Vestnes

	Vestnes
	Helland
	tettstad
Land	Noreg
Fylke	Møre og Romsdal
Kommune	Vestnes
Areal	2,06 km²
Folketal	2 555 (2023)
Folketettleik	1 240 / km²
Postnummer	6390 VESTNES
Innbyggjarnamn	vestnesing
Preposisjon	på Vestnes
	; Vestnes; 62°37′31″N 7°05′13″E / 62.6253°N 7.08694°E
	Wikimedia Commons: Vestnes (village)

Vestnes er ein tettstad og administrasjonssenteret i Vestnes kommune i Møre og Romsdal. Tettstaden ligg vest for munningen av Tresfjorden, på begge sidene av Vestnesstraumen som frå Tresfjorden fører inn til den tre kilometer lange og ein kilometer breie bukta Flatevågen. Vestnes er den største tettstaden i kommunen og har 2 555 innbyggjarar per 1. januar 2023.

Vestnes tettstad har atskilleg handels- og tenesteverksemd, i tillegg til industri. Her ligg mellom anna industribedrifta Aas mekaniske verksted. Båtbygging har stått særleg sterkt på Vestnes, og sør for tettstaden ligg det eit båtbyggarmuseum.

Delen av tettstaden som ligg sør for Vestnesbrua er kalla Helland. Her ligg mellom anna Helland skule og Helland barnehage. Avisa Vestnesavisa kjem ut ein dag i veka på Vestnes. Vestnes kyrkje i sentrum er ei langkyrkje i tre frå 1872 og er den tredje kyrkja som vart reist på staden. Den første var ei stavkyrkje som vart riven i 1680.

Vestnes tettstad har hurtigbåtsamband med Vikebukt, Sekken og Molde. Europaveg 39 går gjennom Vestnes, med bilferje til Molde frå Furneset rundt tre kilometer nord for tettstaden. Fram til 1986 gjekk ferja til Molde frå Vestnes sentrum, men ferjestaden har framleis namnet «Vestnes».^[1] Europaveg 136 (Dombås–Åndalsnes–Ålesund) går i bru over Tresfjorden direkte sør for tettstaden.^[2]