B.P.J. Erasmus

B.P.J. Erasmus
Gebore	Barend Petrus Jacobus Erasmus (1930-12-15)15 Desember 1930
Sterf	8 Februarie 2012 (op 81)
Nasionaliteit	Suid-Afrika
Beroep	Skrywer
Bekend vir	Op Pad in Suid-Afrika
Kinders	4

Barend Petrus Jacobus Erasmus (15 Desember 1930 – 8 Februarie 2012) was ’n Suid-Afrikaanse skrywer wat veral bekend is as outeur van die boek Op pad in Suid-Afrika.

Biografie

Barend Petrus Jacobus Erasmus is op 15 Desember 1930 gebore. Hy verwerf grade in klassieke en moderne tale aan die Universiteite van Stellenbosch en Kaapstad, laasgenoemde verwerf hy summa cum laude. ’n Groot deel van sy loopbaan bring hy deur in die diplomatieke diens in Den Haag en Londen, waar hy onder meer inligtings-attaché is. Verder is hy ook redakteur van verskeie tydskrifte, waaronder Panorama. Hy verhuis in 1989 na aftrede vanaf Pretoria na Philipstown, ’n dorp in die Bo-Karoo.

Hy was getroud en sy vier kinders, almal met universiteitsgrade, het almal na die buiteland geëmigreer. Sy seun Johan sterf in 2007.

Hy is op 8 Februarie 2012 oorlede.

Skryfwerk

Die nege kerse van Magriet is ’n roman oor ’n toekomstige Suid-Afrika. Die Magriet van die titel is die vrou van Werner Jansen en die verhaal speel oor verskeie geslagte van die Jansen-familie af, terwyl die nege kerse verwys na die aantal naasbestaandes van Magriet wat omkom in die stryd teen ongeregtigheid in Suid-Afrika. Werner is eers diplomaat en later lid van die beweging wat die apartheidsregering in Suid-Afrika tot ’n val wil bring en sodoende ’n nuwe en beter toekoms vir al sy mense wil verseker, maar word eindelik deur die organisasie self verraai. Sy seun Freek sweer wraak en word eindelik leier van ’n ondergrondse terreur-organisasie (geborg deur Westerse regerings) wie se doel dit is om Suid-Afrika onregeerbaar te maak sodat dit nie ’n veilige hawe word vir internasionale terroristebendes wat korrupte regerings omkoop en sodoende ’n vastrapplek verkry nie. Die lede word hoofsaaklik gewerf onder Afrikaners wat geliefdes in geweld in die land verloor het. Dit is nie ’n groot roman nie, daarvoor is die karakterbeelding te eendimensioneel, die karakterontwikkeling te beperk en die dialoog propagandisties eerder as natuurlik. Die uitbeelding van die toekoms van die land is egter ontstellend, aangesien die korrupsie, selfverryking en verval wat daarin voorspel word en die feit dat dit by die stembus beloon en nie gestraf word nie, baie na aan die waarheid is soos dit alreeds binne die land ervaar word. Ons het dus hier te doen met ’n moontlik realistiese, al is dit 'n polities nie-korrekte, uitbeelding van die toekoms en hierdie feit maak dit dus tog ’n belangrike roman.

Op Pad in Suid-Afrika (in Engels beskikbaar as On Route in South Africa) is ’n streek-vir-streekgids, waarin hy verslag doen van die magdom gehuggies, dorpe en stede wat Suid-Afrika so ’n interessante plek maak. Die oorsprong van plekname word in besonderhede beskryf, die karakter en aantreklikhede van plekke word geskets en die geskiedenis en interessante en informatiewe verhale van die plekke word vertel. Ingesluit in elke hoofstuk is gedetailleerde streekskaarte, aangevul met roete-aanwysings in die teks.

Barend Erasmus was ook die samesteller van ander naslaanwerke en vertaler van onder andere Philip Yancey se Teleurstelling in God: drie vrae wat niemand hardop vra nie en Henry Cloud en John Sims Townsend se Grense: wanneer om ja te sê en wanneer om nee te sê om jou lewe onder beheer te kry.

Bibliografie

• Die nege kerse van Magriet. (ISBN 0-620-34211-0).
• On Route in South Africa, 1995, 368 bladsy, ISBN 1-86842-026-4, ISBN 978-1-86842-026-1
• Op Pad in Suid-Afrika, 2004, 400 bladsye, ISBN 1-86842-149-X, ISBN 978-1-86842-149-7

Vertalings

• Teleurstelling in God: drie vrae wat niemand hardop vra nie, 2002, 260 bladsye, ISBN 1-86842-135-X, ISBN 978-1-86842-135-0
• Grense: wanneer om ja te sê, wanneer om nee te sê om jou lewe onder beheer te kry, 2002, 344 bladsye, ISBN 1-86842-115-5, ISBN 978-1-86842-115-2

Bronne

Boeke

• Erasmus, Barend P.J. “Die nege kerse van Magriet” Verba Nova Philipstown Eerste druk 2006

Eksterne skakels

• Boeke deur Erasmus wat op Google Books gelys is