Paul Joseph Weitz

Paul Weitz - offiziell NASA-Foto

Paul Joseph Weitz (* 25. Juli 1932 in Erie, Pennsylvania, USA; † 23. Oktober 2017 in Flagstaff, Arizona) weer en amerikaansch Astronaut.

Loopbahn

De Vader vun Weitz weer wiels den Tweeten Weltkrieg Bootsmann in de amerikaansch Marine, so keem Weitz all fröh mit dat Militär in Berührung. All as Schöler wull he Marinefleeger wurrn.

Weitz hett 1949 de Harborcreek High School in Harborcreek (Pennsylvania) afslooten. Dornah studeer he mit en Stipendium vun de Marine an de apenlich Pennsylvania State University Luftfohrttechnik un kreeg 1954 sien Bachelor-Afsluss.

Weitz is in de US Navy intreeden un een Johr Deenst up den Zerstörer „USS John Bole“ leist, bevör he to’n Marinepiloten utbildt wurr. Dornah hett he as taktisch Utbilder in Florida un as Projektoffizier in Kalifornien arbeit, wo he Luft-Bodden-Wappen proovt hett. Up Bedrieven vun de Marine hett he af 1962 sien Luftfohrttechnik-Studium an de Naval Postgraduate School in dat kalifoornsch Monterey fortsett, wo he ünner annern de lateren Astronauten Gene Cernan, Ronald Evans un Jack Lousma drapen dee. Sien Mastertitel kreeg he 1964.

Dornah nehm Weitz sien Militärdeenst weer up. He wurr den „Four Runners“, dat 4. Kampgeschwader todeelt, dat up Whidbey Island (Washington) statschoneert is. Wiels den Vietnamkrieg flog he mit sien Staffel Insätze mit den Bomber A-3B „Skywarrior“.

Astronautentätigkeit

Ünnerstütten bi de Maandmissionen

Weitz keem mit de 5. Astronautengrupp an‘ 4. April 1966 to de NASA. Noch wiels sien Grundutbillen weer he bi dat Apollo-Programm as technischer Berader tätig un hett an den Entwurf vun dat Experimentenpakets ALSEP mit arbeit. In‘ April 1969 wurr he de Ünnerstüttensmannschap vun Apollo 12 todeelt. Ünner annern hett he dorbi as Verbinnensspreker (Capcom) arbeit.

Skylab

Nah den Floog vun Apollo 13 wurr Weitz 1970 to dat Apollo Application Program (AAP) todeelt, dat to disse Tiet as eenzig Projekt an de Ruumstatschoon Skylab arbeiten dee. För Weitz bedüüd dat, dat he mit hooch Wohrschienlichenkeit nicht o en Maandfloog kommen würr. Ok hier weer he wedder an den Entwurf un Entwicklung vun en Experimentenpaket mitwarkt, ditmal an dat Earth Resources Experiment Package (EREP).

An‘ 19. Januar 1972 wurr Weitz offiziell as Pilot för Skylab 2 indeelt, de eerst Besatten vun de nee Ruumstatschoon. En Weltruumutstieg weer för Weitz dorbi aber nich vörsehn.

Tosommen mit Charles Conrad, de dat Ünnernehmen Skylab 2 leiten dee, un Joe Kerwin is Weitz an‘ 25. Mai 1973 as Pilot vun de eerst Mannschap to de Ruumstatschoon upbraken. Wiels de eerst Hälft vun den veer Week lang düern Floog mussen de dree Astronauten de bi den Start beschädigt Statschoon in en bewahn- und bruukboren Tostand bringen. Noch bevör dat Trio de Station betreeden dee, hett Weitz denn doch en Butenbordinsatz dörführt, um en Solarzellenutlegger to entfalten. He stunn dorbi in de apen Luke vun de Apollo-Kommandokapsel, wiels Kerwin hüm an de Beenen fasthollen un Conrad dat Ruumschipp manövreeren dee. Disse Versöök muss aber nah 40 Minüten ahn Spood upgeeven wurrn.

Eerst dornah kunnen se doran gahn, sück mit hör oorsprünglich Upgaav, de wetenschapliche Forschung, to befaaten. Gegen Enn‘ vun de Mission hemm Weitz un Conrad de Orbitalstatschoon verlaaten, um Filmkassetten to wesseln. Oorsprünglich weer Kerwin för dissen Insatz vörsehn, de harr aber togunsten vun Weitz torüchtrucken.

Mit hör Lannen Enn‘ Juni harrn de dree mit 28 Daag en nee Langtietrekord in de bemannt Ruumfohrt upstellt, de allerdings all kört dornah vun de Skylab-3-Mannschap överboden wurr.

LANDSAT

Nah Afsluss vun dat Skylab-Programm hett Paul Weitz etwa een Johr lang as Berader för en Anwennen vun de Landsat-Satelliten arbeit. Dat Teel vun dat Projekt LACIE (Large Area Crop Inventory Experiment) weer dat Vörherseggen un Erfaaten vun de Getreideproduktschoon dör Satellitenbeobachtung.

Space Shuttle

Af 1975 kümmer sück Weitz um de nächste Generatschoon vun de bemannt Ruumfohrtüüch vun de USA, dat Space Shuttle. Dat düür aber noch mal negen Johr, bit he de Gelegenheit kreeg, mit en Ruumfähre ok to fleegen.

STS-6 weer Weitz sien tweet un togliek letzt Mission. Dat weer de Jumfernfloog vun den Orbiter Challenger un funn in‘ April 1983 statt. Weitz weer Kommandant vun de Mission, Karol Joseph Bobko de Pilot. Dorto keemen de beid Missionsspezialisten Don Peterson un Franklin Story Musgrave). De dree anner Astronauten hemm dorbi all hör eersten Floog maakt. Hööftupgaav vun dit Ünnernehmen weer dat Utsetten vun TDRS-1, en NASA-eegen Nahrichtensatelliten, un de Erprooven vun de nee Ruumantüüch bi den eersten amerikaanschen Weltruumutstieg siet Skylab.

Nah de Lannen an‘ 9. April 1983 harr Weitz insgesamt 33 Daag, 1 Stünnen un 13 Minüüt in‘ Weltruum tobrocht.

Management-Karriere bi de NASA

All vör sien Shuttlefloog wurr Weitz to’n stellvertreden Baas vun dat Astronautenbüro nömmt, wo he ünner John Young arbeiten dee. Wiels Young sien Vörbereiten för sien Floog STS-9 muss Weitz hüm meest vullständig ersetten.

Dornah wessel he in de Führungsebene vun dat Johnson Space Centers (JSC). He weer dor tonächst technischer Berader vun den JSC-Direkter, bit he 1987 to’n Viezdirektor vun dat JSC in Houston nömmt wurr. Wiel sien Chef Aaron Cohen völ Tiet in dat NASA-Hööftquartier in Washington verbroch, führ Weitz dat JSC tietwies alleen. As Cohen in‘ August 1993 de NASA verlaaten hett, weer Weitz ok offiziell kommissarisch Baas vun dat JSC, bit Carolyn Huntoon in‘ Januar 1994 dit Amt övernehm. In‘ Mai 1994 gung Paul Weitz in den Ruhestand. In‘ Oktober 1997 wurr he in de Astronaut Hall of Fame upnommen.

Persönliches

Paul Weitz weer verheiraadt un harr twee Kinner. An‘ 23. Oktober 2017 is he in sien Huus in Flagstaff storven, nahdem bi hüm dat Myelodysplastisches Syndrom faststellt wurrn weer.

Weblenken

Paul J. Weitz. Mehr Biller, Videos oder Audiodateien to’t Thema gifft dat bi Wikimedia Commons.

• NASA: Biografie (engelsch)
• spacefacts.de: Körtbiografie
• Oral History – Mitschriften vun Interviews (engelsch)
  • Interview van‘ März 2000, 67 Sieden, 374 KB, PDF-Dokument
  • Interview van‘ November 2000, 61 Sieden, 409 KB, PDF-Dokument
• Rogers Report, Anhörung vun Paul Weitz un annern vör de Ünnersökenskommission vun dat Challenger-Unglücks an‘ 3. April 1986 (engelsch)