Matthias (HRR)

Matthias (* 24. Februar 1557 in Wien; † 20. März 1619 ok dor) weer Kaiser vun dat Hillige Röömsche Riek vun Düütsche Natschoon un Erzhartog vun Öösterriek vun 1612-1619. Al vun 1608 af an is he König vun Ungarn (as Mátyás II.) un vun Kroatien (as Matija II.) ween. Vun 1611 af an weer he ok König vun Böhmen (ok as Matyáš II.). Sien Wahlspröök weer Concordia lumine maior („Eendracht is grötter as Licht“). He hett en sunnerliche Rull speelt, as dat Huus Habsborg sik gegen sien Broder Kaiser Rudolf up'e Achterbeen stellen dö. Man, nadem he de Macht an sik reten harr, weer dat ok man minne, wat he in'e Politik togange brocht hett. Wo dat in'e Politik langs gung, hett sien Kanzler Melchior Khlesl bestimmt, bit he afsett wurrn is. Mit den Böhmschen Upstand gung dat an't Enn vun Kaiser Matthias siene Regeerung los mit den Dartigjöhrigen Krieg.

Matthias is de veerte Söhn ween vun Kaiser Maximilian II. un vun Maria vun Spanien. Siene Bröer weern de Kaiser Rudolf, Ernst (later sunnerlich Stattholler in de Nedderlannen), Maximilian (den Düütschen Orden sien Hoochmeester, Stattholler vun Vörder Öösterriek), Albrecht (Erzbischop vun Toledo, later Stattholler vun de Nedderlannen) un Wenzel (Grootprior vun den Orden vun de Johanniters in Kastilien). Denn hett he ok noch sess Sustern harrt. Dör de Hochtied mit Anna weer he de Swager vun Philipp II. vun Spanien un over Elisabeth weer he Swager vun Karl IX., den König vun Frankriek.

Sien Vörweser as Kaiser is sien Broder Rudolf ween, Nafolger weer Ferdinand II.. Egene Kinner hett Matthias nich harrt.

Literatur

Brigitte Vacha (Rutg.): Die Habsburger. Eine europäische Familiengeschichte. Wien, 1992, S. 189–192
Rudolf John Schleich: Melchior Khlesl and the Habsburg Bruderzwist. 1605–1612, New York, 1968
Bernd Rill: Kaiser Matthias. Bruderzwist und Glaubenskampf, Graz 1999, ISBN=3-222-12446-9
Arno Paduch: Die Kaiserkrönung Matthias I. als musikgeschichtliches Ereignis, in: Concerto Band 210, 2006, Siet 20–21