Heist-Movie
Heist-Movie (vun engl. heist IPA: ˈhaɪst ‚Roov‘, ‚Överfall‘; wenn Komik mit dorbi is, ok Caper-Movie vun engl. caper ‚Gauneree‘) is en Filmgenre, dat to de Grupp vun de Thriller höört. Filmen ut dit Genre hannelt normalerwies vun dat Planen, Vörbereiten un opletzt dat Dörföhren vun en ungewöhnlichen, riskanten, mitünner schier unmööglichen Roof. De Inholt warrt dorbi ut de Sicht vun de Rövers wiest un se sülvst warrt tomeist as de Sympathiedrägers dorstellt.
Etymologie
[ännern | Bornkood ännern]De Begreep Heist is’n US-amerikaanschen Jargon un steiht allgemeen för Roov oder Överfall. Dat Woort is afleddt vun to hoist „anböhren“, wat mööglicherwies in Analogie steiht to shoplift „Ladendeveree“. Jüst so kann dat Woort op dat Helpen dör en so nöömte Röverledder bi’t Hoochkladdern vun hoge Muern oder högere Finsters hendüden.
Thematik
[ännern | Bornkood ännern]Tyypsch för disse Oort vun Film is de Roov bi Banken, Museen, Juwelieren oder ok bi Privatpersonen. Faken geiht dat üm Saken, de en hogen Geld- oder ideellen Weert hebbt. Faken weet de Tokieker dorbi al teemlich fröh, üm wat för en Saak dat geiht, de klaut warrn schall, un wat de Problemen sünd, mit de de Röver oder Rövers kloorkamen mööt. Dat künnt Wachlüüd wesen, kumplizeerte Alarmanlagen oder goot sekerte Safes.
De bedüdene Inholt vun en Heist-Movie is, welke Kneep, Helpmiddels oder physische Anlagen helpen doot, de Problemen bi de Deveree to överwinnen. Untyypsch is dorgegen dat Anwennen vun körperliche Gewalt oder sogor vun Moord, üm an’t Teel antokamen. För den Spannungsbagen is dat aver nich üngewöhnlich, dat Plaans ännert warrn mööt, oder dat Torüchslääg to affungen warrn mööt. Wenn dat in den Film üm en Koppel vun Rövers geiht, gifft dat in de Grupp sülvst faken ok Scherereen, Verraat oder Geld Afpressen ünnerenanner
Filmen
[ännern | Bornkood ännern]De Film, de dissen Film begrünnt hett, is de franzöösche Film Du rififi chez les hommes (dt.: Rififi) ut dat Johr 1955. Dorin geiht dat üm’t Inbreken in en Juwelier-Laden. De Spood vun den Film weer de Grundlaag nich blots för vele Nafolger-Filmen un Afwanneln, man hett in de Narichtenspraak ok de Floskel „op feinste Rififi-Oort“ inföhrt, mit de Inbröök vun disse Oort beschreven warrt.
Mit den Film Klatretøsen (dt.: Kletter-Ida) is 2002 ok de eerste Kinnerfilm in’t Heist-Movie-Genre ümsett worrn.