Industrio
Industrio (de la Latina industrius, "diligenta, laborema") esas ensemblo di procedi por transformar prima materiari en vari konsumebla, sive por personi, sive por altra industrii. Segun altra defino, industrio esas la manufakturo di vari o servadi aden ula kategorio[1]. En ekonomio la vorto uzesas kom sinonimo di sekundara sektoro, t.e., l'ekonomial agadi kontenata en la transformo de prima materiari en vari e produkturi.[1]
Pos ke la homo aparis en la Tero, lu bezonis transformar la kozi existanta en la naturo en produkturi utila a lu. Do, stricto sensu, l'industrio esas milyara agado. Tamen, nur dum la fino dil 18ma yarcento til la fino dil 19ma yarcento l'industriala procedi modifikesis intense, dum la surnomizita "industriala revoluciono". L'industrio esis la maxim importanta ekonomial agado del mondo de la duesma duimo dil 19ma yarcento til la fino di la Duesma mondomilito. Pos la yari 1950ma, kun la granda adopto di automatigo e la kresko di la produktiveso, l'industrio superiresis dal sektoro di servadi kom maxim importanta ekonomial agado.
Granda kresko dil industrial agado komencis en Anglia dum la 18ma yarcento kun l'invento e developo di vaporomashino, unesme uzata por produktar texuri ed explotar karbono en mineyi. La granda kresko di produktiveso efektigis rapida modifiko en la sociala ed ekonomiala strukturi di multa landi, ed originis la transformi konocata kom industriala revoluciono.