una sobredosi de barbituricos, encara que mai s'ha esclareixito si morió por suicidio u morió por asasinato como afirman bellas teorías, por a suya relación con os chirmans John (de qui pareix que estió amant) y Robert Kennedy.

A suya vida

[editar | modificar o codigo]

As suyas primeras anyadas

[editar | modificar o codigo]

Marilyn yera naixita de Los Angeles (California) l'1 de chunio de 1926, filla de Gladys Pearl Baker. A suya mai yera esvurciata d'Edward Mortenson, qui podeba estar o pai de Marilyn (fue inscrita en o Rechistro Civil de Los Angeles con l'apellito Mortenson), encara que a suya mai, qui tenió bellas relacions ocasionals en ixe inte con atros hombres, la baptizó como Norma Jeane Baker, en considerar que su pai yera desconoixito. Por os suyos problemas economicos (y tamién sentimentals) a suya mai dixó a la nina Norma con os suyos güelos, Albert y Ida Bolender, que viviban en a localidat californiana de Hawthorne, dica que podió tener una vivienda propia.

Sindembargo, a inestabilidat d'a suya mai, con frecuents crisis niervosas, fació que Grace McKee, una amiga d'a mai, recibiese a custodia de Norma, y estió Grace qui intresó a la nina en o mundo d'o Cine. A choven Norma prencipió una luenga carrera de pais adoptivos (mesmo pareix que sufrió abusos sexuals en a suya infancia a mans de beluns d'os suyos padrastros), dica que tornó a vivir con a suya mai.

Matrimonio y primers pasos en o Cine

[editar | modificar o codigo]
Norma Jeane Baker en 1945, cuan encara no yera actriz, en imáchens de propaganda belica de l'Exercito estausunidense.

Ye fácil que por ixa vida complicata que heba tenito, Norma Jeane Baker casó o 19 de chunio de 1942, cuan nomás teneba que 16 anyadas, con James «Jim» Dougherty, un vecín 5 anyadas mes gran que Norma. En 1943 o suyo esposo s'encorporó a la Marina mercant y en 1944 a la United States Army Air Forces fendo parte d'a tripulación d'un avión bombardero B-17 Flying Fortress en misions de bombardeyo aerio sobre o territorio d'o Tercer Reich mientres a Segunda Guerra Mundial. En ixe inte, Norma treballaba en una fabrica adedicata a l'esfuerzo belico estausunidense.

En 1944, o fotografo David Conover feba una serie de fotografías ta propaganda de l'Exercito estausunidense, que miraba d'amostrar a os soldatos en o frent a vida d'as suyas mullers adedicatas a o treballo en a retraguarda, amás d'estimular a incorporación d'a muller a ixe esfuerzo belico. Fació asinas as primeras fotografías de Norma, qui se convertió a escape en una chicota muit conoixita por as suyas fotografías ta revistas de pin-up. Os soldatos d'o frent li deciban Mmmmm girl ("la chicota mmmmm"). Ta estar mas favoreixita en a suya imachen, Norma aclaró a color d'o suyo pelo, y albandonó de raso o suyo treballo t'adedicar-se a la suya incipient carrera de modelo, y en aviento de 1945 rodó un spot publicitario de banyadors. O 2 d'octubre de 1946, Norma s'esvurció d'o suyo primer esposo.

Norma Jean atrayó l'atención d'un directivo d'a productora cinematografica 20th Century Fox, Ben Lyon, qui fació que li fesen una prebatina. O 26 de chulio de 1946, Norma Jean signó un contracto con a productora d'una durada de 6 meses, por un salario de 125 dólars por semana. Ye en ixe inte cuan, d'alcuerdo con a productora, decidió de cambear o suyo nombre artistico enta Marilyn Monroe. O nombre de Marilyn li heba inspirato l'actriz Marilyn Miller, y l'apellito Monroe lo pilló d'a familia d'a suya mai. Actuó en as cintas Dangerous Years (1947, Arthur Pierson, a suya primera cinta oficialment) y Scudda Hoo! Scudda Hay! (1948, F. Hugh Herbert), encara que con escenas muit breus, cuasi se puet decir cameos.

En 1948 tornó a sinyar un contracto con una atra productora cinematografica, a Columbia Pictures, tamién por una durada de 6 meses, actuando en a cinta musical de baixo presupuesto Ladies of the Chorus (1948, Phil Karlson). A cinta estió un fracaso de raso, con a cual cosa no li renovoron o suyo contracto. Actuó en Love Happy (1950, David Miller) con os chirmans Marx, y a suya actuación lis cuacó a os productors d'a cinta, que la ninvioron a promocionar-a a la ciudat de Nueva York. Atrayó l'atención de Johnny Hyde, un achent d'a William Morris Agency, qui acceptó de representar-la y amás se convertió en o suyo amant, obtenendo-li un chicot papel en a cinta The Asphalt Jungle (1950, John Huston), encara que a critica consideró que heba feito una interpretación de calidat. Sindembargo, Marilyn Monroe no teneba diners, asinas que acceptó posar ta fotografías eroticas con o fotografo Tom Kelly, encara que con o nombre artistico de Mana Monroe. Istas fotografías de calandario tornoron a amanixer dimpués, cuan Marilyn Monroe ya s'heba convertito en un personache celebre.

Joseph L. Mankiewicz paró cuenta de Marilyn y li ufrió un papel en suya cinta All about Eve (1950) a on treballó con l'actriz Bette Davis. En haber tenito exito en as suyas zagueras cintas, Marilyn Monroe negoció un contracto de siet anyadas con a 20th Century Fox en aviento de 1950. En 1951 s'inscribió en a Universidat de California en Los Angeles ta estudiar arte y literatura, y tamién actuó en chicotas cintas, encara que con conoixitos actors como Mickey Rooney, Constance Bennett, June Allyson, Dick Powell u Claudette Colbert. Encara que nunca no la nominoron a os Premios Oscar, estió ella qui entregó l'Oscar a o Millor Sonito a Thomas T. Moulton por a cinta All about Eve.

Consagración

[editar | modificar o codigo]

En 1952, Marilyn tenió un romance con Joe DiMaggio, una estrela d'o béisbol que albandonaba os campos esportivos en ixas envueltas. En os meses siguients, rodó cuatre cintas ta RKO Pictures: en primeras, Clash by Night, con Barbara Stanwyck, Paul Douglas y Robert Ryan, estando dirichita por Fritz Lang, en un papel important encara que no protagonista y en una cinta que estió un exito de publico y critica; We're Not Married!, una comedia dirichita por Edmund Goulding a on treballó con Ginger Rogers, Fred Allen y Victor Moore; Don't Bother to Knock, un drama de Roy Ward Baker a on fació o suyo primer papel protagonista, con Richard Widmark, Anne Bancroft y Donna Corcoran, estando ista una cinta sin muito exito; y Monkey Business, una comedia dirichita por Howard Hawks a on treballó con Ginger Rogers y Cary Grant y que, encara que as criticas no estioron prou favorables, tenió prou exito entre o publico.

O productor Darryl F. Zanuck creyó que Marilyn teneba prou potencial comercial y la contrató ta rodar Niagara, una cinta en a cual interpretó o personache de muller fatal que quereba asasinar a o suyo esposo, papel interpretato por l'actor Joseph Cotten. A critica apreció ista cinta, considerando a suya interpretación como "ubiertament sexual". Sindembargo, o productor Zanuck no consideraba que fuese una buena actriz, compartido ixas creyencias l'actriz Joan Crawford.

Marilyn Monroe en una escena d'a cinta Gentlemen Prefer Blondes (1953), con Tommy Noonan.

En 1953, mientres o rodache d'a cinta Gentlemen Prefer Blondes, dirchita por Howard Hawks y a on compartiba a escena con l'actriz Jane Russell, Marilyn se convertió en amiga de Jane Russell. Tamién en ixa mesma anyada rodó a cinta How to Marry a Millionaire, una comedia romantica dirichita por Jean Negulesco seguntes un guión de Nunnally Johnson y a on compartió o rodache con as actrices Lauren Bacall y Betty Grable, estando una cinta con un argumento sencillo basato en a vida de tres modelos que miraban de casar-se con un millonario. Istas dos cintas contribuyoron a enamplar a suya creixent popularidat entre o publico estausunidense. Sindembargo, Marilyn expresó mientres una entrevista en o diario New York Times a suya pretensión de fer un papel dramatico, pretensión que fació saber tamién a Darryl F. Zanuck, qui se negó mesmo a fer-ne as prebas pertinents t'a cinta The Egyptian que dirichió Michael Curtiz en 1954 y a on o papel que Marilyn miraba de fer lo interpretó Jean Simmons. Ta compensar, li ufrioron o papel protagonista en a cinta River of No Return, un western dirichito en 1954 por Otto Preminger seguntes un guión de Frank Fenton, compartindo escena con Robert Mitchum. Marilyn afirmó dimpués que mereixeba bella cosa millor que un papel en una cinta de western de serie Z, y mientres o rodache tenió muitos problemas con o director Otto Preminger, con qui remató por no parlar-ne. Cuan li ufrioron un papel en una cinta compartindo parella escenica con Frank Sinatra, se negó y a productora 20th Century Fox li suspenió o suyo contrato.

Marilyn Monroe en una escena d'a cinta Gentlemen Prefer Blondes (1953), con Jane Russell.

O 14 de chinero de 1954, Marilyn casó con Joe DiMaggio, una estrela d'o béisbol estausunidense, y en una entrevista en a prensa afirmó que dende ixe inte, a suya principal ambición yera la d'adedicar-se a o suyo matrimonio. En febrero, fació una chira por Corea d'o Sud ta cantar-ie debant d'as tropas de l'Exercito estausunidense que se i trobaban destinatas. En marzo de 1954, cuan tornó a Hollywood, arregló as suyas diferencias con a 20th Century Fox y rodó a cinta musical There's No Business Like Show Business, dirichita por Walter Lang, con un guión de Phoebe Ephron y Henry Ephron, con partecipación d'Ethel Merman, Dan Dailey, Donald O'Connor, Johnnie Ray y Mitzi Gaynor, encara que a cinta estió un fracaso, amás de tener criticas muit negativas. Marilyn desveló que no heba acceptato ixe papel mas que con a condición de rodar a continación The Seven Year Itch, dirichita por Billy Wilder con partecipación de Tom Ewell en o papel protagonista masculín. O rodache d'as escenas d'a cinta prencipió en setiembre de ixa mesma anyada, en a ciudat de Nueva York. Rodó asinas una d'as suyas escenas mas conoixitas, cuan o viento que provién d'una rella d'aireyación d'o metro d'a ciudat levanta as suyas faldas, anque o director fació muitas tomas d'ixa escena, una cosa que remató por molestar a Joe DiMaggio, precipitando o suyo esvurcio en noviembre, dimpués d'un matrimonio que no heba existito mas que ueito meses.

Marilyn Monroe en una escena d'a cinta How to Marry a Millionaire (1953), con Lauren Bacall, William Powell y Betty Grable.

En 1955, a traviés de Truman Capote, contactó con l'actriz britanica Constance Collier, de qui recibió clases de comedia, pero que morió o 21 de mayo de 1955. Marilyn demandó a la suya productora de treballar con Alfred Hitchcock, con qui heba treballato Collier, pero a Hitchcock no li cuacaban as actrices con un apariencia tan sexual como teneba Marilyn Monroe y preferiba treballar con actrices royas mas frías, como Grace Kelly u Tippi Hedren. Cuan rodaba There's No Business Like Show Business en 1954, Marilyn heba conoixito a Paula Strasberg y a la suya filla Susan Strasberg, y asinas lis demandó d'estudiar en l'Actors Studio con Lee Strasberg, o marito de Paula y pai de Susan, que en yera uno d'os establidors. Cuan conoixió a Lee Strasberg, iste l'acceptó como alumna.

Tamién en mayo de 1955, Marilyn Monroe inició a suya relación con o dramaturgo Arthur Miller, a qui heba conoixito feba cinco anyadas. Antiparte, l'1 de mayo Joe DiMaggio l'acompanyó a la presentación d'a cinta The Seven Year Itch, organizando tamién una fiesta en a suya honor. A fiesta remató con una baralla publica entre toz dos, estando muito tiempo sin mesmo charrar-se. Marilyn continó en ixas envueltas as suyas clases en l'Actors Studio, fendo-ie amistad con os actors Kevin McCarthy y Eli Wallach. Tamién fació bellas actuacions en a escena teatral, como en Anna Christie, una obra d'Eugene O'Neill a on treballó con Maureen Stapleton. Asinas, a Lee Strasberg li cuacaba muito a suya alumna favorita, decindo que encara que heba treballato con cuantos actors, dos en destacaban: Marlon Brando y Marilyn Monroe.

Paralelament, a suya cinta The Seven Year Itch estió un exito de publico y de recaudación, y a critica alababa as suyas capacidaz interpretativas, asinas que Marilyn negoció con a productora 20th Century Fox un nuevo contrato, que no nomás li ufría unos beneficios mnoetarios millors sino que, amás, li permeteba de controlar os guions d'as suyas cintas, y tamién os directors de fotografía y os escenografos y, ta rematar, li permeteba dtreballar ta atros estudios cinematograficos.

A primera cinta en a cual se treballó seguntes istas nuevas condicions estió Bus Stop, dirichita por Joshua Logan en 1956, a on l'actriz compartió escena con Don Murray, Arthur O'Connell y Betty Field, y a on o director estió d'alcuerdo con as trazas de treballar de l'actriz, qui decidió tamién contractar a Paula Strasberg ta que se convertise en a suya consellera personal en as suya futuras cintas. Sindembargo, Paula Strasberg provocó situacions de tensión con cualques directors en l'exercicio d'as suyas funcions, en estar Paula a qui Marilyn demadaba en rematar de filmar cada escena si a suya interpretación li heba cuacato, obligando a la repetición d'a filmación de cuantas escenas con o consiguient augmento de gastos y perduga de tiempo en as filmacions.

En ixas envueltas, Marilyn ha heba consolidato a suya relación con o escritor Arthur Miller, y a prensa prencipió a charrar d'una relación que ya teneba una durada de mas d'una anyada, con a cual cosa rematoron por casar-se o 2 de chunio de 1956.

A suya siguient cinta estió The Prince and the Showgirl, a on Marilyn treballó ta Laurence Olivier, que yera director y a la vegata tamién l'actor masculín principal d'a cinta, y qui se sentiba molesto por os caprichos de l'actriz en a escena. Ista cinta no tenió exito de publico en Estaus Unius, encara que remontó en Europa (a on la nominoron ta un Premio David di Donatello y ta un Premio BAFTA).

En 1958 l'actriz no estió present en os escenarios, centrando-se en o suyo matrimonio con Arhur Miller, plegando a tener un alborto natural l'1 d'agosto de 1957. debant de tot ixo, o suyo marito li deció de tornar a o cine, a on treballó en Some Like It Hot dirichita por Billy Wilder, chunto con os actors Tony Curtis y Jack Lemmon (amás de George Raft, Joe E. Brown y Pat O'Brien). Mientres o rodache d'a cinta Marilyn tenió problemas por a suya manca d'atención, por oblidar-sen de escenas, etc. Con tot ixo remató a suya amistat con Tony Curtis, qui deciba que besar-la yera alto u baixo como besar a Hitler. Estando prenyata mientres o rodache, tenió un atro alborto en aviento de 1958, cuan ya heba rematato a filmación d'a cinta.

Con a suya cinta Some Like It Hot (1959, Billy Wilder, con Tony Curtis, Jack Lemmon, George Raft, Joe E. Brown y Pat O'Brien) tenió un important exito, estando a cinta nominata a cinco Premios Oscar. Amás, Mrilyn fue nominata a o Globo d'Oro a la Millor Actriz de Musical u Comedia por a suya actuación. Encara que l'actriz deciba dimpués que a cint no li heba cuacato, o director Billy Wilder afirmaba que heba estato o suyo exito mas gran.

Anyos 1960

[editar | modificar o codigo]

Asinas, en prencipiar os anyos 1960, l'actriz se trobaba en o punto culminant d'a suya carrera cinematografica, y heba convertito en una actriz consagrata de raso, con a-saber-los exitos destacatos, prou conoixita internacionalment y con cuantos premios destacatos u nominacions. Asinas, en 1960 acceptó rodar cinta Let's Make Love, dirichita por George Cukor, a on treballó con actors como Yves Montand, Tony Randall, Frankie Vaughan, Wilfrid Hyde-White u David Burns, encara que, en no cuacar-li o guión (de Norman Krasna y Hal Kanter) fació que Arthur Miller lo reescribise. Por ixo renunció Gregory Peck, qui en primerías yera previsto que tenese o papel masculín protagonista en a cinta, amás de renunciar succesivament os actors Cary Grant, Charlton Heston, Yul Brynner y Rock Hudson antis de que l'acceptase Yves Montand. Mientres o rodache, bi habió problemas, en sentir atracción o director (que yera ubiertament homosexual) por Yves Montand, con qui en ixe inte Marilyn prencipió una relación sentimental, que remató cuan Yves se negó a albandonar a la suya muller, Simone Signoret. Por tot ixo, a cinta estió un fracaso de raso, mesmo de critica que de publico.

En ixas envueltas estió cuan se facioron patents os suyos problemas de salut, y Marilyn prencipió as suyas consultas con un psiquiatra de Los Angeles, o doctor Ralph Greenson, a qui veyeba cuasi cada día, y que exerceba una influencia determinant en o suyo pacient. Dimpués Greenson declaró que o suyo obchectivo en ixe inte yera de reducir a dependencia de Marilyn respective d'as drogas, en tener l'actriz una clara drogadicción.

L'actriz Marilyn Monroe, en una escena d'a cinta The Misfits.

A suya siguient cinta estió The Misfits, con un guión d'Arthur Miller y dirichita por John Huston, treballando con os actors Clark Gable, Montgomery Clift, Thelma Ritter, Eli Wallach, Kevin McCarthy y James Barton. O rodache prencipió en chulio de 1960, y estió prou difícil por os problemas de salut de l'actriz, que muitos días no podeba treballar por a suya malautía, plegando mesmo a estar ingresata en un hespital diez días. En no tener l'aduya d'o doctor Greenson, Marilyn tomaba a-saber-los somniferos y tamién alcol. O 16 de noviembre de 1960 morió Clark Gable en Los Angeles por una crisi cardiaca, y os periodistas acusoron d'a suya muerte a Marilyn por os suyos abundants retrasos en a escena ta os rodaches. A cinta estió un fracaso comercial, encara que bellas criticas charraron favorablement d'as interpretacions de Clark Gable y de Marilyn Monroe.

Mientres os meses siguients s'accentuó a dependencia de Marilyn d'as medicinas y de l'alcol, esvurciando-se d'Arthur Miller en chinero de 1961. En ixas condicions, ingresó voluntariament en una clinica psiquiatrica, trobando-se en salir a-saber-los periodistas y rematando por fuyir ta refuchiar-se en California, no estando capable de rodar garra cinta en ixas condicions.

L'anyo 1962

[editar | modificar o codigo]

Marilyn, seguntes o contracto que heba sinyato con a productora 20th Century Fox en 1956, encara teneba que rodar una cinta t'a productora, que encargó a o guionista Arnold Schulman un remake d'a cinta de 1940 My Favorite Wife que heban interpretato Irene Dunne y Cary Grant. Yera a historia d'una muller desapareixita qui, en tornar a la suya casa, trobaba a o suyo marito casato con unatra muller, y a productora contractó a Frank Tashlin ta dirichir-la. En primeras, Marilyn, qui miraba de tornar a la escena con una cinta important, refusó de rodar a cinta, que consideraba que yera "insipida", pero acceptó de tornar a revisar a suya opinión si se feban cambeos en o guión. Asinas, a productora contractó a Nunnally Johnson ta que fese una nueva versión d'o guión, y cambeó tamién de director, ista vegata enta George Cukor, qui tamién teneba que rodar una cinta t'a productora seguntes o suyo contracto. En primeras George Cukor refusó, en remerar as caracteristicas d'o rodache que heba feito d'antis mas con Marilyn, pero remató por acceptar dimpués d'as presions d'a productora. Asinas, director y actriz sinyoron ta fer una cinta, Something's Got to Give, que encara no teneba rematato o suyo guión. Cuan Nunnally Johnson remtó o nuevo guión, Marilyn l'aprobó, encara que Cukor encargó a o suyo amigo Walter Bernstein de reescribir os dialogos d'a cinta. Tamién se contractó a los actors Dean Martin y Cyd Charisse. O 23 d'abril, cuan heba de prencipiar o rodache, Marilyn yera malauta, y o director prencipió o rodache por as escenas a on l'actriz no heba d'aparecer. O medico d'a productora recomendó dixar un mes de reposo a l'actriz, pero a productora se negó y o 30 d'abril l'actriz rodó o suyos primers planos d'a cinta.

Encara que a productora li heba prohibito d'albandonar o rodache, Marilyn s'escapó mientres una pausa, ta asistir en Nuva York a la fiesta de cumpleanyos de John Fitzgerald Kennedy. mientres a cual cantó o famoso Happy Birthday, Mister President. Jacqueline Kennedy, qui se negaba a que Marilyn asistise, marchó enta Virchinia con os suyos fillos. Cuan Marilyn tornó a o rodache, as escenas que heba rodato cuacaban a la productora, pero a escape prencipió a tener problemas, en no estar capable d'aprender-se os papels, tenendo por ixo descusions con George Cukor. O 7 de chunio, a productora anunció que rescindiba o contracto de l'actriz, que li reclamaría 500.000 dólars por incumplimiento de contracto y que Kim Novak continaría con o rodache d'a cinta. Sindembargo, Novak y Shirley MacLaine refusoron, acceptando-lo en zaguerías Lee Remick.

Dean Martin refusó de continar con a cinta en absencia de Marilyn, y a productora anunció que tamién lo demandaba por a cantidat de 500.000 dólars, pero rematoron por suspender o rodache. Alavez, Cyd Charisse demandó a Dean Martin por 14.000 dólars por danyos, y a productora augmentó a suya demanda enta Marilyn dica 750.000 dólars, y enta Dean Martin por 3.339.000 dólars. Antiparte, Dean Martin demandó a la productora por 6.885.000 dólars, fendo iste escandalo as delicias d'a prensa. Dimpués d'una anyada, s'albandonoron todas as reclamacions.

En ixas condicions, a productora anunció que tornaría a rodar a cinta y Marilyn, en una campanya de relacions publicas, prencipió una serie d'entrevistas en prensa y anunció nuevos prochectos de cintas, y mesmo que tornaría a casar-se con Joe DiMaggio o 8 d'agosto de 1962. En zaguerías, a 20th Century Fox li renovó o suyo contracto, y s'anunció que se tornaría a rodar a cinta inacabata, encara que con un nuevo guión y con un nuevo director, Jean Negulesco.

A tumba de Marilyn Monroe.

Asinas, en ixas condicions de tensión, Marilyn accentuó l'emplego de somniferos, y cuantos testimonios d'ixos primers días d'agosto afirman que se trobaba baixo a influencia d'ixas drogas. Morió en a nueit d'o 4 a o 5 d'agosto por una sobredosi de medicamentos, plegando a afirmar-se que se tractaba d'un suicidio. Fue apedacata o 8 d'agosto en o Westwood Memorial Cemetery de Los Angeles.

Premios

[editar | modificar o codigo]

Marilyn Monroe recibió o Globo d'Oro a la Millor Actriz de Musical u Comedia en 1960 por o suyo papel en a cinta Some Like It Hot, de Billy Wilder.

Filmografía

[editar | modificar o codigo]
Marilyn Monroe en a cinta Gentlemen Prefer Blondes (1953).

Bibliografía

[editar | modificar o codigo]
  • Churchwell, Sarah. The Many Lives of Marilyn Monroe. Metropolitan Books, 2004. ISBN 0-8050-7818-5.
  • Clayton, Marie. Marilyn Monroe: Unseen Archives. Barnes & Noble Inc., 2004. ISBN 0-7607-4673-7.
  • Evans, Mike 2004. Marilyn: The Ultimate Book. MQ Publications, 2004. ASIN B000FL52LG.
  • Gilmore, John. Inside Marilyn Monroe, A Memoir. Ferine Books, Los Ángeles, 2007. ISBN 0-97889680-7.
  • Goode, James. The Making of "The Misfits". Limelight Editions, Nueva York, 1986. ISBN 0-87910-065-6.
  • Guiles, Fred Lawrence. Norma Jean: The Life of Marilyn Monroe. Paragon House Publishers,1993. ISBN 1-55778-583-X.
  • Jewell, Richard B.; Harbin, Vernon. The RKO Story. Octopus Books, Londres, 1982. ISBN 0-706-41285-0.
  • Monroe, Marilyn; Hecht, Ben. My Story. Cooper Square Press, 2000. ISBN 0-8154-1102-2.
  • Riese, Randall; Hitchen, Neal. The Unabridged Marilyn. Corgi Books, Londres, 1988. ISBN 0-552-99308-5.
  • Spoto, Donald. Marilyn Monroe: The Biography. Cooper Square Press, 2001. ISBN 0-8154-1183-9.
  • Staggs, Sam. All About "All About Eve". St. Martin's Griffin, Nueva York, 2000. ISBN 0-312-27315-0.
  • Summers, Anthony. Goddess, The Secret Lives of Marilyn Monroe. Guild Publishing, Londres, 1985. ISBN 0-575-03641-9.
  • Michael Conway y Mark Ricci. Todas las películas de Marilyn Monroe. RBA Editores, Barcelona, 1994. ISBN 84-473-0475-2
  • Michel Schneider: Últimas sesiones con Marilyn. Editorial: ALFAGUARA, Madrid, 2008. ISBN 84-204-7219-0

Vinclos externos

[editar | modificar o codigo]

Predecesor:
Rosalind Russell 		Globo d'Oro a la Millor Actriz de Musical u Comedia
1960 		Succesor:
Shirley MacLaine


Obteniu de "https://an.wikipedia.org/w/index.php?title=Marilyn_Monroe&oldid=2222135"