Chaple d'Orador de Glana

Lo chaple d'Orador de Glana designa lo murtre, lo 10 de junh de 1944, de la quasi totalitat dels abitants del vilatge lemosin d'Orador de Glana (Occitània) per un destacament del 1èr batalhon de la Panzerdivision Das Reich. Lo bilanç foguèt de 642 victimas. Après uèch ans d'instruccion, 21 soldats, demest los quals 14 Alsacians, compareguèron davant lo Tribunal militar de Bordèu en 1953. Lor condemnacion amodèt protèstas vivas en Alsàcia. Beneficièron d'una amnistia immediata o foguèron lèu liberats, çò que suscitèt de reaccions amaras en Lemosin.