Oban (Brenneree)

Oban is en Whiskybrenneree in de Stadt Oban, Argyll, Schottland. Se höört to den Snapskunzern Diageo (ehmols United Distillers), de den Whisky as Deel vun de Classic-Malts-Reeg op’n Markt bringen deit. De Bowarken sünd in de schottischen Denkmollisten in de Kategorie B opföhrt.

Oban
De Brenneree Oban (2006)
Land	Schottland
Region	Highlands
Tyyp	Malt
Status	aktiv
Besitter	Diageo
Grünnt	1794
Grünner	John und Hugh Stevenson
Architekt	George Woulfe Brenan, Charles Chree Doig
Waterborn	Loch Gleann a’Bherraidh
Washstill(s)	1 × 18.800 l
Spiritstill(s)	1 × 8.296 l
Produkschoonsvolumen	670.000 l

Historie

De Brenneree Oban is 1794 vun de Bröder John un Hugh Stevenson grünnt worrn. De lütte Havenstadt Oban is üm de Destille rüm entstahn, de vundaag in’t Hart vun de Stadt liggt. 1866 güng de Oban-Brenneree an Peter Cumstie, de ehr 1883 an James Walter Higgin wieter verköfft hett. De hett ehr 1890 renoveren laten. Man, de Bo vun ne’e Lagerhüüs müss aver afbroken warrn, vunwegen dat archäoloogsche Funnen maakt weern – de ruchweg 5000 Johren ollen Överresten vun söss utwassen Minschen un veer Kinner. Disse Funnen künnt vundaag in’t National Museum of Antiquities in Edinburgh bekeken warrn. 1898 güng de Brenneree an Alexander Edward, de dormols ok de Aultmore-Brenneree besitten de. In’t Johr 1923 weer Oban an Dewar & Sons verköfft un dormit opletzt an Diageo, de vundaag de Besitter is. In de Johren 1931 bit 1937 un 1969 bit 1972 weer in de Destille nich produzeert.

Produkschoon

14-johrigen Oban

De Oban-Brenneree tellt to de Whisky-Region (westliche) Highlands un bruukt to’n Brennen Water ut den Loch Gleann a’Bherraidh. Siet de egene Molteree vun de Destilla dicht maakt worrn is, betütt Oban dat licht törfte Molt vun Roseisle Maltings in de Neeg vun Elgin. De Brenneree hett een Meeschfatt (mash tun) vun söss Tunnen ut Eddelstahl un veer Gäärfatten (Wash backs) ut Läärkenholt vun 28.000 l jeedeen. Destilleert warrt in en Wash still un en Spirit still, de mit Damp hitt maakt warrt. De Whisky riept vör Oort in Bourbon- un Montilla-Sherry-Fatten un warrt to’n Affüllen na Leven, Fife bröcht, woneem Diageo en grote Affüllanlaag bedrifft.

Besöök

Oban hett en Besökerzentrum un kann bekeken warrn. Dat is begäng, dat de Besökers jemehr Glas to’n Pröven na den Rundgang behollen drööft. De Whiskyproov warrt direkt ut en ruchweg teihn Johren oolt Fatt utgeven.

Kiek ok

• List vun de schottischen Brennereen

Weblenken

Oban-Brenneree. Mehr Biller, Videos oder Audiodateien to’t Thema gifft dat bi Wikimedia Commons.