Cecili Stazi

Cecili Stazi (par latin Caecilius Statius; III - II secul p.d.C.) fo un poete antîc roman, autôr di comediis.

Biografie

Ciceron, che lu preseà un grum ma no i sparagnà critichis

O savìn pôc de sô vite. Nassût fra i Gals insubris, forsit a Milan, tal 222 p.d.C., al fo cjapât di frut dai Romans, che a cuistavin chê regjon, e puartât vie come sclâf; po fo sfrancjât di un de famee dai Cecîls, che a jerin tal zîr di Eni, che difat a jerin amìs. Come che al dîs Terenzi, tal principi lis sôs comediis feris crope, ma daspò il sucès rivà, sedi pe braure dal innomenât atôr Ambivi Turpion sedi, forsit, pe muart di Plaut, che lu fuscave cul so teatri e cuntun stîl plui facil di preseâ di bande dal grues public plebeu. Seont San Jeroni al murì tal 168 o ben tal 167, ma i studiôs indubitin.

Lis comediis

Al scrivè plui di corante comediis, cuntun stîl che al jere in cualchi maniere un spieli dal timp che si jere: une ete di passaç de culture tradizionâl a une sensibilitât gnove. Dal vieri al mantignì il florilegi sdavas di metris diviers e ancje il realisim mimic des senis, che a lu svicinin a Plaut; dal gnûf al supà la atenzion pe morâl e pal studi de anime dal omp, cun cetantis massimis e resonadis seriis, antecipant Terenzi, che si cognossevin e preseavin. La inspirazion ven soredut di Menandri, il plui impuartant dai autôrs de comedie gnove, unevore plui riflessive di chê classiche.

Di dutis lis comediis, no e je sorevivude nancje une, epûr i antîcs lu preseavin un grum: Volcaci Sedigit lu segnà come il plui brâf di ducj i comediografs latins e le pensave di chê bande ancje Ciceron, che però scrivè intune letare che no si distrigave ben cu la lenghe.

Bibliografie

Paolo Fedeli, Storia letteraria di Roma, Napoli, Ferraro, 2004
Ettore Paratore, Storia della letteratura latina, Bologne, Sansoni, 1957

Leams esternis

Cecìlio Stàzio, treccani.it