Chlorid

Chloriden sünd Verbinnen vun dat cheemsche Element Chlor, dat sik mit Metallen, Half- oder ok Nichmetallen verbinnen kann.

Kobalt(II)-Chlorid (as Hexahydrat)

Natriumchlorid (Kaaksolt)

Översicht

Metallchloriden as to’n Bispeel Natrium- oder Kobaltchlorid sünd Solten vun de Chlorwaterstoffsüür (HCl), de beter bekannt is ünner de Beteken Soltsüür. En Chlorid bargt in sien Ionengidder eenfack negativ laadte Chlor(I)-Ionen Cl⁻, de tomeist as Chlorid-Ionen betekent warrt. Chloriden mit Nichmetallen sünd to’n Bispeel Chlorwaterstoff, Swevelchloriden, Kohlenstofftetrachlorid (Tetrachlormethan) oder Chlordioxid. As molekulare Verbinnen sünd se veel flüchtiger as soltordige Chloriden. Kohlenwaterstoffen, de Chlor bargt, warrt in de Organik as Derivaten vun de verschedensten Verbinnen vun de Kohlenwaterstoffen bekeken un nöömt. Methan, bi dat en Waterstoff-Atom gegen en Chlor-Atom uttuuscht (substitueert) worrn is, warrt Chlormethan oder Methylchlorid nöömt. Dorbi hannelt sik dat aver nich üm en ionische Verbinnen as bi de Metallen, man üm en kovalente Binnen.

An sik is Chlorid blots de Kortbeteken för dat eenfack negativ laadte Chlorid-Ion. Organische Aminen billt mit Chlorwaterstoff ortgaansche Hydrochloriden, de Chlor-Ionen bargt.

Nawies

För den nattcheemschen qualitative Nawies vun Chlorid warrt eerstmol en Lösen maakt. Vun Vördeel is de Sodauttog, vun wegen dat in den sien Filtrat vele Kationen afscheedt warrt, de stört. Dorna künnt Halogenidnawiesen maakt warrn.

De quantitative Nawies kann mit Titratschoonsverfohren för Halogeniden dörföhrt warrn.

Egenschoppen

Anorgaansche Chloriden

De anorgaanschen Chloriden sünd Solten mit oder ahn Klöör, de in de verschedensten Kristallstrukturen vörkamen künnt. Se tekent sik dör teemlich hoge Smölt- un Kaakpunkten ut.

As Smölten oder in Lösen stellt Chloriden gode Leiders för den elektrischen Stroom dor. Se lööst sik in protische un polare Löösmiddels.

Tostannenkamen

Anorgaansche Chloriden

Chloriden entstaht bi de Redoxreakschoon vun Metallen mit elementaren Chlor oder mit Soltsüür (blots wenn se in de Spannungsreeg ünner den Waterstoff staht, vun wegen dat Soltsüür keen oxideren Wirken hett). Butendem künnt se bi Reakschonen vun Hydroxiden, Metalloxiden, Carbonaten, Hydrogencarbonaten oder allgemeen vun Solten vun swackere Süren mitSoltsüür tüügt warrn.

Orgaansche Chloriden

Orgaansche Chloriden warrt dör Substitutschoons- un Additschoonsreakschonen an Kohlenwaterstoffen un Karbonsüren un jemehr Derivaten wunnen. Dat gifft ok orgaansche Chloriden, in de dat Chlorid nich kovalent bunnen is, man as Ion vörliggt as to’n Bispeel in de Hydrochloriden un de N-Acyliminiumchloriden.

Bruuk un Bispelen

Calciumchlorid

Kristallin Sülverchlorid

Ammoniumchliorid

Dat bekannste Chlorid is dat Natriumchlorid (NaCl), dat beter ünner den Naam Kaaksolt bekannt is. Bruukt warrt dat as Krüdermiddel un to’n Konserveeren.

Annere wichtige Choriden sünd:

• Lithiumchlorid – LiCl
• Kaliumchlorid – KCl
• Cäsiumchlorid – CsCl
• Magnesiumchlorid – MgCl₂
• Calciumchlorid – CaCl₂
• Blie(II)-chlorid – PbCl₂
• Iesen(II)-chlorid – FeCl₂
• Iesen(III)-chlorid – FeCl₃
• Sülverchlorid – AgCl
• Zinkchlorid – ZnCl₂
• Quecksülver(I)-chlorid – Hg₂Cl₂
• Quecksülver(II)-chlorid – HgCl₂
• Ammoniumchlorid – NH₄Cl
• Bariumchlorid – BaCl₂

Vele Chloriden vun disse Solten sünd hygroskoopsch, teht also Water an. Se lagert Kristallwater in un billt somit Hydraten.

Bispelen för orgaansche Chloriden mit kovalente Kohlenstoff-Chlor-Binnen sünd:

• Dichlormethan (ok: Methylenchlorid) – CH₂Cl₂
• Allylchlorid – CH₂=CHCH₂Cl
• Benzylchlorid – C₆H₅CH₂Cl

Dat ok disse nich soltordigen orgaanschen Stoffen as „Chlorid“ betekent warrt, is ’n beten snaaksch liekers aver begäng.

Weblenken

• med4you: Över de physioloogsche Bedüden vun Chloriden